5 Akine Dios cxel nmaꞌne jlu: Bintza, maꞌxix jun cꞌixbisabl tzul. 6 Chꞌix tul lakꞌeꞌ ju bajsbil tiꞌj tcyakil. Chꞌix tul lakꞌeꞌ tkꞌijlalil tuꞌn cynaje. 7 Chꞌix tul lakꞌeꞌ tkꞌijlalil tuꞌn cynaje akeye aj Israel. Chꞌix tul lakꞌeꞌ tkꞌijlalil tuꞌn cyjaw tilje tuꞌn cyxobile, ex cbajel tkꞌijlalil tzalajbil in cybinchaꞌne cywi witz. 8 Biꞌx jaꞌlo nimxix nkꞌoje tzul cyiꞌje, cjawitz baj nkꞌoje cyiꞌje, che oquele tuj xjel wuꞌne tiꞌj cybinchbene mya baꞌn, ex cbel cycastiwoye wuꞌne tuꞌn tlaj tcyakil cybinchbene icꞌbilxix. 9 Mlay tzaj kꞌakꞌan ncꞌuꞌje cyiꞌje; cbel cycastiwoye wuꞌne tuꞌn tlaj cybinchbene mya baꞌn, ex tuꞌn tchjet cyuꞌne aju cybinchbene icꞌbilxix. Cꞌeleltzun cynicꞌe tiꞌj, akine Dios.

10 Lutzun ju kꞌij lu. Ma tzul canun. Ma tzul ju xitbil cyiꞌje tuꞌn cynaje. Nimcu mya baꞌn in bant tuj tcyakil part, ex ke xjal puro jawni ke. 11 Ma che chmet ke byol xjal, ex ma che oc ic tzaꞌn jun var te cawbil tuꞌn tcub cycastiw ke xjal binchal mya baꞌn. Mi jun cyjel ankꞌin masque nim cybaj. Tcyakil cykꞌinumabl cbajel naj, tucꞌix cyajwalil. 12 Ma tzul canun tkꞌijlalil aju lakꞌol miꞌn jaw tzalaj, ex aju cꞌayil miꞌn jaw bisun, porque cbel cycastiw cycyakil wuꞌne. 13 Aju o txi cꞌayinte jun piẍ txꞌotxꞌ te juntl, mlay tzꞌoc tete juntl maj masque itzꞌx ke cycabil. Porque mlay tzicꞌx tiꞌj tuꞌn mi tcub cysentens cycyakil. Ex ke xjal binchal mya baꞌn mlay bant cyclonte cyib.

14 Cꞌoquel kꞌajtzaꞌn chun te txocbil tuꞌn toc kꞌoj; cycyakil xjal in bant cyten pero mi jun nneꞌx kꞌojlel porque cbel cycastiw cycyakil xjal lu wuꞌne. 15 Tiꞌjxi tnam nnoꞌc kꞌoj, atzun tujxi tnam at txꞌuꞌj yabil ex weꞌyaj. Ke xjal ateꞌ tuj cojbil che cymel tuj kꞌoj, atzun keju ateꞌ tujxi tnam che cymel tuꞌn weꞌyaj ex tuꞌn txꞌuꞌj yabil. 16 At junjun che tzokpajel ex che xel ok cywiꞌ ke witz ic tzaꞌn ke paloma otok che etz secꞌpaj cyuj chkꞌajlaj, cycyakil che okꞌel tuꞌn tlaj cybinchben mya baꞌn. 17 Cycyakil cꞌelel bakchaj cykꞌab ex ctzajel luꞌlun cykan tuꞌn cyxobil. 18 Cꞌoquel cykꞌoꞌn cyxbalun chꞌiꞌx twitz te techal cꞌixcꞌoj cyiꞌj; tcyakil cyximlal ctzajel luꞌlun, ex cycyakil cjapunel tcyakal cywitz tuꞌn cychꞌixwi, ex cycyakil cꞌelel cymatzoꞌn ttzmal cywiꞌ. 19 Aju sak pwak at cyucꞌil cꞌelex cyxoꞌn tuj cay; ex aju kꞌan pwak at cyucꞌil cꞌelex cyxoꞌn ic tzaꞌn tzꞌis. Aju kꞌan pwak ex aju sak pwak at cyucꞌil mlay che clet tuꞌn tuj tkꞌijlalil oc ttzaj ttxꞌuꞌjil Kman. Cyuꞌn ke jlu mlayx tzꞌel weꞌyaj cyiꞌj, ex mlay noj cycꞌuꞌj, porque tuꞌn kꞌan pwak ex tuꞌn sak pwak ma che binchan il. 20 Tuꞌn tlaj cy-adorno nnoꞌc cykꞌoꞌn cyiꞌj tbanil che queꞌyin ex wiꞌyilxix, jaw cyniman cyib, ex aju cykꞌinumabl ajben cyuꞌn tuꞌn cybinchante ke tilbilal nnoꞌc cydiosin, akeju icꞌbilxix. Cyjaꞌtzun, ke cy-adorno wiꞌyilxix che oquel wuꞌne te mintiꞌ cyajben. 21 Che tzajel wiꞌne ke stranjer xjal tuꞌn tex cyelkꞌaꞌn cykꞌinumabl, ex che tzajel ke xjal ateꞌ twitz txꞌotxꞌ jumajx mya baꞌn ke, tuꞌn t-xi cyiꞌn tcyakil cykꞌinumabl, ex cꞌoquel cykꞌoꞌn te mintiꞌ tajben. 22 Cꞌelel npaꞌn wibe cyiꞌj, ex cxel nkꞌoꞌne ambil cye aj kꞌoj tuꞌn tbaj cytzꞌilsaꞌn tuj njaye, aju toctok te nkꞌinumable. Che ul ke xjal elekꞌ ex cbajel cytzꞌilsaꞌn.

23 Cybinchame cyten ke caden, porque cyuj cycyakil cytanmi aj Israel ma che chmet ke byol xjal, ex nim xjal in che cꞌixbisanjtz tuj tnam. 24 Che tzajel wiꞌne ke xjal jumajx mya baꞌn ke, ex cꞌelel cyetzan cyja ke xjal ateꞌ tuj tnam. Cnajel wuꞌne aju cynimbil cyib keju at cyipumal; ex cbajel ntzꞌilsaꞌne ke lugar te cycꞌulbil. 25 Ctzajel t-xobil cyiꞌj; oc cyajbe tuꞌn cyten tuj txubtxaj pero mlayx che ten. 26 Tzul nimcu mya baꞌn; ex tzul nimcu tkanil mya baꞌn. Nokx gan che jyol tiꞌj jun t-sanjel Dios tuꞌn ttzaj tmaꞌn aju otok tma Dios te; mi aꞌl ke pal che tel tuꞌn cykꞌonte xnakꞌtzbil cye, ex mi ke tij xjal tuꞌn ttzaj cykꞌoꞌn cyconsej. 27 Cjawil okꞌ ju rey tuꞌn tbis, ctzajel nim tbis ju cawil, che tzajel luꞌlun cycyakil aj Israel, cbel cycastiw wuꞌne ic tzaꞌnx cybinchben mya baꞌn, ex cbel cysentens wuꞌne ic tzaꞌn cye cub cysentens mastl cyuꞌn. Cyjaꞌtzun cꞌelel cynicꞌ tiꞌj, akine Dios, chi Dios baj tmaꞌn.