Lu Kman tzul tuꞌn tpon tuj Ejipt tjaxsaꞌn tibaj jun muj in ojkelan wen. Ke tilbilal ateꞌ tuj Ejipt in che oc ten luꞌlul twitz ex ke aj Ejipt in putin cyanmi tuꞌn cyxobil. 2 Wuꞌne che oquel ten aj Ejipt kꞌojlel ax cyxolx, ex teyle junjun ckꞌojel tiꞌj terman, teyle junjun ckꞌojel tiꞌj jun tamiw; jun tnam ckꞌojel tiꞌj juntl tnam ex jun cawbil tiꞌj juntl cawbil. 3 Cnajel cynabl wuꞌne, cbajel tzpet cyximbetz wuꞌne. Che xeꞌl kanil cynabl cye ke tilbilal nnoꞌc cydiosin ex cye ke chman ex cye cyanmi cyimni ex cye keju baꞌn che kꞌijin. 4 Cxel nkꞌoꞌne Ejipt tuj tkꞌab jun patrón cyuwxix; jun rey cyuwxix tmod ccawil tibaj, chi Kman aju Tajaw Tcyakil.

5 Aju aꞌ te nima Nilo cꞌajel tzkij, te jumajx ctzkijel nima lu. 6 Che tzuwixtel tkꞌab nima. Ke tbe aꞌ tuj Ejipt che bel naj ocxi cyaj tzkij, che tzkijel ke tkan ajlaj ex ke tkan sim; 7 ctzkijel tcyakil cꞌul in chꞌiy ttzi nima, ex tcyakil awal awaꞌn ttziꞌyile che tzkijel, che xel ikan tuꞌn cykꞌikꞌ ex mlay che tentl. 8 Cycyakil xjal in che xacun cyiẍ tuj nima Nilo che oquel ten ayil ex che oquel ten okꞌel. Ctzajel nimxix cybis keju in xi cyxoꞌn cyxuyb te tzuybil cyiẍ tuj aꞌ. 9 Cnajel cynabl ke xjal in che akꞌnan tiꞌj nokꞌ lino; ctzajel baj cycꞌuꞌj ke chubil twitz nokꞌ, cyucꞌix keju baꞌn che chmon tiꞌj xbalun; 10 ke xjal chmol xbalun che cyjel ten tuj bis, ex cycyakil akꞌnal xjal.

11 Ke nejenel tuj tnam Soán mintiꞌ cynabl, ke xjal kꞌol consej, akeju mas at cynabl tuj Ejipt, jumajx mintiꞌ cyajben. ¿Tzaꞌn tten in xi cymaꞌne te Faraón cyjaꞌ: Cyiyjil xjal at cynabl koꞌye ex cyiyjil rey koꞌye, akeju e ten ojtxi? Che chiye. 12 Aya Faraón, ¿jatum ateꞌ ke xjal aj nabl ateꞌ tucꞌila? ¿Jacupe tzaj xnakꞌtzaꞌna cyuꞌn ex jacupe tzaj cymaꞌn teya aju ximamaj tiꞌj Ejipt tuꞌn Kman aju Tajaw Tcyakil? 13 Ke nejenel tuj tnam Zoán mintiꞌ cynabl, ke nejenel tuj tnam Menfis ma che cub sbuꞌn, ma che el txalpuj aj Ejipt tiꞌj cybe cyuꞌn ke nejenel cyuj ke tnam. 14 Ma tzpet cynabl ke nejenel tuꞌn Kman; ma che el tzpet ke aj Ejipt cyuꞌn, tuꞌn tcyakil aju in cybinchaꞌn, ic cyten ic tzaꞌn jun cꞌal kꞌeꞌn in jatz t-xaꞌw ex in ẍocpajeꞌ. 15 Ex mi jun jacu tzꞌonin cyiꞌj aj Ejipt, mi jun xjal maꞌ toclen ex mi jun xjal chꞌin toclen.

16 Tuj tkꞌijlalil tzul, ic che oquel aj Ejipt ic tzaꞌn ke xuꞌj jurat in tzaj cyxobil; che jawil luꞌlun oc cyqueꞌyinte oc tjaw tiꞌn Kman tkꞌab, aju Tajaw Tcyakil, tuꞌn tcub cycastiw. 17 Ctzajel cyxobil aj Ejipt cywitz aj Judá; nok oꞌcx ka ma tzaj cynaꞌn cyiꞌj aj Judá, ctzajel t-xobil cyiꞌj tuꞌn tlaj aju ximamaj tiꞌj Ejipt tuꞌn Kman aju Tajaw Tcyakil. 18 Tuj tkꞌijlalil tzul, ctel jweꞌ tnam tuj Ejipt baꞌn che yolin tuj yol ebrey, ex cxel cytziyan tuꞌn tjapun cyuꞌn aju in tmaꞌn Kman aju Tajaw Tcyakil. Jun cyxol tnam lu cꞌoquel tbi Tnam te Kꞌij.

19 Tuj tkꞌijlalil tzul ctel jun altar tuj Ejipt tuꞌn tcꞌulunjtz Kman, ex nikayin tuj tmojonil cjawil waban jun abj te nimbil te Kman. 20 Cꞌajbel te jun techal, tuꞌn ttzaj naꞌn Kman aju Tajaw Tcyakil tuj txꞌotxꞌ Ejipt. Oc cycubsan twitz Kman, tuꞌn cykanin onbil tuꞌn cylaj keju in che yajlan cyiꞌj, atzunte Kman ctzajel t-samaꞌn jun clol cye, tuꞌntzun tcolin cyiꞌj ex tuꞌntzun cytzokpet tuꞌn. 21 Cxel tyecꞌun tib Kman cye aj Ejipt, ex atzun cye cꞌelel cynicꞌ tiꞌj Kman, che cꞌulul twitz ex cxel cykꞌoꞌn ke chojbil ex ke oyaj te. Cxel cytziyan jun yol axix toc te Kman ex cjapunel cyuꞌn. 22 Che cꞌixbisetel aj Ejipt tuꞌn Kman, pero te tibajxi che banixel tuꞌn. Che ajetz meltzꞌaj tucꞌil Kman, ctzajel kꞌakꞌan tcꞌuꞌj cyiꞌj ex che banixel tuꞌn.

23 Tuj tkꞌijlalil lu ctel jun nintz be, ctzajel keꞌ tuj Ejipt tuꞌn tpon max tuj Asiria. Ke aj Asiria che pol max tuj Ejipt, ex ke aj Ejipt che pol max tuj Asiria, junx che cꞌulul ke aj Ejipt cyucꞌix aj Asiria twitz Kman.

24 Tuj tkꞌijlalil tzul, junx ctel cyoclen aj Israel cyucꞌil aj Ejipt ex ke aj Asiria, ex cꞌoquel te jun cyꞌiwbil tuj tcyakil twitz txꞌotxꞌ. 25 Che bel cyꞌiwlaꞌn tuꞌn Kman aju Tajaw Tcyakil, ex oc tmaꞌ cyjaꞌ: Che bel ncyꞌiwlaꞌne ke aj Ejipt aju tnam etzan wuꞌne, cyucꞌix aj Asiria aju takꞌunben nkꞌabe, ex aj Israel aju wetzbile.