¿Ti ma baj, tuꞌnju niban cyjax cycyakil xjal cywiꞌ ke ja? 2 Aya tnam nok in che jaw tilj ke xjal tuja ex nim tkꞌajkꞌajel in kꞌajt tuja, nim in tzalaja cyiꞌj achbil: Ke xjal e cyim tuja, mya tuꞌn spad e cub byoꞌn, mya tuj kꞌoj e cyim. 3 Cycyakil ke nejenel ateꞌ tuja ma che el ok ex mintiꞌ jun plech ma txi xoꞌn cyiꞌj. Cycyakil xinak ateꞌ tuja ma cheꞌx ok najchak, pero cyucꞌix ke ma che tzyet. 4 Cyjaꞌtzun ma txi nmaꞌne: Cypaꞌmil cyibe wiꞌje, waje tuꞌn njaw okꞌe cyuwxix wen; miꞌn che oc tene kꞌukbalte ncꞌuꞌje, tuꞌn tlaj aju xitbil ma tzaj tiꞌj ntanmiye. 5 Porque ma tzaj tmaꞌn Kman aju Tajaw tcyakil: Cpol jun kꞌij tuꞌn cyjaw tilj ke xjal, tzul xitbil cyiꞌj ex biꞌx cnajel cynabl tuj chkꞌajlaj tcub t-xe witz jatum in tzaj yolin Kman cye t-sanjel. In che cub xitun ke muro toc tiꞌjele tnam; in pon tkꞌajkꞌajel cywi xjal max twi witz.

6 Ma bant cyten cyplech aj Elam, ex cyocxsaꞌn ke cyuj cycarwaj, ex cyjax ke cyibaj ke chej cabay; ke aj Kir ma bant cyten cymakbil aju in ajben cyuꞌn tuj kꞌoj. 7 Ke cytxꞌotxꞌe chkꞌajlaj ex tbanilxix, nojni ke cyuꞌn ke carwaj, ex ke xjal cyjax cyibaj chej ma che oc tzokpaj cyiꞌj ke tpwertil tnam. 8 Mintiꞌtl jatum tuꞌn cyclonte cyib aj Judá.

Tuj kꞌij lu nnoꞌc cyqueꞌyine jatum cꞌuꞌn ke ubl tuj ja binchamaj tiꞌj tzeꞌ te tjakꞌ chcꞌul, 9 ex ma cyile nimcu tpaꞌxil muro toc tiꞌj tnam Ttanmi David tbi, ex ma cuꞌx cynojsaꞌne tuꞌn aꞌ aju tanc tcuꞌtz cubni, 10 baj cyqueꞌyine cyten ke ja ateꞌ tuj Jerusalén ex baj cyxitune junjun tuꞌn tcyuwset ju muro. 11 Cyxol cycabil muro cub cybinchaꞌne jun tanc te tcubil aꞌ, aju aꞌ in tzaj tuj ttxꞌakan tanc, pero mintiꞌ oc cykꞌoꞌne cywitze tiꞌj Dios aju binchante tcyakil jlu ex ximamaj tuꞌn atxix ojtxi.

12 Tuj kꞌij lu ma che txconjtze tuꞌn Kman aju Tajaw Tcyakil, tuꞌn cyoc tene okꞌel ex tuꞌn cybisune, tuꞌn tel cycꞌoꞌẍine tiꞌj cywiꞌye ex tuꞌn toc cykꞌoꞌne cyxbalune chꞌiꞌx cywitz te jun techal te cꞌixcꞌoj. 13 Atzun cyeye ma tzꞌoc cykꞌoꞌne aju kꞌij lu te achbil ex te tzalajbil, ma cub cybyoꞌne ke wacẍ ex ke ẍneꞌl, ma che chyoꞌne chibj ex ma che cꞌane vin ex ma cymaye cyjaꞌ: Ko waꞌn ex ko cꞌan, porque nchiꞌj ko cyim, che chitzune. 14 Ex cub tyecꞌun tib Kman nwitze, aju Tajaw tcyakil, ex tzaj tcyuwsaꞌnxix weye cyjaꞌ: Che cymele ex mlayx cub nnajsaꞌne aju cyile lu, chi Kman aju Tajaw Tcyakil.

15 Tzaj tmaꞌn Kman weye, aju Tajaw Tcyakil, chi cyjaꞌ: Txiꞌya queꞌyilte Sebna aju mayordom tuj tja rey, ex kꞌmanxa te cyjaꞌ:

16 ¿Ti nbaj teya tzalu, ex alcye ma tzaj kꞌonte ambil teya tuꞌn tjaw tbinchaꞌna jun pantyón tzalu, ex tuꞌn tjaw tbinchaꞌna jun tpantyona twiꞌ jun pic maꞌ tjaw, ex tuꞌn tocx tlacuꞌna toyꞌ tuꞌn tojlana tuj oc tcyima? 17 Cꞌelex xoꞌna tuꞌn Kman tuj jun lugar najchak wen, ic tzaꞌn in tbinchaꞌn jun xinak nimxix tipun. Ctzyetela tuꞌn tucꞌil tipun. 18 Cbajel toꞌlina tuꞌn ic tzaꞌn jun pelot, ex cxel xoꞌna tuꞌn tuj jun txꞌotxꞌ maꞌxix wen. Max cnajela ma chixin, maxtzun che pol weꞌ ke tcarwaja ma chixin, akeju nim in tzalaja cyiꞌj, ex cꞌoquela te chꞌixbil tuj tja rey aju tpatrona. 19 Akine chin elel kꞌinte teya tiꞌj toclena, cꞌelel wiꞌne aju takꞌuna.

20 Atzun kꞌij lu ctzajel ntxcoꞌne nmajene Eliaquim aju tcyꞌajal Hilcías; 21 cꞌoquel nkꞌoꞌne t-ẍjoꞌwa tiꞌj, tucꞌix cꞌalbil tcꞌuꞌja, aju in ajben te nimbil teya, ex cxel nkꞌoꞌne aju toclena te. Cꞌoquel ic tzaꞌn jun mambaj te cye keju najl tuj Jerusalén ex te cye aj Judá. 22 Cbel nkꞌoꞌne tal tja David tibaj t-semil; aju ja cjaketel tuꞌn, mi aꞌl jun xjal jacu tzꞌex lamonte, ex aju tlamel ja cyjel tlamoꞌn, mi aꞌl jun xjal jacu jaket tuꞌn. 23 Ic cꞌoquel ic tzaꞌn jun kꞌukbil te nimbil te cye keju ateꞌ tuj tja tman. Ccyuwsetel wuꞌne tuj tlugar, ic tzaꞌn jun tzeꞌ otok tzꞌocx pajoꞌn tuj lokꞌ. 24 Ex tiꞌj che oquel yobit cycyakil keju maꞌxix cyoclen ateꞌ tuj tja tman, cyucꞌix ke mastl tiyjil ex tucꞌix tcyakil txcaj tcubil cꞌabj cocꞌ ke, ic tzaꞌn ke lak ex ke xar.

25 Tuj kꞌij lu cꞌeletz tzꞌak ju tzeꞌ, aju otok tzꞌocx pajoꞌn tuj jun lugar segurxix, cꞌeletz bakoꞌn ex cꞌelel tzꞌak, ex cycyakil ke tiꞌxti otok che oc yoban tiꞌj che bel pax. Atzun jlu in tmaꞌn Kman aju Tajaw Tcyakil.