5 Cyjaꞌtzun tten xi cymaꞌn ke xjal maꞌ cyoclen ttxlaj rey Ezequías te Isaías. 6 Atzunte Isaías xi tcyuwsaꞌn cye tuꞌn t-xi cymaꞌn te cypatrón cyjaꞌ: Chi Kman cyjaꞌ: Miꞌn xoba cyuꞌn ke yol te xmaybil wiꞌje cyuꞌn ke tmajen rey te Asiria. 7 Bintza, cxel nkꞌoꞌne jun tkanil xobajilxix, ex tuꞌntzun jlu cꞌajel meltzꞌaj tuj ttanmi, ex axtzun cxel nmaꞌne tuꞌn tcub byoꞌn tuꞌn spad, chi Kman, che chicuye te Ezequías, chi Isaías, xi tmaꞌn cye.

8 Aju xjal maꞌ toclen tuj Asiria o tbi ka otok tzicꞌ ju rey te Asiria tuj tnam Laquis. Icꞌtzun tuj Jerusalén ex oc noj tiꞌj ju rey te Asiria in kꞌojintok cyiꞌj aj Libna. 9 O tbi rey te Asiria tiꞌj rey Tirhaca, aju rey te Etiopía, otok tzꞌetz cyucꞌil txkan t-soldad tuꞌn tkꞌojin tiꞌj. Xi t-samaꞌn juntl maj ju rey te Asiria ke t-sanjel tuꞌn cyxiꞌ tucꞌil Ezequías tuj Judá ex tuꞌn t-xi cymaꞌn te cyjaꞌ: 10 Aju Tdiosa nnoꞌc keꞌ tcꞌuꞌja tiꞌj in tcyuwsaꞌn teya ka mlay cub tiꞌj Jerusalén wuꞌne, pero miꞌn txi tkꞌoꞌna ambil te tuꞌn tcub sbuꞌna tuꞌn. 11 O tbiya aju o cybincha ke rey te Asiria cyiꞌj cycyakil tnam akeju e baj naj cyuꞌn. ¿Yajtzun teya ocpetzun cletela? 12 ¿Opetzun che clet mastl tnam cyuꞌn cydios, akeju tnam cub cyxitun ke ktzan nxeꞌchele, ic tzaꞌn ju tnam Gozán, ju tnam Harán, ju tnam Resef ex ke xjal aj Bet-edén, akeju e najan tuj lugar Telasar? 13 ¿Jatum ateꞌ ke rey te tnam Hamat, te tnam Arfad, te tnam Sefarvaim, te tnam Hena ex te tnam Iva? Che chi ke sanjel.

14 Xitzun tiꞌn Ezequías aju uꞌj xi kꞌoꞌn te cyuꞌn ke sanjel ex jaw t-schꞌiꞌn, ex xiꞌ tuj tja Dios, cub tlicꞌbaꞌn aju uꞌj twitz Kman, 15 ex oc ten naꞌl Dios cyjaꞌ: 16 Nman, aya Tajaw Tcyakil, aya Cydios aj Israel, tcubsaꞌn tkꞌukbila cyibaj querubín, oꞌcx aya Dios in cawina cyibaj cycyakil cawbil tuj tcyakil twitz txꞌotxꞌ; aya o binchante cyaꞌj ex txꞌotxꞌ. 17 Nman, kꞌonca cwent tiꞌj ex bintza. Queꞌyintza ex bintza tcyakil tyol Senaquerib ma tzul t-samaꞌn wucꞌile, cycyakil ke yol lu ma tma te xmaybil tiꞌja, aya Dios itzꞌ. 18 Nman, ax toc ke rey cye aj Asiria o baj cyxitun cycyakil nasyon tucꞌix cytxꞌotxꞌ, 19 ex ke cydios xjal o tzꞌocx cypatun tuj kꞌakꞌ, porque ax toc mya Dios ke jlu, nok oꞌcx binchamaj ke cyuꞌn xjal tiꞌj tzeꞌ ex tiꞌj abj, cyjaꞌtzun e baj naj cyuꞌn. 20 Jaꞌlotzun Kman aya Kdiose, ko tcloma tuj tkꞌab tuꞌntzun tel cynicꞌ cycyakil nasyon twitz txꞌotxꞌ tiꞌja, ka aya Kman ex ka oꞌcxcu aya jun Dios.

21 Xitzun t-samaꞌn Isaías tkanil te Ezequías chi cyjaꞌ: Atzun jlu ma tma Kman aju Cydios aj Israel: Ma nbiye aju tnaꞌj Diosa tiꞌj Senaquerib aju rey te Asiria, chi Dios.

