Ctzajel cycastiw aj Israel tuꞌn tlaj nnoꞌc cydiosin ke tilbilal
6
Tzaj yolin Kman wucꞌile ex tzaj tmaꞌn cyjaꞌ: 2 Aya xjal, queꞌyinxa cyumlal ke witz ateꞌ tuj cytxꞌotxꞌ aj Israel, ex kꞌmanxa cye aju cxel nmaꞌne teya, 3 ex chicuya cyjaꞌ: Cybintze akeye witz ateꞌ tuj cytxꞌotxꞌ aj Israel, aju in tmaꞌn Kman cye ke nmak witz, ex cye ke tal witz, cye ke nima ex cye ke chkꞌajlaj ateꞌ cyxol witz: Che tzajel nsamaꞌne ke xjal kꞌojlel cyiꞌje ex che najel ke lugar cywiꞌ ke witz jatum in che cꞌulun ke xjal mya nimal Dios ke. 4 Che bajel npaẍuꞌne ke altar jatum in cub cykꞌoꞌn aj Israel ke chojbil, ex jatum in cub cypatun storac tibaj, ex oc che bel byoꞌn ke xjal cywitz ke tilbilal nnoꞌc cydiosin. 5 Atzun cyximlal aj Israel otok che cyim, cbel nkꞌoꞌne cywitz ke tilbilal nnoꞌc cydiosin, ex cxel nsputune cybakil cyiꞌjele cy-altar. 6 Tuj tcyakil lugar jatum najlke, che bel xitun ke tnam, ex ke cy-altar te cꞌulbil cywitz ke tilbilal biꞌx che bajel xitj. Ke cy-altar biꞌx che bajel naj, ex ke tilbilal cydios che bajel buchj; ke cy-altar jatum in cub patun storac tibaj che bel tilj; tcyakil cybinchben o baj bant cbajel naj. 7 Octzun cylonte oc cycub byoꞌn xjal cyxol, cꞌeleltzun cynicꞌ tiꞌj, akine Dios. 8 Pero che tzokpajel junjun cye wuꞌne tuꞌn miꞌn cycyim, che cyjel ankꞌin ex che bajel sputj cyxol mastl nasyon. 9 Ke xjal che cyjel ankꞌin, chin tzajel cynaꞌn cyxol ke nasyon jatum otok che pon kꞌiꞌn; ctzajel cynaꞌn tzaꞌn tten tzaj nbise cyuꞌn tuꞌn tlaj e jeꞌx lpeꞌ cyiꞌj ke tilbilal, ex el cypaꞌn cyib wiꞌje tuꞌn cycꞌulun cywitz ke tilbilal. Ctzajel cychꞌixwi cyiꞌjx tiꞌj tcyakilju mya baꞌn otok cybincha icꞌbilxix. 10 Cꞌeleltzun cynicꞌ tiꞌj, akine Dios, ex cꞌelel cynicꞌ tiꞌj mya nok gan o chin yoline tej t-xi nmaꞌne tuꞌn ttzaj mya baꞌn cyibaj.11 Tzaj tmaꞌn Kman weye cyjaꞌ: Tjaw okꞌa, ex pokꞌchaꞌn oc ke tkꞌaba ex jaton cuba tkana twitz txꞌotxꞌ; schꞌina tuꞌn taꞌw tuꞌn tlaj cybinchben aj Israel puro icꞌbilxix, porque che cymel tuj kꞌoj ex tuꞌn weꞌyaj ex tuꞌn txꞌuꞌj yabil. 12 Akeju ateꞌ najchak che cymel tuꞌn txꞌuꞌj yabil, atzun keju ateꞌ nikayin che cymel tuj kꞌoj, atzun keju che cyjel ankꞌin che cymel tuꞌn weꞌyaj. Cyjaꞌtzun cjawitz baj nkꞌoje cyiꞌj. 13 Oc cylonte cyximlal ke xjal otok che cyim cyxol ke tilbilal otok tzꞌoc cydiosin, ex cyiꞌjele ke cy-altar, ex cywiꞌ ke tal witz maꞌ cywaꞌl, ex cywiꞌ ke nmak witz, ex cyjakꞌ ke tzeꞌ chaꞌx cyxak, ex cyjakꞌ ke tzeꞌ cꞌol pin cyxak, ex cyuj cycyakil lugar jatum xi cyoyin perjum cꞌocꞌjxix cywitz ke tilbilal, cꞌeleltzun cynicꞌ tiꞌj, akine Dios. 14 Cxel nnukpiꞌn nkꞌabe tuꞌn tcub cycastiw wuꞌne nok jatum otok che pon najal; biꞌx cbel xitj cytanmi wuꞌne, ctzajel keꞌ tuj tzkij txꞌotxꞌ, ex cpol baj tuj tnam Diblat. Cꞌeleltzun cynicꞌ tiꞌj, akine Dios.