2 Xitzun ncꞌabine tuj ntziꞌye, tzaj tmaꞌn weye tuꞌn t-xi nwaꞌne ju uꞌj tzꞌiban yol twitz, 3 ex tma cyjaꞌ: Balkꞌunxtzuna jaꞌlo aju uꞌj ma txi nkꞌoꞌne teya, aju tzꞌiban yol twitz, ex e tnoj tcꞌuꞌja tuꞌn, chi tzaj tmaꞌn weye. Xitzun nwaꞌne, ex o nnaꞌye puro chiꞌ wen ic tzaꞌn taꞌl cab.

4 Ex tmatl weye cyjaꞌ: Txiꞌya, ex kꞌmanxa cye aj Israel aju yol cxel nmaꞌne cye. 5 Mintiꞌ in xi nsamaꞌna tuj jun tnam jatum junxitl yol in che yolin xjal tiꞌj ex cyuw tuꞌn tel tnicꞌa tiꞌj, ax cyxol aj Israel cxel nsamaꞌna. 6 Mintiꞌ in xi nsamaꞌna cyuj txkantl nasyon, akeju junxitl txcaj yol in che yolin tiꞌj, ex ka cyuw te teya tuꞌn tel tnicꞌa tiꞌj. Nokwit a xi nsamaꞌna cyuj ke tnam lu, jacu txi biꞌn tyola cyuꞌn. 7 Atzun cye aj Israel, baka cxel cybiꞌn tyola, porque mi cyaj tuꞌn t-xi cybiꞌn aju weye nyol. Cycyakil aj Israel cyuw cywiꞌ ex cyuw cyanmi. 8 Pero ax icx teya cꞌoquela cyuw wen wuꞌne ic tzaꞌn cye. 9 Cꞌoquela cyuw wen wuꞌne, ic tzaꞌn jun tbanil abj diamante tbi mas cyuw cywitz ke mastl abj. Miꞌn xoba cywitz, ex miꞌn jaw secꞌpaja cywitz masque jumajx miban che biꞌn.

10 Ex tmatl weye cyjaꞌ: Kꞌontzxix twiꞌya tiꞌj ju yol cxel nmaꞌne teya, ex biꞌx kꞌon cyaja tuj tnabla. 11 Txiꞌya queꞌyil cye ke t-xjalila o che ul kꞌiꞌn tzalu, ka xi biꞌn tyola cyuꞌn ex ka miꞌn, pero kꞌmanxa cye cyjaꞌ: Atzun jlu in tmaꞌn Kman, chicuya, chi tzaj tmaꞌn weye.

12 In jawtzun kꞌiꞌne tuꞌn tipumal Dios, ex o nbiye jun tkꞌajkꞌajel ma wiꞌjxiye in jululun wen ex in tmaꞌn cyjaꞌ: Nimanxwit tajwalil Kman tujx tlugar. 13 Aju tkꞌajkꞌajel o nbiye, atzun tkꞌajkꞌajel cyxicꞌ ke jil oc in pon jukl te jun tiꞌj te juntl, ax icx cykꞌajkꞌajel ke rwed junx ateꞌ cyucꞌil; aju tkꞌajkꞌajel in jululun wen. 14 In jawtzun kꞌiꞌne tuꞌn tipumal Dios ex in etz kꞌiꞌne tuj lugar lu, cubtzun be wuꞌne, tzaj taꞌw tuj wanmiye, ex tzaj tloꞌch ncꞌuꞌje tuꞌnju tzyuꞌn kine cyuw wen tuꞌn tkꞌab Kman. 15 Ex in pone tuj tnam Tel Abib ttzi nima Quebar, jatum najl ke aj Israel otok che pon kꞌiꞌn tuj Babilonia, in cub keꞌye cyxol, ex wuk kꞌij in tene cyucꞌil mintiꞌ baꞌn wuꞌne alcye tuꞌn tbant, ex alcye yol tuꞌn t-xi nmaꞌne cye.

