Txquet Ezequiel tuꞌn Dios
2
Ex o nbiye jun tkꞌajkꞌajel wibaj 1 in tmaꞌn weꞌye cyjaꞌ: Aya xjal, weꞌctza, porque chin yolile tucꞌila. 2 Tej matok in yolin wucꞌile o ncꞌame tipumal Dios ex in jaw wabane tuꞌn. Ex o nbiye tkꞌajkꞌajel wibaj in yolin wucꞌile, 3 ex tma juntl maj weye: Aya xjal, cxel nsamaꞌne cyxol aj Israel miban che bin ex ma jaw cyiꞌn cyib tuꞌn cykꞌojin wiꞌje. Ma jaw cyiꞌn cyib tuꞌn cykꞌojin wiꞌje ic tzaꞌn o bant cyuꞌn cyxeꞌchel, ex cucx cykꞌojin jaꞌlo. 4 Ke xjal lu cyuw cywiꞌ ex cyuw cyanmi. Cxel nsamaꞌne cyucꞌil tuꞌn t-xi tmaꞌna cye cyjaꞌ: Atzun jlu in tmaꞌn Kman. 5 Ka xi biꞌna cyuꞌn ex ka miꞌn, pero cꞌelel cynicꞌ tiꞌj, at jun t-sanjel Dios cyxol, porque ke xjal lu jumajx miban che bin.6 Aya xjal, miꞌn tzaj t-xobila cywitz ex mi tiꞌj ju oc cymaꞌ teya, masque oc tnaꞌya mer ic tzaꞌn tocxa tuj txkan chꞌiꞌx, ex mer ic tzaꞌn najla cyxol txkan siꞌnin. Miꞌn tzaj t-xobila tuꞌn cyyol oc cymaꞌ teya, ex miꞌn jaw secꞌpaja cywitz, masque jumajx miban che bin. 7 Kꞌmanxa nyole cye ka xi biꞌna cyuꞌn ex ka miꞌn, porque ke xjal lu jumajx miban che bin. 8 Kꞌontz twiꞌya tiꞌj nyole cxel nmaꞌne teya, ex miꞌn tzꞌoca miban bina ic tzaꞌn cye. Cꞌabinx tuj ttziꞌya ex waꞌnxa aju cxel nkꞌoꞌne teya, chi Kman, tzaj tmaꞌn weye.