Che ajetz meltzꞌaj aj Israel otok cheꞌx kꞌiꞌn najchak
14
Ctzajel kꞌakꞌan tcꞌuꞌj Kman cyiꞌj tiyjil Jacob. Che jawil t-scꞌoꞌn ke aj Israel juntl maj, che tzajel tiꞌn ke aj Israel tuꞌn cycub ten juntl maj tuj cytxꞌotxꞌ. Cꞌoquel cyjunin cyib stranjer xjal cyucꞌil ex che najal junx cyucꞌil tiyjil Jacob. 2 Che tzajel xjal cyuj txkantl nasyon tuꞌn cyonin cyiꞌj aj Israel tuꞌn cyul meltzꞌaj tuj cytanmi, ex ke xjal lu che oquel te cymajen aj Israel tuj txꞌotxꞌ etzan tuꞌn Kman. Ke xjal otok cheꞌx presinte cye aj Israel nej, ax icx cye che xel kꞌiꞌn pres cyuꞌn, ex che cawil aj Israel cyibaj keju otok che baj yajlante cye nej.Aju xmaybil tiꞌj cyrey aj Babilonia
3 Akeye aj Israel, tuj kꞌij oc tel tiꞌn Kman aju cꞌixbisabl cyeye tucꞌix cybise ex aju akꞌuntl cyuwxix cub kꞌoꞌn cyibaje jatum e tene te majen, 4 cxel cymaꞌne jun tkicꞌ yol lu te xmaybil tiꞌj cyrey aj Babilonia:
Cyqueꞌyinxe, matzun baj tipun aju cyuwxix cawin. Cyqueꞌyinxe, biꞌx ma naj toclen aju xjal puro jawni. 5 Tuꞌn Kman ma naj tipun aju binchal mya baꞌn, ma baj ttokin tvar ju rey cyuwxix cawin, 6 aju cub kꞌonte cycastiw ke nasyon tucꞌil tkꞌoj ex cucx in che baj tcꞌixbisaꞌn. Cub cyiꞌj ke nasyon tuꞌn tucꞌil ttxꞌuꞌjil, e baj tyajlaꞌn ex mintiꞌ tzaj tzꞌeꞌy tcꞌuꞌj cyiꞌj. 7 Tcyakil twitz txꞌotxꞌ tuj txubtxaj taꞌ, at tuj tzalajbil, ex in che schꞌin xjal tuꞌn tzalajbil. 8 Cyucꞌixpe ke tzaj ex ke wiꞌten ateꞌ twi witz Líbano in che tzalaj tiꞌj ju ma tzaj tiꞌja ex in cymaꞌn cyjaꞌ: Atxix tej tnaja, mi aꞌl juntl nnuꞌl txꞌemil keye, che chi. 9 Max cubni tuj cynajbil cyimni ma che jaw tilj ke cyimni ex in che etz cꞌmolte teya. Ma tzꞌel cywatl cyxlenꞌtz cyimni; cycyakil nejenel ateꞌ twitz txꞌotxꞌ nej, che eletz canul tiꞌja; cycyakil cyrey ke nasyon che jawil weꞌ tuj cykꞌukbil. 10 Cycyakil ke jlu che yolil ex cxel cymaꞌn teya cyjaꞌ: Ax icx teya ma naj tipuna, ma tzꞌoca ic tzaꞌn keye. 11 Max tzalu ma che naj ke tnimbil tiba ex tucꞌix cykꞌajkꞌajel ke arpa at tucꞌila. Coẍliya cyibaj ẍukꞌ, ex ẍukꞌ ma tzꞌajben te txaybil tibaja.
