Aju jwisi ctzajel tibaj tcyakil twitz txꞌotxꞌ
24
Cybintze, cnajel tcyakil twitz txꞌotxꞌ tuꞌn Kman, cbajel tkꞌuchin, cbajel ttzpet-saꞌn ex che bajel t-sputun ke xjal najl twitz. 2 Aju cbajel cyiꞌj pal axju cbajel cyiꞌj xjal, aju cbajel cyiꞌj patrón xinak axju cbajel cyiꞌj majen xinak, aju cbajel cyiꞌj patrón xuꞌj axju cbajel cyiꞌj majen xuꞌj, aju cbajel cyiꞌj ke xjal in che lakꞌon axju cbajel cyiꞌj ke xjal in che cꞌayin, aju cbajel cyiꞌj ke xjal baꞌn che kꞌon chꞌex axju cbajel cyiꞌj ke xjal in che cꞌmonte chꞌex, aju cbajel cyiꞌj ke xjal cꞌasbenal axju cbajel cyiꞌj ke xjal in che kꞌonte cychꞌex. 3 Biꞌx cnajel tcyakil twitz txꞌotxꞌ, biꞌx cꞌelex baj cyiꞌn tcyakil aju at tuj, porque atzun jlu ma tma Kman. 4 Ma tzkij tcyakil twitz txꞌotxꞌ ic tzaꞌn ke awal in che cub motxꞌj, enter twitz txꞌotxꞌ tuj bis taꞌ ex jumajx ma baj motxꞌj; ke xjal maꞌxix cyoclen twitz txꞌotxꞌ ateꞌ tuj bis. 5 Aju txꞌotxꞌ ma tzꞌilix cyuꞌn ke xjal najl twitz porque mintiꞌ ma che japun ke ley cyuꞌn, ma che icꞌ cyibaj ke mandamyent, ma che icꞌ tibaj ju yol cyaj bant tiꞌj cyucꞌil te jumajx. 6 Tuꞌntzun jlu ma cub tcastiw txꞌotxꞌ tuꞌn Dios ex ma naj. Ke xjal najl twitz ma cub cycastiw tuꞌn tlaj cyil. Cyjaꞌtzun, ke xjal najl twitz txꞌotxꞌ ma cub naj cybet ex nok nicꞌxi xjal atx.7 Mintiꞌtl taꞌl twitz uva, ma che cub motxꞌj ke tkan uva, ke xjal in che ankꞌintok tuj tzalajbil nej, ma tzaj nim cybis. 8 Ma baj twiꞌ tzalajbil tuꞌn tkꞌajkꞌajel cywiꞌ ke tampor ex ke chnab arpa, ex ma weꞌ tkꞌajkꞌajel cywiꞌ ke xjal nim in che achin. 9 Miꞌntl che cꞌan vin tucꞌil cykꞌajkꞌajel ke bitz; aju cycꞌa xjal kꞌeꞌn cꞌoquel te cꞌa. 10 Aju tnam ma baj xitj, nok ttxꞌakan ma cyaj buyeꞌ, cycyakil cylamel ja lamoꞌn tuꞌn miꞌn cyocx xjal. 11 In che okꞌ xjal cyuj cay tuꞌn tlaj mintiꞌ cycꞌa vin; tcyakil cytzalajbil xjal ma baj, ma cub naj ju tzalajbil at twitz txꞌotxꞌ. 12 Aju tnam ma cub xitj, nok ttxꞌakan ma cyaj buyeꞌ, aju tlamel tnam biꞌx ma baj buchj. 13 Ictzun cbajel cyuj cycyakil nasyon ateꞌ twitz txꞌotxꞌ, ic tzaꞌn in cuꞌtz yucut twitz olivo ex ka ic tzaꞌn oc in jaw sucwiꞌn ke twitz uva tcublenxi baj twitz.
14 Atzun ke chꞌintl xjal che cyjel ankꞌin, che jawil schꞌin tuꞌn tzalajbil, cjawil tkꞌajkꞌajel cywiꞌ max tuj telex kꞌij oc cylonte aju tajwalil Kman maꞌxix. 15 Ax icx tuj tjawitz kꞌij ex cyuj ke tnam ateꞌ ttzi mar cxel cykꞌoꞌn nimbil te Kman aju Cydios aj Israel. 16 Max ttxaꞌnpun txꞌotxꞌ ma kbiye lu ke xjal in che bitzan: Nimanxwit tbi ju tzꞌaklxix, che chi.
Atzun weye xi nmaꞌne cyjaꞌ: Becꞌbil nwitze, becꞌbil nwitze. Ke xjal binchal mya baꞌn in cybinchaꞌn aju jumajx mya baꞌn. 17 Ke xjal najl twitz txꞌotxꞌ, ic che oquel ic tzaꞌn ke jil lajoꞌn cyuꞌn xjal baꞌn che camban, ex at xobajil cyiꞌj tuꞌn cyxi tzꞌak tuj jun jul ex ka tuj jun cꞌobil. 18 Aju xjal nneꞌl ok twitz xobajil cyuꞌn cambal cxel tzꞌak tuj jul, aju xjal cjawitz tuj jul cbel tzꞌak tuj cꞌobil. Ctzajel jun kꞌekab twitz cyaꞌj ex che tzajel luꞌlun ke tkꞌukbil txꞌotxꞌ.
19 Ctzajel luꞌlun txꞌotxꞌ cyuwxix wen, cbajel pax ex cbajel buchj. 20 Ctxꞌayjebil ic tzaꞌn jun xjal cꞌal kꞌeꞌn, cbajel yucun ic tzaꞌn jun tal pach in yucch tuꞌn cykꞌikꞌ. Nimxix cyil xjal ic tzaꞌn jun iktz alxix, cyjaꞌtzun cbel tzꞌak enter twitz txꞌotxꞌ ex mlay jaw weꞌtl. 21 Tuj tkꞌijlalil tzul cbel tkꞌoꞌn Kman cycastiw keju at cyipumal ateꞌ twitz cyaꞌj, cyucꞌix ke rey ateꞌ twitz txꞌotxꞌ. 22 Che oquel tchmoꞌn ex che oquex tjapuꞌn tuj jun calabós, che oquex tpresin, ex tbajlenxi nim kꞌij cbeltzun tkꞌoꞌn cycastiw. 23 Octzun ttzyet tcawin Kman aju Tajaw Tcyakil twi witz Sión tuj Jerusalén, cꞌoquel klolj twitz kꞌij tucꞌix xjaw, ex ke cytijil xjal ateꞌ tuj tnam cꞌoquel cyqueꞌyin tajwalil Kman.