Cnajel tnam Damasco ex mya cucx ctel; nok ttxꞌakan cyjel ten oc tcub xitun. 2 Te jumajx che cyjel colin ke tnam Aroer, che oquel te cywabl alumaj; che bel buneꞌ ke alumaj cyuj ex mi jun cꞌoquel ten xobtzalte cye. 3 Che najel ke tnam toc muro cyiꞌj cyxol aj Efraín, ax icx cnajel aju cawbil at tuj tnam Damasco, ex ke aj Siria che cyjel ankꞌin, icx cbajel cyiꞌj ic tzaꞌn baj cyiꞌj aj Israel tej tnaj aju cyoclen maꞌxix, chi Kman aju Tajaw Tcyakil.

4 Tuj tkꞌijlalil tzul, cbajel cyipun ke tiyjil Jacob ex cnajel tcyakilju at cye. 5 Ic ctembil jlu ic tzaꞌn oc tjaw cychmoꞌn xjal twitz triw ex oc tjaw cyiꞌn junjun cheꞌl triw tuꞌn cykꞌab, ex ka ic tzaꞌn oc tjaw sucwit triw tuj chkꞌajlaj Refaim; 6 ex nok nicꞌxi cyjel ten, ic tzaꞌn oc tbaj chtet jun wiꞌ olivo ex nok cab ox twitz in cyaj ten max ttxaꞌnpun ke tkꞌab, ex ka nok cyajex ex ka jweꞌ cyjel ten tiꞌj tkꞌab tbanilxix. A jlu in tmaꞌn Kman aju Cydios aj Israel.

7 Tuj tkꞌijlalil tzul cxel cykanin xjal onbil teju Chꞌisal cye, aju Dios Xjan cye aj Israel. 8 Mlay tzꞌoc keꞌtl cycꞌuꞌj cyiꞌj ke altar, mi cyiꞌj txkantl macbil cyuꞌnx in baj cybinchaꞌn. Mlay tzꞌoc keꞌtl cycꞌuꞌj cyiꞌj ke tzeꞌ nnoꞌc cykꞌoꞌn te cydios, mi cyiꞌj ke altar jatum in cub patit storac cywitz cydios. 9 Tuj kꞌij lu, ke tnam toc muro cyiꞌj che cyjel colin, ic tzaꞌn tej tcyaj cycolin aj Hevey ex aj Amorrey ke cytanmi nok tuꞌn cylaj aj Israel, ex che oquel te tzkij txꞌotxꞌ, 10 porque icꞌ tnaꞌl Dios cyuꞌne, aju Clol cyeye, mintiꞌ tzaj cynaꞌne ka ic tten Dios ic tzaꞌn jun lugar segurxix jatum tuꞌn tpon cyclon cyibe. In baj cyakꞌnaꞌne aju tkan awal tbanilxix, in cuꞌx cyawaꞌne cyawale te nimbil te juntl dios mintiꞌ ojtzkiꞌn cyuꞌne. 11 Ax kꞌij oc in cuꞌx cyawaꞌne, nnoꞌc cycwentine tuꞌn tchꞌiy naj ex in bant cyuꞌne tuꞌn toc naj t-xmacal. Pero oc tul ju yajbil ex ju cꞌixbisabl mlay bant tkꞌananjtz, cnajel twitz awal tuꞌn.

12 Cybinxe tkꞌajkꞌajel cywiꞌ ke xjal nimxix cyajlal cyuj nimcu nasyon, mer ic tzaꞌn tkꞌajkꞌajel mar tbinx. Atzun cykꞌajkꞌajel cywiꞌ ke nasyon in che tzanun ic tzaꞌn tkꞌajkꞌajel twi aꞌ in xojin wen. 13 Pero oc cyxi mayoꞌn tuꞌn Dios, che xel ok najchak wen, ic tzaꞌn chꞌim in xi tikan cykꞌikꞌ cywi witz, ex ka ic tzaꞌn sak chꞌiꞌx in xi tjawoꞌn cykꞌikꞌ jbal. 14 Te kale in che oc xobajilxix, pero naꞌnxtok tjawil kꞌij otok che cyim. Atzun jlu in baj cyiꞌj keju in cheꞌx kꞌinte tcyakil aju at ke, cyjaꞌtzun che najel keju in ko naj cyuꞌn.