El tmatzoꞌn Ezequiel ttzmal twiꞌ
5
Ex tzaj tmaꞌn Kman weye cyjaꞌ: Atzun jaꞌlo aya xjal, kꞌintza jun cchil banin ttziꞌ ic tzaꞌn jun navaj in ajben te kꞌibl xmatzbaj, kꞌiꞌmela ttzmal twiꞌya tucꞌix t-xmatza tuꞌn cchil lu. Ex jurat kꞌintza jun balans, ex aju ttzmal twiꞌya ox paꞌn tzꞌeꞌla tuꞌna. 2 Octzun tbaj kꞌoj tiꞌj tnam, patun cuba tuj tnam jun paꞌn cyxol ke ox paꞌn ttzmal twiꞌya; te tibajxi kꞌintza jun cchil ex kesin cuba juntl paꞌn ttzmal twiꞌya tiꞌjele tnam, ex aju toxin paꞌn ttzmal twiꞌya chitunxa tuj cykꞌikꞌ. Akine chin xele kꞌojlel cyiꞌj xjal ateꞌ tuj tnam tucꞌil jun spad tocxsaꞌn tuj nkꞌabe. 3 Kꞌin jawa junjun ttzmal twiꞌya ex cꞌaloꞌnca ttxaꞌn t-xbaluna. 4 Ex ax cyiꞌj jlu kꞌiꞌn ela junjuntl ex kꞌoꞌncxa tuj kꞌakꞌ tuꞌn ttzꞌeꞌy; cyiꞌjtzun jlu cꞌelel kꞌakꞌ tuꞌn cynaj cycyakil xjal aj Israel.5 Akine Dios in chin kꞌmante jlu: Atzun tnam Jerusalén lu, akine in cub kꞌonte te cymijil ke tnam ex cyxol mastl nasyon ateꞌ tiꞌjele. 6 Pero ke xjal lu ma tzꞌel cypaꞌn cyib cyiꞌj ke nleye ex cyiꞌj ke nmandamyente, ex mas pyor ma che oc cywitz ke tnam ex ke nasyon ateꞌ cyiꞌjele, ma tzꞌel cyicꞌun ke nleye ex mintiꞌ ma che japun ke nmandamyente cyuꞌn.
7 Cyjaꞌtzun, akine Dios in chin kꞌmante jlu: Akeye nimxix ma jaw cyiꞌn cyibe cywitz ke nasyon ateꞌ cyiꞌjeleye, ex mintiꞌ ma txi cynimane ke nmandamyente ex nleye, ex mintiꞌlpe ma japun cyuꞌne cyley ke tnam ateꞌ cyiꞌjeleye. 8 Cyjaꞌtzun akine Dios in chin kꞌmante jlu: Ax icx weye chin oquele aj kꞌoj cyiꞌje, akeye aj Jerusalén; cbel cysentense wuꞌne cywitzx ke mastl nasyon; 9 cbel jun cycastiwoye wuꞌne tuꞌn tlaj tcyakil cybinchbene icꞌbilxix; naꞌnx nbinchanteye jun maj icju. Ex mlay nbinchaye juntl maj. 10 Cyxolxe at junjun mambaj cxel cychyoꞌn cycꞌwaꞌl, ex at junjun cꞌwaꞌl cxel cychyoꞌn cyman. Cbel cysentense wuꞌne, ex ke xjal che cyjel ankꞌin che xel nsputune tuj tcyajil pacꞌ twitz txꞌotxꞌ. 11 Akine Dios cxel nmaꞌne jun yol axix toc wuꞌnx wibe, ma baj cytzꞌilsaꞌne njaye xjan tuꞌnju ocx cyiꞌne ke tilbilal icꞌbilxix tuj ex tuꞌn tcyakil cybinchbene mya baꞌn, tuꞌntzun jlu ax icx weye che bajel naj wuꞌne, miꞌn tzaj kꞌakꞌan ncꞌuꞌje cyiꞌje ex mlay tzicꞌx tiꞌj tuꞌn miꞌn tcub cycastiwoye.
12 Aju toxin cꞌloj xjal najlke tuj tnam Jerusalén che cymel tuꞌn txꞌuꞌj yabil ex tuꞌn weꞌyaj tujx tnam, ex atzun juntl toxin cꞌloj byoꞌn che bel tiꞌjele tnam cyuꞌn aj kꞌoj, ex atzun juntl toxin cꞌloj che xel nsputune tuj tcyajil pacꞌ twitz txꞌotxꞌ. Ax kine chin xeꞌle kꞌojlel cyiꞌj, tucꞌil jun spad tocxsaꞌn tuj nkꞌabe. 13 Cjawitz baj nkꞌoje; cbajel ntxꞌuꞌjile at cyiꞌj ex biꞌx cchewixtel ncꞌuꞌje. Octzun tjatz baj nkꞌoje cyiꞌj, cycyakil aj Israel cꞌelel cynicꞌ tiꞌj ka otok chin yoline icju tuꞌnju tzaj nkꞌoje cyiꞌj. 14 Aya tnam Jerusalén cbel nxitune; ex ke xjal ateꞌ tuja ctzajel cychꞌixwi cyxol mastl nasyon ateꞌ tiꞌjeleya, tuꞌntzun toc cyqueꞌyin cycyakil keju che icꞌel bet ttxlaja. 15 Octzun tcub cysentense wuꞌne tucꞌil ntxꞌuꞌjile ex nkꞌoje, ex oc tcub cycastiwoye wuꞌne cyuwxix wen, cycyakil xjal che oquel ten xmayil cyiꞌje ex che elel icꞌune cyuꞌn, ex ke nasyon ateꞌ cyiꞌjele che jawil secꞌpaj tuꞌn cyxobil oc cylonte aju castiw maꞌxix otok tzaj cyibaje. Akine Dios ma chin kꞌmante jlu.
16 Tzul weꞌyaj cyiꞌje wuꞌne, mer ic tzaꞌn in che tzaj xoꞌn ke plech xobajilxix tuꞌn cynaje cyuꞌn. Ax toc che najele tuꞌn weꞌyaj, ex mlay tzaj cnet cywaye. 17 Ax toc tzul weꞌyaj cyiꞌje wuꞌne, tzul yabil ex tzul camic cyxole, ex mi jun cycꞌwaꞌle cyjel ten cyuꞌn ke txcup te tjakꞌ cꞌul, ex nimcu cyeye che cymel tuj kꞌoj. Akine Dios ma chin kꞌmante jlu.