Cub ticꞌsaꞌn Josías Xjan Kꞌij
35
Cub ticꞌsaꞌn Josías Xjan Kꞌij tuj Jerusalén te nimbil te Kman. Cub cybyoꞌn ju tal ẍneꞌl tuj tcyajlajin kꞌij tuj tnejel xjaw te abkꞌi tuꞌn ticꞌset ninkꞌij. 2 Ax icx e oc tkꞌoꞌn ke pal tiꞌj cyakꞌun ex xi tcyuwsaꞌn cye tuꞌn cyakꞌnan tiꞌj cyakꞌun tuj tja Dios. 3 Ax icx xi tmaꞌn cye aj Leví, akeju xnakꞌtzaltok cye cycyakil aj Israel ex xjansaꞌmajtok ke tuꞌn cyajben te Kman, chi cyjaꞌ: Cykꞌoꞌncxe aju cax cꞌubl tley Dios tuj tja Dios, aju jaw tbinchaꞌn Salomón aju tcyꞌajal David ex rey cye aj Israel, ex miꞌn tzicꞌ cylakꞌbaꞌntle. Jaꞌlo cykꞌonx cyibe tuꞌn cyajbene te Kman aju Cydiose, ex Cydios aj Israel aju tnam etzan tuꞌn. 4 Cybinchan baj cytene tuj cꞌlojin, teylex te junjun tiyjil, ic tzaꞌnx cyaj ttzꞌiban David aju rey cye aj Israel, tucꞌix Salomón aju tcyꞌajal. 5 Che tencje tuj tja Dios tuj cꞌlojin cytene, akeye aj Leví, teylex te junjun cꞌloj tiyjil, ex che oque te nejenel cyxol junjun cꞌloj aj Israel akeju cyermaniye. 6 Cybyoncuye tal ẍneꞌl aju in cub byet tuj Xjan Kꞌij, cyxjansam cyibe ex cybinchame tten tal ẍneꞌl, tuꞌntzun tjapun cyuꞌn ke cyermaniye aju tzaj tmaꞌn Kman te Moisés.7 Atzunte Josías, cyxol tex talun, e jeꞌx tkꞌoꞌn ke tal tman ẍneꞌl ex ke tal tman chip, 30 mil tuꞌn tcyakil, ex tucꞌix ox mil wacẍ. Xi tkꞌoꞌn jlu cye cycyakil tnam xjal, akeju ateꞌtok tucꞌil, tuꞌn tcub icꞌset Xjan Kꞌij. 8 Ax icx ke xjal maꞌ cyoclen ttxlaj rey xi cykꞌoꞌn ke oyaj tuꞌn cyex cygan cye tnam xjal, cye pal ex cye aj Leví. Atzunte Hilcías tucꞌix Zacarías ex Jehiel, akeju nejenel tuj tja Dios, xi cykꞌoꞌn cab mil tucꞌil kak syent ẍneꞌl cye ke pal, tucꞌix ox syent wacẍ, tuꞌn tcub cyicꞌsaꞌn Xjan Kꞌij. 9 Ax icx tbincha Conanías tucꞌix Semaías ex Natanael, akeju terman, ax icx cybincha Hasabías, Jehiel ex Josabad, akeju nejenel cye aj Leví. Ake jlu xi cykꞌoꞌn jweꞌ mil ẍneꞌl ex jweꞌ syent wacẍ cye aj Leví tuꞌn tcub cyicꞌsaꞌn Xjan Kꞌij.
10 Tej tbant tten tcyakil tuꞌn ticꞌset ninkꞌij, e cubtzun ten ke pal tuj cylugar ex baj cypaꞌn cyib ke aj Leví tuj cꞌlojin ic tzaꞌnx otok tma rey. 11 Cubtzun cybyoꞌn aj Leví ke alumaj tuj Xjan Kꞌij ex el cyiꞌn cytzꞌumal, atzun cye pal xi cytxꞌitpuꞌn chicꞌ tibaj altar, aju chicꞌ xi kꞌoꞌn cye cyuꞌn aj Leví. 12 Te tibajxi el cypaꞌn tcyakil aju at tuꞌn tcub patit tuꞌn tajben cye junjun cꞌloj cyiyjil tnam xjal, tuꞌn t-xi cykꞌoꞌn te Kman, ic tzaꞌnx tzꞌibamaj tuj libro cyaj ttzꞌiban Moisés; ax icx cybincha cyiꞌj ke wacẍ. 13 Ex e oc ten txoꞌlte cychibjal tal ẍneꞌl twitz kꞌakꞌ, tuꞌn ticꞌset Xjan Kꞌij ic tzaꞌnx in tmaꞌn ley, ex atzun ke txkantl oyaj xjan jax cytxcoꞌn cyuj ke cꞌil matij, ex cyuj ke cꞌil chꞌin ex cyuj ke sartén, ex jurattzun baj cysipan cyxol cycyakil tnam xjal. 14 E octzun ten aj Leví binchalte aju cyex cychiꞌ tucꞌix cychiꞌ pal tuꞌnju cucxtok cyakꞌnan ke pal akeju tiyjil Aarón, tej ttzaj konicꞌan in che kꞌoꞌntok ke oyaj patun in che cub tucꞌix cysebyil alumaj. Cyjaꞌtzun baj cybinchaꞌn aj Leví aju cyex cychiꞌ tucꞌix cye ke pal, akeju tiyjil Aarón.
