Aju tkanil o kꞌmanjtz tiꞌj ju attok ttzajel tiꞌj tnam Etiopía
18
Becꞌbil twitz ju txꞌotxꞌ jatum in che ranin ke tal jil tuꞌn cyxicꞌ, aju max taꞌ cyiꞌjxi ke nima tuj Etiopía, 2 aju in cheꞌx t-samaꞌn ke t-sanjel tuꞌn cybet tuj barc tibaj nima Nilo, ke cybarc binchamaj tiꞌj sim. Cyxiꞌye akeye sanjel cyuw che bete, cyxiꞌye cyucꞌil ke xjal maꞌ cywaꞌl ex in koptzꞌaj tiꞌj cyximlal, atzun jun nasyon xoꞌnxix wen tuj tcyakil part ex atzun tnam lu at-xix tipun ex in cub cyiꞌj mastl tnam tuꞌn ex tcubsaꞌn tuj jun txꞌotxꞌ cyxol ke nima. 3 Cycyakile akeye najl twitz txꞌotxꞌ oc cyilaꞌye oc tjaw jun techal cywi witz, ex oc cybiꞌye tkꞌajkꞌajel twi chun oc toc kꞌajtzaꞌn.4 Ma tma Kman weye: Max tuj lugar jatum atine ctzajel nqueꞌyine tuj txubtxaj, ic tzaꞌn tkan kꞌij tuj jun kꞌij te coresma, ex mer ic tzaꞌn chꞌin muj tuꞌn tkꞌab cheꞌw tuj tkꞌijlalil taꞌw cyak oc tjaw chmet twitz awal. 5 Oc tcub baj t-xmacal tkan uva ex matok in kꞌanax twitz, pero naꞌnxtok tuꞌn tpon tkꞌijlalil tuꞌn tjaw chmet twitz, cbajel cypodarin ke tkꞌab tuꞌn cchil, cꞌelel cytxꞌeꞌmin ex cꞌelex cyxoꞌn. 6 Cycyakil cyximlal ke cyimni cyjel ten te cychiꞌ ke cꞌutz ateꞌ twi witz ex te cychiꞌ txcup te tjakꞌ cꞌul. Ax che tel ke cꞌutz ma chixin tuj enter coresma ex cycyakil txcup te tjakꞌ cꞌul che tel ma chixin tuj jbalil.
7 Tuj tkꞌijlalil tzul ctzajel cyiꞌn ke oyaj te Kman aju Tajaw Tcyakil; akeju che tzajel kꞌinte, atzun ke xjal maꞌ cywaꞌl ex in koptzꞌaj tiꞌj cyximlal, atzun jun nasyon xoꞌn wen tuj tcyakil part, ex atzun tnam lu nimxix tipun ex in cub cyiꞌj mastl tnam tuꞌn, tcubsaꞌn tuj txꞌotxꞌ cyxol ke nima. Ctzajel cyiꞌn ke oyaj tuꞌn cyul twi witz Sión, jatum in naꞌnjtz tbi Kman aju Tajaw Tcyakil.