Tuj junx konicꞌan ma naj tnam Ar tuj cytxꞌotxꞌ aj Moab, ex biꞌx ma baj xitj; tuj junx konicꞌan ma naj tnam Kir tuj cytxꞌotxꞌ aj Moab, ex biꞌx ma baj xitj. 2 Ke xjal tuj tnam Dibón ma che jax okꞌel tuj tja cydios, aju tcub twiꞌ tal witz. Ma che jaw okꞌ aj Moab tuꞌnju ma naj tnam Nebo, tucꞌix tnam Medeba. Cycyakil ma tzꞌel cꞌoꞌẍin tiꞌj cywiꞌ, ma tzꞌel matzoꞌn cyxmaltziꞌ. 3 In che bet xjal cyuj cay toc cyxbalun chꞌiꞌx twitz; in che schꞌin xjal cywi ja tuꞌn taꞌw cꞌixcꞌoj. Nimxix in che okꞌ cycyakil xjal cyuj plas. 4 Ke xjal tuj tnam Hesbón ex keju ateꞌ tuj tnam Eleale in che schꞌin wen; in binjtz tkꞌajkꞌajel cywiꞌ max tuj tnam Jahasa. Cyjaꞌtzun in tzaj baj cycꞌuꞌj ke xinak aj Moab, akeju elni ke twitz kꞌoj, ex nimxix cyxobil in tzaj. 5 In bisun wanmiye tiꞌj Moab; ke xjal najl tuj in che etz ok, in che pon max tuj tnam Zoar ex max tuj tnam Eglat-selisiya. In che okꞌ oc cyjaw twitz jawl tuj Luhit; tuj be in pon tuj tnam Horonaim in che schꞌin tuꞌn taꞌw cꞌixcꞌoj tuꞌnju xitbil otok tzaj cyibaj. 6 Ma che aj tzkij ke twi aꞌ tuj lugar Nimrim, ma tzkij chꞌim ex ma cub motxꞌj chaꞌx cꞌul, mintiꞌ jun t-xak tzeꞌ chaꞌx ma cyaj ten. 7 Cyjaꞌtzun in xi cyiꞌn xjal cykꞌinumabl aju otok jaw cychmoꞌn, xi cyiꞌn tiꞌjxi tkꞌab xak jatum ateꞌ ke tzeꞌ chjaj. 8 Aju tkꞌajkꞌajel cywi xjal in che schꞌin ma pon baj tuj tcyakil txꞌotxꞌ Moab; aju tkꞌajkꞌajel cywiꞌ te okꞌel ma pon baj max tuj tnam Eglaim ex max tuj tnam Beer-elim. 9 Masque che noj ke nima tuꞌn chicꞌ, akeju ateꞌ tuj tnam Dimón, pero ctzajel nsamaꞌne mastl mya baꞌn cyibaj aj Dimón; cxel nsamaꞌne jun balun tuꞌn t-xi chyonte cye keju otok che clet tuj Moab, cyucꞌix keju otok che cyaj ankꞌin tuj cytxꞌotxꞌ aj Moab.