2 Cyjakome ke tpwertil tnam tuꞌn tocx jun nasyon tzꞌaklxix ex in japunxix tyol Kman tuꞌn.

3 Nman, akeju waꞌlxix tuj cyocslabl in che oc tcwentina tuꞌn cyten tuj txubtxaj porque nnoꞌc keꞌ cycꞌuꞌj tiꞌja.

4 Toc keꞌxix cycꞌuꞌje tiꞌj Kman, porque ic tten Kman ic tzaꞌn jun pic jatum tuꞌn kclonte kib te jumajx.

5 Akeju in jaw cyniman cyib in che cub tzꞌak tuꞌn, ex aju tnam in jaw tniman tib in cub t-xitun, ex biꞌx cbel tilj tuꞌn twitz txꞌotxꞌ,

6 cbajel waban cyuꞌn ke xjal meba ex cyuꞌn ke xjal otok che baj yajlaꞌn.

7 Aju cybe ke xjal tzꞌaklxix jikun tiꞌj, ex tuꞌna Nman in baj ttzꞌumsaꞌna cybe.

8 Ax icx keye Kman, in ko bete tuj ju be ic tzaꞌnx in tmaꞌn tleya ex kꞌukl kcꞌuꞌje tiꞌja. Aju tajbil kanmiye, oꞌcx tuꞌn kximane tiꞌja.

9 Tuꞌn tcyakil wanmiye in chin ayone tiꞌja konicꞌan, tuꞌn tcyakil ncꞌuꞌje in chin jyone tiꞌja. Oc in cub tkꞌoꞌna cycastiw xjal najl twitz txꞌotxꞌ, nneꞌl cynicꞌ tiꞌj tuꞌn cybinchante aju tzꞌaklxix.

10 Masque tzaj kꞌakꞌan tcꞌuꞌja cyiꞌj ke xjal mya baꞌn, atzun cye mlayx bant cyuꞌn tuꞌn cybet tuj tumelxix; masque najl ke cyxol ke xjal baꞌn che niman, pero cucx in cybinchaꞌn mya baꞌn ex mintiꞌ nneꞌl cynicꞌ tiꞌj ju maꞌxix toclena, Kman.

11 Nman, banimaj tten aju castiw tuꞌna, atzun cye cycꞌiꞌ tzꞌoc cykꞌoꞌn cycwent tiꞌj; oc cylonte tcꞌujlalila nimxix cyiꞌj ke xjal etzan tuꞌna, ctzajel cychꞌixwi tiꞌj, ex ke aj kꞌoj tiꞌja che bajel tzꞌeꞌy tuꞌn kꞌakꞌ.

12 Nman, atoꞌye tuj txubtxaj tuꞌna, axix toc tcyakil akꞌuntl in bant kuꞌne, tuꞌna in bant.

13 Kman ex Kdiose, ma bant-xi nim abkꞌi junxitl ke cawil ma che cawin kibaje, atzun jaꞌlo oꞌcx aya cxel knimane.

14 Ake jlu o che cyim ex mlay che jaw ankꞌintl juntl maj, ex mlay che jaw weꞌtl ke cyxlenꞌtz, porque o cub tkꞌoꞌna cycastiw, o che naj tuꞌna ex tuꞌna ma tzicꞌ cynaꞌl cyuꞌn xjal.

15 Nman, tuꞌna ma chꞌiy ju nasyon; ma chꞌiy tuꞌna tuꞌntzun tjaw nimsaꞌn tbiya tuꞌn, ex tuꞌna ma tzꞌel lakꞌeꞌ tcyakil tmojonil txꞌotxꞌ.

16 Nman, tuj cꞌisbisabl keye in ko jyone tiꞌja ex oc tcub kcastiwoye tuꞌna, in ko yoline tucꞌila tuj naꞌj Dios.

17 Nman, ictok ktene twitza, ic tzaꞌn jun xuꞌj chꞌixtok tul itzꞌj tal, in jaw t-xkutzꞌin tib ex in schꞌin tuꞌn taꞌw.

18 Ax icxtzun keye, mer ic tzaꞌn oc ten kale, o knaꞌye taꞌw mer ic tzaꞌn cyjaꞌtok tul itzꞌj kale, pero mintiꞌx jun ul itzꞌj kuꞌne. Mintiꞌ ma tzul kiꞌne colbil tuj ktanmiye, ex mintiꞌ ma che ul itzꞌj ke xjal tuꞌn cynajan twitz txꞌotxꞌ.

19 Pero ke xjal etzan tuꞌna, akeju o che cyim, che jawil ankꞌin juntl maj. Che jawil itzꞌj cyximlal ex tzul cynabl keju in che tan tjakꞌ txꞌotxꞌ ex che jawil schꞌin tuꞌn tzalajbil. Porque in tzaj t-samaꞌna t-spicꞌumala, mer ic tzaꞌn tkꞌab cheꞌw, ex ke cyimni che jawil itzꞌj juntl maj twitz txꞌotxꞌ.

20 Akeye xjal etzan wuꞌne, cyxiꞌye, cyocxe tuj cyjaye ex cylamoꞌn etze ke tlamel ja cywitze. Cyewanx chꞌin cyibe, acux nnicꞌ ttxꞌuꞌjil Kman.

21 Porque cꞌeletz Kman tuj tja tuꞌn tcub cycastiw ke xjal najl twitz txꞌotxꞌ tuꞌn tlaj cyil; mlayx txi tewan txꞌotxꞌ aju cychcꞌel ke cyimni cub kojl twitz, ex mlayx txi tewan ke cyimni e cub byoꞌn twitz.