12 Tzaꞌn tten saj tzꞌaka twitz cyaꞌj, aya cheꞌw jakol t-xe cyaꞌj. Nej in cub cyiꞌj ke nasyon tuꞌna, atzun jaꞌlo ma cuꞌtz xoꞌna twitz txꞌotxꞌ. 13 Cub t-ximana tuj tanmiya cyjaꞌ: Chin jawixe max tuj cyaꞌj; cbel nkꞌoꞌne nkꞌukbile te cawbil max cyibaj ke cheꞌw etzan tuꞌn Dios; chin bel keꞌye max tuj tlugaril tbankꞌab kꞌij twi witz jatum nnoꞌc cychmon cyib ke dios. 14 Chin jawixe max cyibaj ke muj najchak cyjaw; chin oquele ic tzaꞌnx te Dios maꞌ toclen, chitzuna. 15 Atzun jaꞌlo ma cuꞌx xoꞌna tuj cynajbil cyimni max t-xeꞌpun jul jalo ponin t-xeꞌ. 16 Keju che queꞌyil teya ax cꞌoquel baj tbakꞌ cywitz tiꞌja, ex axix cꞌoquel cyqueꞌyin tiꞌja ex oc cymaꞌ cyjaꞌ: ¿Apetzunju xinak lu in tzaj luꞌlun twitz txꞌotxꞌ tuꞌn ex in che baj t-xitun ke nasyon, 17 aju oc kꞌonte tcyakil twitz txꞌotxꞌ te tzkij, aju o che baj xitj ke tnam tuꞌn ex mintiꞌ in cheꞌx ttzokpin ke pres? 18 Cycyakil ke rey o che ten cyuj nasyon in che ojlan tucꞌil nimbil cye, teylex te junjun tuj tex tpantyón, 19 atzun teya ma tzꞌex xoꞌna tiꞌjxi tpantyona, ic tzaꞌn nneꞌl icꞌun tkꞌab tzeꞌ tzkij, ic ma tzꞌoca ic tzaꞌn jun t-ximlal cyimni otok baj waban cyxol ke xjal in che cub byoꞌn tuꞌn spad; ma txi xoꞌna junx cyucꞌil tuj jul nojni tuj tuꞌn abj. 20 Mlay cuꞌx makuꞌna ic tzaꞌn ke mastl rey, porque tuꞌnxa ma naj ju txꞌotxꞌ jatum in cawina ex e cub tbyoꞌna ke xjal ateꞌ tuj ttanmiya. Te jumajx mlay che tzaj naꞌn cyiyjil ke xjal binchal mya baꞌn. 21 Cybincham cytene tuꞌn tcub cybyoꞌne ke tcꞌwaꞌl rey lu, tuꞌn tlaj nimxix mya baꞌn o cybincha ke cyxeꞌchel; tuꞌntzun miꞌn cyximan tiꞌj tuꞌn cycawin twitz txꞌotxꞌ, mi tuꞌn tnoj twitz txꞌotxꞌ cyuꞌn tnam cyuꞌn.
22 In tmaꞌn Kman cyjaꞌ, aju Tajaw Tcyakil: Chin jawil weꞌye kꞌojlel cyiꞌj, cnajel tbi Babilonia wuꞌne ex cyucꞌix ke xjal ateꞌx tuj, cyucꞌix cycꞌwaꞌl ex ke tal cychman. 23 Oc cꞌoquel wuꞌne te soban ex te cyja xitxꞌ. Cbajel ntzꞌisoꞌne tuꞌn tzꞌisbil te xitbil. Atzun jlu in tmaꞌn Kman aju Tajaw Tcyakil.
Cnajel tnam Asiria
24 Ate Kman aju Tajaw Tcyakil ma tma jun yol axix toc, chi cyjaꞌ: Ax toc cbantel aju ma cub nximane, cjapunel aju ma bant tiꞌj wuꞌne. 25 Che najel aj Asiria wuꞌne tuj txꞌotxꞌ etzan wuꞌne, cbajel nwabane cyximlal cywiꞌ ke witz etzan wuꞌne, cꞌelel wiꞌne ke cyyuw cycubsan cyibaj xjal etzan wuꞌne, tucꞌix ju iktz toc ttzal cyiꞌj. 26 Atzun nximbetze jlu cbantel wuꞌne tuj tcyakil twitz txꞌotxꞌ. Ma txi nnukpiꞌne nkꞌabe tuꞌn cynaj cycyakil nasyon wuꞌne, chi Kman. 27 Aju in cub t-ximan Kman aju Tajaw Tcyakil, mi jun xjal jacu tzꞌoc mayonte te tiꞌj. Ma txi tnukpiꞌn tkꞌab tuꞌn tcub cycastiw xjal, mi jun jacu tzꞌoc mayonte te.
Aju tkanil kꞌmanjtz tiꞌj ju attok ttzajel cyiꞌj aj Filistey
28 Atzun yol jlu tzaj tmaꞌn Kman te Isaías tuj abkꞌi tej tcyim rey Acaz.
29 Akeye aj Filistey, miꞌn che jaw tzalaje tuꞌnju o cub tokj ju var cub kꞌonte cycastiwoye, porque jatum etz ju lobaj nej, axtzun cꞌeletz jun kꞌantiꞌ, ex axtzun cꞌeletz jun lobaj baꞌn lipan twitz cyaꞌj. 30 Che waꞌl cyẍneꞌl ke xjal meba cyuj ke cojbil etzan wuꞌne, ke xjal mintiꞌ at cye che ojlal tuj txubtxaj. Atzun cyiyjile che cymel tuꞌn weꞌyaj wuꞌne ex keju otok che cyaj ten, che bel nbyoꞌne. 31 Che okꞌe akeye tnam cye aj Filistey, che schꞌine tuꞌn taꞌw cꞌixcꞌoj, che luꞌlune tuꞌn xobajil. Porque tuj txꞌotxꞌ tuj tbankꞌab kꞌij che tzajel txkan soldad ic cyten ic tzaꞌn txkan sib in bukin; txolin cyten cycyakil xinak ex mi jun in cyaj tjilin tib. 32 ¿Alcye tzakꞌwebl cxel kꞌot cye ke sanjel che tzajel samaꞌn tuj txꞌotxꞌ lu? Atzun jlu cxel kꞌmet cye: Tuꞌn Kman cub tbinchaꞌn tnam Sión, ex tuj tnam Sión che pol ke xjal ateꞌ tuj bis clolte cyib, akeju etzan tuꞌn.