22 Atzun ke yol lu ma tma Kman tiꞌj rey te Asiria:

Aju tnam Sión ic tten ic tzaꞌn jun tal kꞌapoj in tzeꞌn tiꞌja, aya Senaquerib. Aju tnam Jerusalén cxel tyucun twiꞌ te xmaybil oc tel oka. 23 ¿Alcye ma tzꞌoc ticꞌleꞌna ex ma xmayina tiꞌj? ¿Al iꞌj xjaw tkꞌajkꞌajel twiꞌya cyuwxix wen ex al iꞌj xjaw pacꞌeꞌ twitza twitz cyaꞌj te tnimbil tiba? Tiꞌj Dios Xjan cye aj Israel ma tbinchaya jlu. 24 E tzaj t-samaꞌna ke t-sanjela tuꞌn cyyolin mya baꞌn tiꞌj Dios. Tmaya cyjaꞌ: Cyucꞌil nim cyajlal ncarwaje te kꞌojbil in jaxe tuj tiwitz txꞌotxꞌ cywiꞌ ke witz ex in exe cyjakꞌ ke tzeꞌ cwest tuꞌn kex cyxol cywiꞌ ke witz Líbano. E jaw ntxꞌemine ke tzeꞌ wiꞌten akeju mas ma tij cywaꞌl, cyucꞌix ke tzaj puro mejorxix ke. In japun canune max cywiꞌ ke nmak witz tuj tiwitz txꞌotxꞌ ex in pone tjakꞌ txkan tzeꞌ ic queꞌyin tjakꞌ ic tzaꞌn tkan awal tbanilxix. 25 Cyuj ke txꞌotxꞌ mintiꞌ ojtzkiꞌn wuꞌne, cuꞌx nlacuꞌne ke jul tuꞌn tcnet aꞌ ex in cꞌane cyiꞌj ke aꞌ lu; cycyakil ke nima tuj Ejipt e baj tzkij tjakꞌ nkane. 26 ¿Naꞌnxpetzun tel tnicꞌa tiꞌj ka akine Dios ex akine in binchante tcyakil jlu? Atxix tuj tkꞌijlalil ojtxi baj nnacꞌuꞌne tiꞌj ex ma binchet wuꞌne jaꞌlo, cyjaꞌtzun in che cub t-xituna ke tnam toc muro cyiꞌj ex nok ttxꞌakan in che cyaj ten tuj byujin tuꞌna. 27 Akeju najlke cyuj mintiꞌ cyipun, tzaj nim cyxobil ex cychꞌixwi, ic e oc ic tzaꞌn cꞌul tuj cojbil ex ic tzaꞌn chaꞌx cꞌul, ex ic e oc ic tzaꞌn cꞌul in tzaj chꞌiy twi ja ex in naj tuꞌn taꞌw cyak in tzaj tikan cykꞌikꞌ tuj tjawitz kꞌij. 28 Baꞌn wuꞌne tiꞌj tcyakilju in bant tuꞌna; baꞌn wuꞌne oc texa betel ex oc tul meltzꞌaja; ex baꞌn wuꞌne ma tzaj tkꞌoja wiꞌje. 29 Ex tuꞌnju ma wile aju tkꞌoja ex aju tnimbil tiba, cꞌoquex nkꞌoꞌne jun argoy twi ttxaꞌna ex cꞌoquex nkꞌoꞌne jun pren tuj ttziꞌya, ex tuꞌntzun jlu cꞌajel meltzꞌaja wuꞌne tuj tbeya jatum otok tzaja, chi Dios baj tmaꞌn te Senaquerib.

30 Xi tmaꞌn Isaías te Ezequías cyjaꞌ: Atzun jlu cꞌajbel te jun techal tiꞌj ju cbajel: Tuj abkꞌi lu, icx tuj juntl abkꞌi, che waꞌle tiꞌj twitz triw aju tajx cjawil pokꞌl, pero tuj toxin abkꞌi che awale ex cjawil cychmoꞌne twitz, che awale tiꞌj tkan uva ex che loꞌle tiꞌj twitz. 31 Ke xjal che cyjel ankꞌin tuj Judá ic che oquel ic tzaꞌn tkan awal; cxeꞌl cylocꞌ ex cꞌelel cywitz, 32 porque nok junjun cyjel ten tuj Jerusalén, ax icx twi witz Sión che cyjel ankꞌin junjun. A jlu cbantel tuꞌn Kman aju Tajaw Tcyakil, tuꞌnju at nimxix tcꞌujlalil cyiꞌj.

33 Atzun tiꞌj ju rey cye aj Asiria in tmaꞌn Kman cyjaꞌ: Mlayx tzꞌocx tuj Jerusalén, mlayx cheꞌx t-xoꞌn ke plech tiꞌj, mlayx tzꞌoc tzokpaj tiꞌj cyucꞌil ke tmakbil in che ajben tuj kꞌoj, mi tuꞌn toc cyjoquin txꞌotxꞌ tiꞌjele muro tuꞌn cyjax tiꞌj ex tuꞌn cyocx tujxi tnam. 34 Tujx ju be jatum otok tzaj bet, ax cꞌajel meltzꞌaj juntl maj; mlay tzꞌocx tuj tnam lu. A kine Dios ma chin kꞌmante ju yol lu. 35 A kine chin colol tiꞌj tnam lu ex ccletel wuꞌne, nok tuꞌn tlaj ju yol xi ntziyane te nmajene David ex tuꞌn tjaw nimsaꞌn nbiye, chi Dios.

36 Xiꞌtzun t-anjel Kman ex e cub tbyoꞌn 185,000 mil soldad aj Asiria jatum cycubsaꞌn ke tuj campament, ex cycyakil ke jlu cyimni ke tej cyskix te juntl kꞌij. 37 Atzunte Senaquerib aju rey cye aj Asiria, cub be tuꞌn, aj meltzꞌaj tuj tnam Nínive ex ax o najan tuj. 38 At jun kꞌij, tej matok in cꞌulun Senaquerib tuj tja tdios Nisroc tbi, e pon Adramelec tucꞌix Sarezer akeju tcyꞌajalx, ex cub cybyoꞌn tuꞌn spad, ex atzun e pon ok t-xe witz Ararat. Te tibajxitzun jlu, aju cyaj ten te rey te t-xel Senaquerib, atzun Esarhadón aju tcyꞌajalx.