Bitz te nimsabl tbi Dios
25
Nman, aya Ndiose; in jaw nnimsaꞌne tbiya ex in chin yoline baꞌn tiꞌja porque ma che japun tuꞌna ke t-ximbetza maꞌxix cyoclen, aju baj t-ximana tiꞌj ojtxi, axix toclen jlu ex segurxix. 2 Ma che oc ke tnam tuꞌna te txkan byuj abj, ke tnam toclex muro cyiꞌj ma che baj xitj; ma che baj t-xituna ke ja maꞌ cywaꞌl te cycolbil cyib aj kꞌoj, ex mlay che jaw binchaꞌntl juntl maj. 3 Cyjaꞌtzun, cjawil nimsaꞌna tuꞌn jun tnam nimxix tipun, ke tnam cye ke xjal jawni ke che xobel twitza. 4 Porque ma tzꞌoca ic tzaꞌn jun lugar jatum tuꞌn cyclet ke xjal meba, aya colol cyiꞌj ke xjal in che yajlanjtz tuj cꞌixbisabl cye, ic ttena ic tzaꞌn jun lugar jatum tuꞌn cyclet xjal tuj cykꞌikꞌ jbal, ic ttena ic tzaꞌn jun xlecun tuj nim taꞌw cyak. Porque aju cykꞌoj xjal nimxix cyipun ic tten ic tzaꞌn cykꞌikꞌ jbal nnoꞌc jubin tiꞌj tcajonil ja, 5 ex ka ic tzaꞌn taꞌw cyak tuj tzkij txꞌotxꞌ. In cub cyiꞌj aj kꞌoj tuꞌna oc in che jaw tilj, ic tzaꞌn in chewix taꞌw cyak tuꞌna tuꞌn t-xlecumal jun muj. Cbel naj tuꞌna aju cybitz aj kꞌoj te cambabl.6 Cbantel tten jun nim waꞌn tuꞌn Kman aju Tajaw Tcyakil max twi witz Sión, te cye cycyakil nasyon; cbantel cychiꞌ cꞌocꞌjxix wen ex tucꞌix cycꞌa vin ojtxi tbajlen binchaꞌn, aju mas tbanilxix. 7 Twi witz lu cꞌelel tiꞌn Kman aju xbalun in maksinte cyiꞌj cycyakil tnam, tucꞌix ju xbalun licꞌun cyibaj cycyakil nasyon. 8 Te jumajx cnajel camic tuꞌn Kman, cꞌelel t-suꞌn taꞌl cywitz cycyakil, ex mlay cub juntl maj cychꞌixwi ke xjal etzan tuꞌn tuj tcyakil twitz txꞌotxꞌ. Ate Kman ma kꞌmante jlu. 9 Tuj tkꞌijlalil tzul ckꞌmanjtzel cyjaꞌ: Atzun Kman jlu, tiꞌj nnoꞌc keꞌ kcꞌuꞌj ex tuꞌn ma ko clet. Atzun Kman jlu, ko tzalajxix tuꞌnju ma ko clet tuꞌn.
10 Aju tkꞌab Kman ccwentil tiꞌj ju witz Sión, atzun tnam Moab cbajel waban ic tzaꞌn in baj waban tzꞌis jatum nneꞌx xoꞌn. 11 Cxel cynukpiꞌn aj Moab cykꞌab ic tzaꞌn in xi tnukpiꞌn jun xjal tkꞌab oc in xnuꞌxin tuj aꞌ, pero cꞌelel tiꞌn Dios tipun cykꞌab tucꞌix ju cynimbil cyib. 12 Che bel t-xitun Kman ke muro cyoc cyiꞌjele cytanmi aj Moab, akeju maꞌxix cywaꞌl ex cyuwxix cyten, ex jumajx che bel t-xitun twitz txꞌotxꞌ.