2 Cykꞌon jawe jun bander twiꞌ jun witz tzꞌlaꞌj tiꞌj, te jun techal tiꞌj kꞌoj. Cykꞌonxe orden cye soldad tuꞌn cyoc tzokpaj kꞌojlel. Cykꞌoꞌn jaw cykꞌabe twitz cyaꞌj tuꞌn cyocx ttzi cyja ke xjal maꞌ cyoclen. 3 Ma che tzaj ntxcoꞌne ke soldad scꞌoꞌmaj wuꞌne, ma txi nkꞌoꞌne orden cye ke xinak elni ke twitz kꞌoj, akeju in che tzalaj tiꞌj cambabl wuꞌne, tuꞌntzun tcub cykꞌoꞌn cyibaj xjal aju castiw banimaj tiꞌj wuꞌne, chi Dios.

4 In binjtz jun tkꞌajkꞌajel cywiꞌyile witz mer ic tzaꞌn oc in che jaw schꞌin nim xjal. In binjtz tkꞌajkꞌajel nimcu nasyon ex ke tnam, akeju otok tzꞌoc cychmon cyib. Ate Kman aju Tajaw Tcyakil nnicꞌ twitz cyiꞌj ke t-soldad cykꞌon cyib tuꞌn cyxiꞌ tuj kꞌoj. 5 Che tzajel tuj txꞌotxꞌ najchak, max jatum ponin baj t-xe cyaꞌj. Tzul Kman cyucꞌix ke soldad che ajbel tuꞌn, tuꞌn tcub cycastiw xjal, tzul tuꞌn tnaj tcyakil twitz txꞌotxꞌ. 6 Che wuꞌyine tucꞌil bis, porque aju tkꞌijlalil tuꞌn tul Kman nika taꞌ, tzul tucꞌil jun xitbil, tuꞌnju at tipumal tuꞌn tbant tcyakil tuꞌn. 7 Cꞌelel bakchaj cykꞌab cycyakil xjal, cycyakil cꞌelel baj cyipun. 8 Ctzajel nim t-xobil cyiꞌj. Ctzajel jun bis cyibaj ex jun cꞌixcꞌoj maꞌxix, cjawil cyẍoquin cyiꞌj ic tzaꞌn jun xuꞌj oc nnuꞌl itzꞌj tal. Teyle junjun cbajel cyqueꞌyin tuj cywitz najni cynabl ex cjapunel tcyakal cywitz tuꞌn cychꞌixwi.

9 Ma pon tkꞌijlalil tuꞌn tul Kman, xobajilxix aju kꞌij lu, tzul tkꞌoj Kman ex maꞌxix ttxꞌuꞌjil, cꞌoquel ju txꞌotxꞌ tuꞌn te tzkij txꞌotxꞌ ex ke aj il ateꞌ twitz txꞌotxꞌ che najel tuꞌn. 10 Ke cheꞌw, cyucꞌix mastl cꞌloj cheꞌw ateꞌ twitz cyaꞌj, mlay che cꞌanttl; oc tjawil yecꞌun, biꞌx cꞌoquel klolj twitz ex miꞌn cꞌanttl xjaw.

11 Chi Kman in tmaꞌn cyjaꞌ: Cbel nkꞌoꞌne cycastiw xjal tuꞌn tlaj ju mya baꞌn in cybinchaꞌn, ax icx cye keju binchal mya baꞌn tuꞌn tlaj cyil. Cycyakil keju in jaw cyniman cyib che najel wuꞌne tuꞌnju nnoꞌc cykꞌon cyib te maꞌ cyoclen; te jumajx cꞌelel wiꞌne cyoclen keju in jaw cyniman cyib ex jawni ke. 12 Nicꞌxi xinak che cyjel ankꞌin wuꞌne; ic cybet cyjel ic tzaꞌn kꞌan pwak tbanilxix at tuj txꞌotxꞌ Ofir, mya nim at. 13 Ctzajel luꞌlun cyaꞌj wuꞌne ex cꞌicꞌel lakꞌeꞌ txꞌotxꞌ tuj tlugaril tuꞌn nkꞌoje ctzajel tuj kꞌij tzul, tuꞌnju ntxꞌuꞌjile maꞌxix wen.

14 Ic che oquel ke xjal ic tzaꞌn jun masat lajoꞌn cyuꞌn xjal, ex ka ic tzaꞌn txkan ẍneꞌl in che el sputj ex mi aꞌl jun cꞌoquel chmonte cye. Teyle junjun cꞌajel meltzꞌaj cyxol t-xjalil, teyle junjun cxel ok tuj ttanmi. 15 Cycyakil keju che cnetel, xayuꞌn che oquel tuꞌn cchil, cycyakil keju che tzyetel, che bel byoꞌn. 16 Ax cywitz che bajel pachꞌuꞌn keju tal cycꞌwaꞌl twitz txꞌotxꞌ; cꞌelex kꞌiꞌn tcyakil aju at tuj cyja, ex che bel xoꞌn ke cyxuꞌjil cyuꞌn xjal tuꞌn cyoc ten cyiꞌj. 17 Che tzajel wiꞌne ke xjal aj Media tuꞌn cyoc tzokpaj cyiꞌj; ke xjal lu mintiꞌ cyajbil tiꞌj sak pwak ex mintiꞌ in pon cycꞌuꞌj tiꞌj kꞌan pwak. 18 Ke cuꞌxun che najel tuꞌn cyplech. Mlay tzaj kꞌakꞌan cycꞌuꞌj cyiꞌj ke tal neꞌ ex mlay tzaj tzꞌeꞌy cycꞌuꞌj cyiꞌj ke tal cꞌwaꞌl. 19 Atzunte Babilonia, aju tnam tbanilxix cyxol ke nasyon, mer ic tzaꞌn jun adorn cye aj Caldey ex nim in che tzalaj tiꞌj, pero ic cyjel ic tzaꞌn cyaj tnam Sodoma ex Gomorra tej cynaj wuꞌne. 20 Te jumajx mlay che najantl xjal tuj. Mlay che pon aj Arabia najal tuj, mi ke pastor mlay txi cyiꞌn cyalun tuꞌn cycub ten waꞌl ma chixin. 21 Atzun che najal ma chixin ke jil tzajni tuj tzkij txꞌotxꞌ, cnojel cyuj ke ja cyuꞌn xitxꞌ ex che najal ke chyuꞌj avestrús tuj ttxꞌakan tnam, ax icx ke chip te tjakꞌ cꞌul che tꞌicjebil tuj. 22 Che wujwuꞌyil ke xoꞌj ex ke wech cyuj ke ja maꞌ cywaꞌl te cycolbil cyib xjal ex cyuj ke ja tbanilxix binchben cye. Chꞌix tpon or tuꞌn tnaj Babilonia; nok nicꞌxi kꞌij taj.