Tej tcawin Manasés tuj Judá
21
Toctok Manasés twiꞌ cablaj abkꞌi tej toc te rey ex o cawin 55 abkꞌi tuj Jerusalén. Aju ttxuꞌ Manasés Hepsiba tbi. 2 Pero mya baꞌn e ela ke tbinchben tuj twitz Kman, porque o tbincha axju mya baꞌn in cybinchaꞌntok ke nasyon otok che ex tlajoꞌn Kman cywitz aj Israel. 3 E jaw tbinchaꞌn juntl maj ke ja te cycꞌulbil xjal cywiꞌ ke witz, akeju otok che cub t-xitun Ezequías aju ktzan tman; e jaw tbinchaꞌn ke altar twitz tilbilal Baal, ex cub tbinchaꞌn jun tilbilal xuꞌj dios Asera, ic tzaꞌn o tbincha Acab aju rey cye aj Israel; ax icx o cꞌulun twitz kꞌij, twitz xjaw ex cywitz cycyakil cheꞌw. 4 Ex e jaw tbinchaꞌn ke altar tuj tja Kman, jatum otok tma Kman ka atzun tuꞌn ttzaj naꞌn tbi te jumajx tuj Jerusalén. 5 Jaw tbinchaꞌn txkantl altar tuj tnejel ex tuj tcabin ttxaꞌn tpeꞌn tja Kman, ex e ajben tuꞌn tuꞌn cycꞌulun xjal twitz kꞌij, twitz xjaw ex cywitz cycyakil cheꞌw.6 Ax icx cub tpatun tcꞌwaꞌl te chojbil, o xnakꞌtzan tiꞌj tuꞌn tbant tkꞌijin ex tuꞌn cytxquet cyanmi cyimni tuꞌn, ex e oc tkꞌoꞌn ke xjal spiritist ex ke xjal baꞌn che cyꞌaꞌn tuꞌn cyten cyxol xjal. Jumajx mya baꞌn e ela ke tbinchben tuj twitz Kman, ex tuꞌn jlu tzaj tkꞌoj Kman tiꞌj. 7 Ax icx ocx tkꞌoꞌn tuj tja Dios jun tilbilal xuꞌj dios Asera, aju baj tbinchaꞌn. Ex otok tma Dios te David ex te Salomón aju tcyꞌajal cyjaꞌ: Aju tja Dios at tuj Jerusalén, aju tnam o jaw nscꞌoꞌne cyxol cycyakil cꞌloj cyiyjil aj Israel, atzun ctzajel naꞌn nbiye tuj te jumajx. 8 Mlay che ex nlajoꞌntle ke aj Israel tuj txꞌotxꞌ xi nkꞌoꞌne cye ke cyxeꞌchel ka ma che japun nleye cyuꞌn, ex ka ma cybincha tcyakil aju o txi nmaꞌne cye, ex ka ma japun cycyakil nxnakꞌtzbile cyuꞌn, aju xi tmaꞌn nmajene Moisés cye, chi Dios.
9 Atzun cye mintiꞌ xi cybiꞌn. A Manasés xi kꞌinte cye tuj be mya baꞌn, ex mas nim mya baꞌn o cybincha ic tzaꞌn in cybinchaꞌntok ke nasyon otok che naj tuꞌn Kman cywitz. 10 Cyjaꞌtzun tzaj yolin Kman cyucꞌil ke t-sanjel, akeju tmajen, chi cyjaꞌ: 11 Ma tbincha Manasés nimcu mya baꞌn, mas nimxix mya baꞌn ma tbincha ic tzaꞌn in cybinchaꞌn aj Amorrey, akeju ateꞌtok tuj txꞌotxꞌ nej. Ex tuꞌn Manasés ma che binchan aj Judá il, tuꞌnju ma che oc ten cꞌulul cywitz tilbilal cydios xjal. 12 Tuꞌntzun jlu, akine Cymane, aju Cydios aj Israel, in chin kꞌmante jlu: Ctzajel wiꞌne mya baꞌn cyibaj aj Jerusalén ex cyibaj aj Judá, ocxi tel twinkil cyẍcyin keju che bil tiꞌj. 13 Cbel nxitune tnam Jerusalén ic tzaꞌn o tenba tnam Samaria wuꞌne, ex biꞌx che najel ke aj Jerusalén wuꞌne, ic tzaꞌn o tenba Acab wuꞌne cyucꞌix ke tiyjil. Cyjel ten tnam Jerusalén misicyer jun xjal tuj, ic tzaꞌn in baj txꞌjet jun plat, nneꞌl suꞌt aꞌ tiꞌj ex in cub mutzbat. 14 Atzun chꞌintl tnam xjal etzan wuꞌne, che cyjel ncoline ex che xel nkꞌoꞌne tuj cykꞌab ke aj kꞌoj cyiꞌj, tuꞌntzun tel kꞌiꞌn tcyakilju at cye ex tuꞌn tcub cyiꞌj cyuꞌn. 15 Porque aju cybinchben puro mya baꞌn ma tzꞌel tuj nwitze, ex cucx in tzaj nkꞌoje cyuꞌn, atxix tuj kꞌij tej cyetz wiꞌne ke cyxeꞌchel tuj Ejipt ex cucx jaꞌlo, chi Dios.
16 Tuꞌn cylaj ke il tbincha Manasés, cyjaꞌtzun e binchan ke aj Judá il tuꞌn. Tuꞌntzun jlu, jumajx mya baꞌn e ela ke cybinchben tuj twitz Kman. Mya oꞌcx jlu, ax icx e cub tbyoꞌn Manasés nimcu xjal mintiꞌ cyil tuj Jerusalén, ex o noj enter tnam Jerusalén tuꞌn cychcꞌel xjal. 17 Aju chꞌintl txꞌolbaben tiꞌj Manasés ex tiꞌj tcyakilju o tbincha, cyucꞌix ke il e bant tuꞌn, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Judá. 18 Tejtzun tcyim, cuꞌx makuꞌn t-xol tkan awal te tja rey, aju tkan tawal Uza. Te tibajxi aju o cawin te t-xel, atzun Amón aju tcyꞌajal.
Tej tcawin Amón tuj Judá
19 Toctok Amón twiꞌ 22 abkꞌi tej toc te rey, ex o cawin cabe abkꞌi tuj Jerusalén. Aju ttxuꞌ Amón Mesulemet tbi, aju aj Jotba, ex tmeꞌjel Haruz. 20 Pero jumajx mya baꞌn e ela ke tbinchben tuj twitz Kman, ic tzaꞌnx ke tbinchben Manasés aju ktzan tman, 21 porque xi lpeꞌ tiꞌj mya baꞌn tbincha ktzan tman, ex o cꞌulun cywitz ke tilbilal akeju otok cꞌulun ktzan tman cywitz. 22 Cyjaꞌtzun cyaj tcolin Amón Kman, aju Cydios ktzan t-xeꞌchel, ex mintiꞌ xi tniman tyol.
23 Ke xjal at cyoclen ttxlaj jaw cyiꞌn cyib tiꞌj ex cub cybyoꞌn tuj tja, aju tja rey. 24 Pero ke tnam xjal e cub cybyoꞌn keju otok che cub byonte te rey Amón, ex oc cykꞌoꞌn Josías aju tcyꞌajal, te rey.