Cbel cyiꞌj aj Ejipt ex aj Etiopía tuꞌn rey te Asiria
20
At jun maj xi t-samaꞌn Sargón aju rey te Asiria, jun nejenel cye soldad cyucꞌix ke t-soldad, tuꞌn tpon tuj tnam Asdod; oc tzokpaj xjal lu tiꞌj tnam ex o cub tiꞌj tuꞌn. 2 Otok tzaj yolin Kman tucꞌil Isaías aju tcyꞌajal Amoz, ex otok tma te cyjaꞌ: Kꞌin ela xbalun chꞌiꞌx twitz toc tiꞌja ex tucꞌix xjab toc tiꞌj tkana.Tbinchatzun Isaías icju ex cyaj ten mintiꞌ t-xajab toc ex mintiꞌ t-xbalun, nok oꞌcx tmaẍtat cyaj ten. 3 Te tibajxi tma Kman: Aju nmajene Isaías ma cyaj ten ox abkꞌi mintiꞌ t-xajab toc ex oꞌcx tmaẍtat toc. A jlu te jun techal ex te jun tkanil tiꞌj Ejipt ex tiꞌj Etiopía. 4 Ax icxtzun ke aj Ejipt che xel kꞌiꞌn pres cyucꞌix aj Etiopía, tuꞌn cyrey aj Asiria; ke tij xjal ex ke cꞌwaꞌl che xel kꞌiꞌn mintiꞌ cyxajab toc, nok oꞌcx cymaẍtat toc ex cucx kꞌanchaꞌl cyẍoꞌp mintiꞌ txaybil te, tuꞌn tcub cychꞌixwi aj Ejipt. 5 Ctzajel nim cyxobil xjal ex ctzajel cychꞌixwi tuꞌnju otok tzꞌoc keꞌ cycꞌuꞌj cyiꞌj aj Etiopía ex otok che tzalaj nimxix cyiꞌj aj Ejipt. 6 Tuj tkꞌijlalil tzul, cycyakil xjal najl tuj mlaj txꞌotxꞌ lu cxel cymaꞌn cyjaꞌ: Cyqueꞌyinxe aju ma baj tiꞌj tnam jatum kꞌukl kcꞌuꞌj, aju in koꞌxtok kanil onbil te tuꞌn kclet tuꞌn tuj tkꞌab cyrey aj Asiria. ¿Tzaꞌntzun tten ko cletel jaꞌlo? Che chilo.