Ic tzaꞌn cykꞌikꞌ jbal in tzaj tuj tnayaj kꞌij, ictzun che tzajel aj kꞌoj tuj tzkij txꞌotxꞌ tuj lugar xobajilxix. 2 Xobajilxix aju ma tzaj tyecꞌun Dios weye; aju xjal sbul cucx t-sbun, aju xjal xitul cucx t-xitun. Cyjaxe aj Elam, atzun cyeye aj Media, cyoc tzokpaje cyiꞌj aj kꞌoj. Mlay txi nkꞌoꞌne ambil tuꞌn cucx cyyajlanjtz xjal cyuꞌn aj Babilonia. 3 In luꞌlun nximlale tuꞌn taꞌw cꞌixcꞌoj, in baj nẍocpin wibe tuꞌn taꞌw cꞌixcꞌoj ic tzaꞌn jun xuꞌj nnuꞌl itzꞌj tal, aju bis mintiꞌ in tkꞌoꞌn ambil tuꞌn t-xi nbiꞌne, aju xobajil in chin tmayoꞌn tuꞌn miꞌn t-xi nqueꞌyine. 4 Tzpetni taꞌ nnable, in chin luꞌlune tuꞌn xobajil. Aju wojlable te kale oc tchewix kꞌij, aju in chin tzalajtoke tiꞌj, ma tzꞌoc te jun xobajil te weye. 5 Aju mes ma bant tten, ma cub licꞌun ke xbalun te cykꞌukbil xjal, ma tzyet nintz waꞌn. Akeye capitán che weꞌctze, cykꞌoꞌnque aseyt cyiꞌj ke makbil in che ajben tuj kꞌoj. 6 Porque ma tzaj tmaꞌn Kman weye cyjaꞌ: Txiꞌya ex kꞌon cyaja jun xkꞌukil tuꞌn ttzaj tmaꞌn tcyakil aju ctilaꞌ. 7 Ka ma til ke carwaj jawoꞌn cyuꞌn cabchaj chej cabay ex ka ma til ke xjal cyjax cyibaj ke bur ex ka ke chej camey, baꞌn tuꞌn t-xi tqueꞌyinxix wen. 8 Ex aju xjal tcyajsaꞌn xkꞌukil jaw schꞌin: Nman, ax atine tuj nlugare tcyakil kꞌij, ex tcyakil konicꞌan in chin xkꞌukine. 9 Lu tzul jun carwaj jawoꞌn cyuꞌn cabe chej cabay ex ma nbiye jun tkꞌajkꞌajel wibaj cyjaꞌ: Ma cub xitj, ma cub xitj Babilonia. Cycyakil cyilbilal cydios ma che cub tzꞌak twitz txꞌotxꞌ ex biꞌx ma che cub buchj, chi xjal.

10 Akeye nxjalile o che baj wabane ic tzaꞌn triw, cxel nmaꞌne cyeye aju ma nbiye te Kman aju Tajaw Tcyakil, aju Cydios aj Israel.

11 Aju tkanil o kꞌmanjtz tiꞌj ju attok ttzajel tiꞌj tnam Edom:

At jun xjal ma tzaj kꞌajt wiꞌje max tuj tnam Seir: Aya xkꞌukil, ¿nicꞌpun atx taj tuꞌn tcub kꞌij? Aya xkꞌukil, ¿nicꞌpun atx taj tuꞌn tcub kꞌij? Chi xjal. 12 Ex atzunte xkꞌukil ma tzaj ttzakꞌweꞌn: Chꞌix tcub kꞌij, pero ax icx chꞌix ttzaj konicꞌan. Ka cyaje tuꞌn cykanine tiꞌj, baꞌn tuꞌn t-xi cykanine ex tuꞌn cyajtz meltzꞌaje juntl maj.

13 Aju yol o kꞌmanjtz tiꞌj ju attok ttzajel tiꞌj Arabia:

Akeye xjal aj Dedán in che bete tuj cꞌlojin, nneꞌx akꞌbil cyeye tjakꞌ chcꞌul tuj tzkij txꞌotxꞌ tuj Arabia: 14 Cyexe canul cyiꞌj keju at txketleꞌn cyiꞌj ex cykꞌonxe cycꞌa aꞌ. Akeye xjal najl tuj txꞌotxꞌ Tema, cyexe canul cyiꞌj keju in che el ok ex cykꞌonxe cywa. 15 Porque in che el ok twitz spad, aju spad banin ttziꞌ wen, ex twitz ju xobl plech banin tten tuꞌn t-xi t-xoꞌn plech, ex twitz ju kꞌoj xobajilxix.

16 Tzaj tmaꞌn Kman weye cyjaꞌ: Tuj juntl abkꞌi jaꞌlo, mlay tzicꞌ tibaj, tloktzun otok baj tcyakil aju toclen Cedar maꞌxix wen. 17 Ex nicꞌxi cybet ke xjal che cyjel ten, akeju baꞌn che xoꞌn plech tuꞌn xobl plech ex elni ke twitz kꞌoj, akeju najl tuj Cedar. Ate Kman aju Cydios aj Israel ma kꞌmante jlu.