Ezequiel 8

Aju tzaj yecꞌun te Ezequiel tiꞌj ju mya baꞌn in binchanjtz tuj tnam Jerusalén

Tuj tjweꞌyin kꞌij te tkakin xjaw ex tuj tkakin abkꞌi, kꞌukltok kine njaye cyucꞌix ke tij xjal te Judá wucꞌile. Nok minabencu cub ten tipumal Kman wibaje, 2 ex o wile jun tilbilal ic queꞌyin ic tzaꞌn jun xinak. Xiꞌynix keꞌ tmij ponin baj t-xe tkan in cꞌant tuꞌn kꞌakꞌ, ex xiꞌynix keꞌ tmij ponin baj tuj twiꞌ in koptzꞌaj ic tzaꞌn kꞌan cꞌuxbil in koptzꞌaj tiꞌj. 3 Tzaj tnukpiꞌn xinak tkꞌab ex tzyet ttzmal nwiꞌye tuꞌn. In jaw kꞌiꞌne tuꞌn T-xew Dios tuj cykꞌikꞌ, ex mer ic tzaꞌn tuj witzicꞌ cyjaꞌ inx kꞌiꞌne tuꞌn Dios tuj Jerusalén ex in cub tkꞌoꞌn ttzi tpwertil peꞌn te tja Dios jatum tocxsaꞌn tilbilal aju in tzaj ttxꞌuꞌjil Kman tuꞌn, aju pwert lu tcubsaꞌn tuj tumlal tbankꞌab kꞌij. 4 Atzun taꞌtok tajwalil Kman aju Cydios aj Israel, ic tzaꞌn otok tzꞌoc nqueꞌyine mer ic tzaꞌn tuj witzicꞌ tuj chkꞌajlaj. 5 Tzajtzun tmaꞌn Kman weye cyjaꞌ: Queꞌyinxa tumlal tuj tbankꞌab kꞌij.

Xitzun nqueꞌyine tumlal tuj tbankꞌab kꞌij, ex o wile tilbilal aju nnoꞌc cydiosin xjal, aju nimxix in tzaj ttxꞌuꞌjil Kman tuꞌn, tcubsaꞌn ttzi tpwertil peꞌn junx tucꞌil altar.

6 Tzaj tmaꞌn weye cyjaꞌ: ¿Mape tila aju mya baꞌn icꞌbilxix in cybinchaꞌn aj Israel? Tuꞌn tlaj jlu cꞌelel npaꞌn wibe tiꞌj njaye xjan. Pero oc tilaꞌya mastl mya baꞌn mas icꞌbilxix twitz jlu.

7 Ex jurat inx kꞌiꞌne tuꞌn ttxaꞌn peꞌn jatum in che ocx xjal, ex o wile jun twitz ja tocx toyꞌ. 8 Tzajtzun tmaꞌn Kman weye: Kꞌoꞌmixa toyꞌ twitz ja lu.

Extzun nkꞌoꞌne toyꞌ twitz ja, ex o wile jun ttzi ja. 9 Tzaj tmaꞌn weye cyjaꞌ: Tocxa tujxi ex oc tilaꞌya aju mya baꞌn icꞌbilxix in cybinchaꞌn tuj lugar lu. 10 In ocxtzune tuj ja, ex o wile tcyakilju twitz ja te tujxi tzꞌiban cyilbilal cycyakil txcaj jil jakuꞌn in xiꞌ cycꞌuꞌj twitz txꞌotxꞌ, ex cyilbilal jil miban cychyoꞌnjtz, ex tcyakil txcaj tilbilal akeju in che cꞌulun aj Israel cywitz. 11 Ex ateꞌtok 70 cytijil xjal aj Israel; cyxoltzun ke jlu tocxtok Jaazanías aju tcyꞌajal Safán, in che cꞌuluntok cywitz ke tilbilal, ex teylex te junjun kꞌiꞌn jun t-ẍlaꞌc aju in cuꞌx patit storac tuj, ex cyujtzun ke jlu in jatz nim t-sibel storac.

12 Ex tzaj tmaꞌn Kman weye: ¿Mape tila aju in binchanjtz tuj ewaj cyuꞌn ke cytijil xjal aj Israel? Teyle junjun cye in cꞌulun tuj jun ja nojni cyuꞌn ke tilbilal, ex in cymaꞌn cyjaꞌ: Mintiꞌ in ko til Kman, ex ma cyaj tcolin ktanmi, che chi. 13 Ex tzaj tmaꞌntl Kman cyjaꞌ: Oc tilaꞌya mastl mya baꞌn mas icꞌbilxix twitz jlu.

14 Ex inx kꞌiꞌne tuꞌn Kman ttzi tpwertil tja, aju cyjaꞌ in xi tqueꞌyin tumlal tuj tbankꞌab kꞌij. Atzun kꞌuklkeꞌtok junjun xuꞌj in che okꞌ tiꞌj ju dios Tamuz tbi. 15 Tzaj tmaꞌntl Kman weye cyjaꞌ: ¿Mape tila jlu? Oc tilaꞌya mastl mya baꞌn mas icꞌbilxix twitz jlu.

16 In pon kꞌiꞌne tuꞌn Kman ttxaꞌn peꞌn twitz tja, ex tuj ttxaꞌn peꞌn tcub t-xol twitz ja tucꞌil altar, balo ka 25 xinak ẍmejlkeꞌtok cyjaꞌ tajtz ttzal cyiꞌj twitz tja Kman, atzun cywitz cyjaꞌ xiꞌyni tuj tjawitz kꞌij, ex in pon tacl tibaj cywitz max twitz txꞌotxꞌ, in che cꞌuluntok twitz kꞌij. 17 Tzaj tmaꞌntl Kman weye cyjaꞌ: ¿Mape tila? Mya nok oꞌcx in cybinchaꞌn ke aj Judá aju mya baꞌn icꞌunxix wuꞌne, ax icx nimcu mya baꞌn in cybinchaꞌn cyiꞌj cyucꞌil tuj tcyakil lugar. Ex cyjaꞌtzun cocꞌx in tzaj nkꞌoje cyuꞌn, ex nimxix ma cyin el icꞌune cyuꞌn tuꞌn tlaj cybinchben mya baꞌn. 18 Cyjaꞌtzun tzul ntxꞌuꞌjile cyiꞌj, mlayx tzaj kꞌakꞌan ncꞌuꞌje cyiꞌj. Masque che tzaj schꞌin wiꞌje cyuwxix wen, mlayx cheꞌx nbiꞌne, chi Dios baj tmaꞌn.