Che okꞌe akeye xjal yucul barc in che tzaj tuj tnam Tarsis, porque aju tnam Tiro ma cub xitj, mi jun cyja xjal ma cyaj ten, ex aju lugar jatum in che icꞌel ke barc ttzi mar ma baj naj. Max tuj tnam Chipre ma binjtz tkanil tiꞌj jlu. 2 Miꞌn che kꞌajte akeye xjal najl nikayin ttzi mar, cyucꞌix ke comersyant tuj tnam Sidón ex ke comersyant ateꞌ cyxole in che icꞌx tuj mar, 3 ex cyuj ke aꞌ maꞌxix ke. Atzun in cnet cycambabl tiꞌj twitz awal in tzaj tuj tnam Sihor, tucꞌix tiꞌj twitz awal in tzaj ttzi nima Nilo, ex in che negosyarin cyucꞌil ke nasyon. 4 Tzajxwit tchꞌixwiya tnam Sidón, aya nim tipuna tcuba ttzi mar, porque cxel tmaꞌna cyjaꞌ: Bajx tzaj taꞌw wiꞌje tuꞌn tul itzꞌj wale ex bajx tzaj wale. Mintiꞌ wale kꞌa tuꞌn tcub nchꞌisane ex mintiꞌ wale txin at tuꞌn t-xi nkꞌoꞌne xnakꞌtzbil cye. 5 Octzun tpon tkanil lu tuj Ejipt, ctzajel nimxix cybis tiꞌj aju otok baj tiꞌj tnam Tiro, 6 ex oc cymaꞌ cyjaꞌ: Cyxiꞌye tuj tnam Tarsis, che okꞌe, akeye xjal najl tuj mlaj txꞌotxꞌ ttzi mar.

7 ¿Maj atzun tnam lu, aju ojtxi tnamxix ex nimxix tgan cyiꞌj ke achbil? ¿Maj atzun jlu aju in bettok tuꞌn tcub ten cyuj ke txꞌotxꞌ ateꞌ najchak? 8 ¿Alcye ma kꞌmante tuꞌn ttzaj jlu tiꞌj tnam Tiro, aju maꞌxix toclen cyxol mastl tnam, ex ke comersyant ateꞌ tuj, nejenel ke, ex ke xjal in che negosyarin tuj, atzun ke mas nimxix cyipun ateꞌ twitz txꞌotxꞌ? 9 Ate Kman aju Tajaw Tcyakil o kꞌmante tuꞌn ttzaj jlu tiꞌj, tuꞌn tnaj tcyakil cynimbil cyib xjal, ex tuꞌn tel kꞌiꞌn cyoclen cycyakil xjal nimxix cyipun ateꞌ twitz txꞌotxꞌ. 10 Akeye aj Tarsis, che akꞌnane jaꞌlo twitz txꞌotxꞌ, porque ma naj ju lugar jatum in che icꞌel ke barc. 11 Ma txi tnukpiꞌn Kman tkꞌab tibaj mar, ma che tzaj luꞌlun ke nasyon tuꞌn, ex ma txi tmaꞌn tuꞌn cycub xitun ke ja maꞌ cywaꞌl te cycolbil cyib xjal ateꞌ tuj Canaán. 12 Ex xi tmaꞌn cye aj Sidón cyjaꞌ: Cycolinxe tuꞌn cyachine akeye nim ma che baj yajlaꞌne. Masque cnet tumlal cyuꞌne tuꞌn cypon oke max tuj Chipre, ax icx mlay che ojlane ma chixin.

13 Cyqueꞌyintze ju txꞌotxꞌ lu, aju txꞌotxꞌ jatum in che bant ke barc. Ke xjal aj Caldey jaw cybinchaꞌn ke ja maꞌ cywaꞌl, ex baj cyxitun ke tja rey ateꞌ tuj Sidón, nok ttxꞌakan ma cyaj buyeꞌ. Ax ke at cyil tiꞌj jlu, mya ate Asiria.

14 Che okꞌe akeye xjal yucul barc in che tzaj tuj tnam Tarsis, porque ma che cub xitj ke ja maꞌ cywaꞌl te cycolbil cyibe.

15 Tuj tkꞌijlalil lu cꞌicꞌel tnaꞌnjtz tnam Tiro tuj 70 abkꞌi, ic tzaꞌn tankꞌibl jun rey. Tbajlenxi 70 abkꞌi, ic cbajel tiꞌj tnam Tiro ic tzaꞌn in tmaꞌn cybitz ke xuꞌj jawni cywitz cyucꞌil xinak:

17 Tbajlenxi 70 abkꞌi ctzajel Kman juntl maj onil tiꞌj tnam Tiro. Atzunte Tiro cjyol tiꞌj tcambabl juntl maj ex cꞌoquel ten negosyaril juntl maj cyucꞌil cycyakil nasyon ateꞌ twitz txꞌotxꞌ. 18 Atzunju tcambabl cjawil tiꞌj tcꞌaꞌẍ, cxel tkꞌoꞌn te Kman, mlay txi cꞌuꞌt, nok oꞌcx cxel kꞌot cye keju in che ajben te Kman, tuꞌntzun tlakꞌet nimxix wabj cyuꞌn ex ke xbalun tbanilxix.