16 Tbajlenxi wuk kꞌij lu tzaj yolin Kman wucꞌile ex tma cyjaꞌ: 17 Aya xjal, ma tzꞌoc nkꞌoꞌne te xkꞌukil cye aj Israel. Oc t-xi nmaꞌne jun yol teya, il tiꞌj tuꞌn t-xi tmaꞌna cye xjal te nxele, tuꞌn cybinte alcye ctzajel cyiꞌj. 18 Ka ma txi nmaꞌne tuꞌn tcub t-sentens jun xjal binchal mya baꞌn tuꞌn tcyim; ex ka ma miꞌn yolina tucꞌil, ex ka miꞌn ma txi tmaꞌna tuꞌn tcyaj tcolin tmod mya baꞌn tuꞌntzun cucx tankꞌin, ax toc cymel xjal lu tuꞌn tlaj til, atzun teya oc tkꞌaꞌya tajlal weye tiꞌj tcamic xjal. 19 Katzun ma txi tmaꞌna teju xjal binchal mya baꞌn, ex ka ax te xjal mintiꞌ ma txi tcolin tuꞌn tbinchante mya baꞌn ex mintiꞌ ma chꞌexpet tmod mya baꞌn, ax toc cymel te xjal lu tuꞌn tlaj til, atzun teya mlay cyima, porque mintiꞌ tila tuꞌn tlaj jlu.

20 Ax icx jun xjal tzꞌaklxix, ka ma cyaj tcolin tuꞌn tbinchante ju tzakꞌlxix nok tuꞌn tbinchante ju mya baꞌn, ex ka ma cub nkꞌoꞌne jun tolsabl twitz, ka miꞌn ma txi tmaꞌna te, cymel, mlayx tzaj nnaꞌne aju baꞌn otok tbincha ex cymel tuꞌn tlaj tex til, atzun teya oc tkꞌaꞌya tajlal weye tiꞌj tcamic xjal lu. 21 Katzun ma txi tmaꞌna teju xjal tzꞌaklxix tuꞌn miꞌn tbinchan il, ex ka miꞌn ma binchan il, cucx cꞌankꞌil porque otok txi tbiꞌn aju otok txi tmaꞌna te, atzun teya mlay cyima, tuꞌnju otok txi tmaꞌna te.

22 Ax tujx lugar lu, o nnaꞌye tipumal Kman, ex tma weye cyjaꞌ: Weꞌctza ex texa tuj chkꞌajlaj, porque atzun chin yolile tucꞌila. 23 In jawtzun weꞌye, ex in ex bete tuj chkꞌajlaj, ex atzun o wile tajwalil Kman ic tzaꞌnx otok wile nej ttzi nima Quebar. In cub ẍmejeꞌye ex pon tacl tibaj nwitze max twitz txꞌotxꞌ.

24 Ex o ncꞌame tipumal Dios ex in jaw wabane tuꞌn. Tzajtzun yolin Kman wucꞌile ex tma cyjaꞌ: Txiꞌya ex lamoꞌn ocx tiba tuj tjaya. 25 Bintza, cbel cꞌaloꞌna tuꞌn sakbak cyuꞌn xjal, tuꞌntzun miꞌn tetza ex tuꞌn miꞌn ttena cyxol. 26 Ax icx cꞌoquel tlacꞌon tib takꞌa twitz tcꞌoꞌna wuꞌne, tuꞌntzun mi tbant tyolina. Mlayx bant tuꞌn cyoc tmayoꞌna, porque ke xjal lu jumajx miban che bin. 27 Porque nok alcye kꞌij waje tuꞌn t-xi nmaꞌne jun nyole teya, cbantel tyolina juntl maj, cxeltzun tmaꞌna cye cyjaꞌ: Atzun jlu in tmaꞌn Kman. Alcye jun taj tuꞌn tbin, baꞌn tuꞌn tbinte, ex alcye jun miꞌn taj tuꞌn tbin, baꞌn tuꞌn miꞌn tbinte, porque ke xjal lu jumajx miban che bin.