Ke aj Moab che pol clol cyib tuj Judá
16
Max tuj tnam Sela tuj lugar tzkij txꞌotxꞌ, cysamanxe ke ẍneꞌl tucꞌil ju cawil tuj txꞌotxꞌ Judá, tuꞌn cypon max twi witz Sión. 2 Oc cyicꞌx ke xuꞌj aj Moab tuj xajbil aꞌ tuj nima Arnón, ic cyten ic tzaꞌn ke chyuꞌj otok che etz secꞌpuꞌn ex in che el ok tiꞌj cykꞌuꞌ. 3 In xi cymaꞌn cye aj Sión cyjaꞌ: Cybinchame kiꞌje tuꞌn kclete, cykꞌontze cyxlecumale te chilcukꞌij tuꞌn toc ic tzaꞌn konicꞌan, tuꞌntzun miꞌn kilwaje; cykꞌontze ambil tuꞌn tocx kclon kibe cyxole, miꞌn koꞌx cykꞌoꞌne tuj cykꞌab aj kꞌoj kiꞌje, tuꞌnju ma ko ul oke cyxole. 4 Ma ko etz oke tuj Moab, cykꞌontze ambil keye tuꞌn kclonte kibe cyxole. Cyoque te colol kiꞌje cywitz keju in che cub byonte keye, che chi.Cbajel aju yajbil tucꞌix ju xitbil, che ajel meltzꞌaj ke xjal otok che oc tzokpaj tiꞌj txꞌotxꞌ lu. 5 Jun tiyjil David cꞌoquel te cawil; ccyuwsetel tcawbil ex ccawil tucꞌil xtalbil. Cꞌoquel te jwes in japunxix tuꞌn, cbel tkꞌoꞌn jun ley tuj tumelxix ex jurat naj cxel tbinchaꞌn cyiꞌj xjal.
6 Biꞌn kuꞌne aju cynimbil cyib aj Moab maꞌxix wen, nnoꞌc cykꞌon cyib te maꞌxix cyoclen ex jawni ke, pero nokx gan in baj cyyolin cyib. 7 Cyjaꞌtzun, cycyakil xjal najl tuj Moab che jawil okꞌ tiꞌj cytanmi; nimxix che bisul, ctzajel taꞌw tuj cyanmi cyiꞌj cyloꞌ twitz uva tzkijsamaj at tuj tnam Kir-hareset. 8 Ma che tzkij ke cojbil tuj tnam Hesbón cyucꞌix ke tkan uva tuj tnam Sibma, ma che baj naj cyuꞌn ke nejenel cye mastl nasyon. Ke cykꞌab tkan uva, ponin ke nej max tuj tnam Jazer, xiꞌynix tuj tzkij txꞌotxꞌ ex ponin baj tiꞌjxi mar. 9 Cyjaꞌtzun, in chin okꞌe cyiꞌj ke tkan uva tuj tnam Sibma, icx tzaꞌn in che okꞌ aj Jazer, ex nneꞌtz taꞌl nwitze cyiꞌje akeye aj Hesbón, ax icx cyiꞌje akeye aj Eleale, porque ke chmol twitz awal ya mintiꞌtl in che tzalaj. Ma jaw sichꞌ te kꞌoj tiꞌj twitz cyawale cyuꞌn aj kꞌoj. 10 Aju tzalajbil cbajel tucꞌix tkꞌajkꞌajel cywi xjal in jaw tuj cojbil; mlay che schꞌintl xjal tuꞌn tzalajbil ex mlay che bitzantl cyxol ke tkan uva, mlay tzꞌel cyyatzꞌoꞌntl taꞌl twitz uva tuꞌn tbantl vin tiꞌj. Mintiꞌtl in che schꞌin ke xjal yatzꞌol taꞌl twitz uva. 11 Nim in bisun wanmiye, mer ic tzaꞌn tkꞌajkꞌajel twiꞌ jun chnab bisbajilxix, in bisun cyiꞌj aj Moab ex tiꞌj tnam Kir-hareset. 12 Masque cheꞌx aj Moab cywiꞌ ke tal witz ex masque che sict oc cyoc ten cubsal cywitz ma chixin, ex masque cheꞌx tuj tja cydios tuꞌn cycubsan cywitz, pero nokx gan tcyakil jlu.
Tuj ox abkꞌi jaꞌlo, mlay tzicꞌ tibaj, cnajel aju toclen Moab maꞌxix, cyucꞌix cycyakil xjal ateꞌ tuj nim cyajlal; nok nicꞌxi che cyjel ankꞌin ex mintiꞌ cyipun.