Ezequiel 4

Cub tyecꞌun Ezequiel tzaꞌn tten che oquel tzokpaj aj kꞌoj tiꞌj tnam Jerusalén

Aya xjal, kꞌintza jun lokꞌ, kꞌoncuxa twitza, ex tzꞌiban cuba tilbilal tnam Jerusalén twitz. 2 Che txolbaꞌnca ke soldad tiꞌjele cyucꞌix ke máquina in che ajben te xitbil muro, kꞌoꞌnca jun chꞌukuj txꞌotxꞌ tiꞌjele muro tuꞌntzun cyocx soldad tuj tnam, tuꞌntzun toc queꞌyin ic tzaꞌn jun tnam txolin tiꞌj cyuꞌn aj kꞌoj. 3 Te tibajxi kꞌintza jun piẍ lámina cꞌuxbil, kꞌoncuya cyxole tucꞌil tnam, aju lámina jun techal tiꞌj muro, ex weꞌcuya twitz tnam lu mer ic tzaꞌn tuꞌn toc tzokpaja tiꞌj. A jlu cꞌajbel te jun techal cye aj Israel.

4 Atzun teya coẍecuya tibaj ttxlaja tuj tnayaja, ex cbel tkꞌoꞌna cyil aj Israel tibaja. Il tiꞌj ccoẍebila tibaj ttxlaja tuj tnayaja tcubsaꞌn til tnam tibaja 5 tuj enter 390 kꞌij; jun kꞌij atzun techal tiꞌj jun abkꞌi cyil aj Israel. 6 Octzun tjapun baj tyemp lu tuꞌna, cbel coẍeꞌya tibaj ttxlaja tuj tbankꞌaba ex cbel tkꞌoꞌna cyil aj Judá tibaja tuj enter 40 kꞌij, jun kꞌij atzun techal tiꞌj jun abkꞌi cyil aj Judá. 7 Cꞌajetz tqueꞌyina juntl maj tumlal tnam Jerusalén aju tnam txolin tiꞌj cyuꞌn aj kꞌoj; cjawil t-xpaltxꞌina tkꞌab tcamiẍa, ex c-yolila te nxele tiꞌj tnam lu. 8 Bintza, oc ccꞌaletela wuꞌne tuꞌn sakbak, tuꞌntzun mi tajtz txalpaja tuj juntl pacꞌ ocxi cyjapun baj ke kꞌij banin tiꞌj tuꞌn ticꞌx tuꞌna.

9 Te tibajxi, kꞌintza chꞌin triw, chꞌin sebad, tucꞌix chꞌin maysiy ex tucꞌix chꞌin avena, ax icx chenakꞌ ex tucꞌix xcarbans; smoꞌn baja tcyakil jlu tuj junx tcubil, ex tiꞌjtzun jlu binchama twaya. Atzun cxel twaꞌna tuj enter 390 kꞌij oc ttena coẍliya tibaj ttxlaja tuj tnayaja. 10 Cxel twaꞌna twaya tuj or banimaj tiꞌj, ex cxel twaꞌna mey libr tuj junjun kꞌij; 11 ax icx tcꞌaya cxel tcꞌaꞌna tuj or banimaj tiꞌj ex cxel tcꞌaꞌna mey litr aꞌ tuj junjun kꞌij. 12 Aju wabj cxel twaꞌna cbantel tuꞌna tiꞌj sebad, tzkꞌajsama tibaj kꞌakꞌ tuꞌn ttxa xjal otok tzkij, ex cbajel tbinchaꞌna jatum baꞌn tilwaja cyuꞌn xjal.

13 Ax icx tzaj tmaꞌn Kman weye cyjaꞌ: Aju wabj tzꞌil ic tzaꞌn jlu, mayoꞌn tuꞌn ley tuꞌn miꞌn t-xi waꞌt, atzun jun techal tiꞌj cywa aj Israel cxel cywaꞌn cyuj ke tnam jatum che pol nlajoꞌne najchak, chi Kman.

14 Atzun weye xi ntzakꞌweꞌne: Miꞌn Nman Dios, weye atxix tej cꞌwaꞌlx kine naꞌnx toc nmacoꞌne jun tiꞌxti tzꞌil; naꞌnx t-xi nchyoꞌne tchibjal jun alumaj tajx in cyim ex ka byoꞌn in cub cyuꞌn ke txcup te tjakꞌ cꞌul; ex mi jun maj naꞌnx t-xi nnicꞌbeꞌne ke chibj mayoꞌn tuꞌn ley, nchiye.

15 Tzaj ttzakꞌweꞌn Kman weye: Baꞌn, cxel nkꞌoꞌne ambil teya tuꞌn tajben ttxa wacẍ tuꞌna te t-xel ttxa xjal, tuꞌntzun ttzkꞌaj twaya tuꞌn.

16 Te tibajxi tzaj tmaꞌn weye: Aya xjal, wuꞌne mlay canun cywa xjal tuj Jerusalén. Maloꞌn cꞌeletz cywa, ex cxel cywaꞌn tucꞌil bis; ax icx cycꞌa aꞌ maloꞌn cꞌeletz, ex cxel cycꞌaꞌn tucꞌil cyxobil. 17 Miꞌn canun cywa ex cycꞌa aꞌ, ex cbajel cyqueꞌyin tuj cywitz tucꞌil cyxobil. Ex cheba cbajel cyipun tuꞌn cynaj tuꞌn tlaj cyil, chi Kman weye.