15 Ax icx ke bitzal akeju tiyjil Asaf ateꞌtok tuj cyakꞌun ic tzaꞌnx banimaj tuꞌn David, tuꞌn Asaf, tuꞌn Hemán ex tuꞌn Jedutún aju baꞌn nabin tuꞌn Dios, aju o ten tucꞌil David. Ke xkꞌukil cytzi ja mintiꞌ cyaj cycolin cyakꞌun; ax ke aj Leví akeju cyucꞌil, e baj binchante cychiꞌ.
16 Cyjaꞌtzun tten baj nucꞌet tiꞌj tcyakil takꞌun Kman tuj kꞌij tuꞌn ticꞌset Xjan Kꞌij ex tuꞌn cyxi kꞌot ke oyaj patun in che cub tibaj altar te Kman, ic tzaꞌnx otok tma rey Josías. 17 Ke aj Israel ateꞌtok ma chixin cub cyicꞌsaꞌn Xjan Kꞌij tuj tkꞌijlalil lu, tucꞌix wuk kꞌij ninkꞌij tuꞌn cywaꞌn tiꞌj pan mintiꞌ t-samel tuj tuꞌn tjaw mal tcꞌuꞌj. 18 Bajxtok cub icꞌsaꞌn jun maj Xjan Kꞌij ic tzaꞌn jlu cyxol aj Israel atxix tuj tkꞌijlalil Samuel aju t-sanjel Dios; mi jun cye ke rey e ten cyxol aj Israel cub ticꞌsaꞌn Xjan Kꞌij ic tzaꞌnju cub ticꞌsaꞌn Josías, cyucꞌil ke pal, ke aj Leví, ke xjal aj Judá ex aj Israel ateꞌtok ma chixin, cyucꞌix keju najlke tuj Jerusalén. 19 Otok bant wajxaklaj abkꞌi toclen Josías te rey tej tcub ticꞌsaꞌn Xjan Kꞌij lu.
Aju tcyimlen Josías
20 Otok tzꞌel nim kꞌij tbajlen tbinchaꞌn Josías tja Dios, cyjaꞌ t-xiꞌtok Necao aju rey cye aj Ejipt ttzi nima Éufrates, tuꞌntzun toc kꞌoj tuꞌn tuj tnam Carquemis. Etztzun Josías tuꞌn tkꞌojin tiꞌj. 21 Atzunte Necao e jeꞌx t-samaꞌn ke t-sanjel kꞌmalte te Josías cyjaꞌ: Aya rey cye aj Judá miꞌn labta wiꞌje. Mya tiꞌja ma chin tzaje kꞌojlel, nok oꞌcx tiꞌj juntl nasyon aju in chin kꞌojine tucꞌil. Ate Dios ma kꞌmante weye tuꞌn nxiꞌ naje; cyjaꞌtzun miꞌn tzicꞌ nej t-rasona twitz Dios aju at wucꞌile, tuꞌntzun miꞌn tnaja tuꞌn, chi Necao.
22 Atzunte Josías mintiꞌ xi tniman, nok oꞌcx el tchꞌexpuꞌn t-xbalun tuꞌn miꞌn tel nicꞌbaj tiꞌj, ex oc tilil tuꞌn tuꞌn tkꞌojin tiꞌj Necao; mintiꞌ xi tbiꞌn aju otok tma Necao te, ex a jlu tuꞌn Dios bant icju. Cyjaꞌtzun tzyet kꞌoj tuꞌn tuj chkꞌajlaj Meguido. 23 Ke xjal xoꞌl plech xi cyxoꞌn plech tiꞌj rey Josías ex biꞌx aꞌw cyuꞌn. Xitzun tmaꞌn rey cye ke xjal maꞌ cyoclen ttxlaj: Chin cyiꞌmexe tzalu, porque nim weye ma tzaꞌw. 24 Ke xjal maꞌ cyoclen ttxlaj etz cyiꞌn tuj carwaj jatum tocxtok, ocx cykꞌoꞌn tuj tcabin tcarwaj, xi cyiꞌn tuj Jerusalén, ex atzun cyim. Ocx cymakuꞌn tuj tpantyón cyxol ktzan t-xeꞌchel, ex cycyakil aj Judá ex aj Jerusalén e okꞌ tiꞌj tcyimlen Josías. 25 O bant jun bitz te bis tuꞌn Jeremías te nimbil te Josías. Cucx jaꞌlo cycyakil ke xinak ex ke xuꞌj baꞌn che bitzan in tzaj cynaꞌn Josías tuj cybitz te bis. Ke bitz lu cucx ttzaj cynaꞌn aj Israel ex tzꞌiban ke tuj libro te okꞌelbil.