DANIEL
Pon kꞌiꞌn Daniel tuj Babilonia
1
Tuj toxin abkꞌi ttzyetlen tcawin rey Joacim tuj Judá, pon Nabucodonosor aju rey te Babilonia tuj Jerusalén, cyucꞌix ke t-soldad ex baj cytxolban cyib tiꞌjele tnam. 2 Atzunte Kman xi tkꞌoꞌn ambil te Nabucodonosor tuꞌn ttzyet Joacim tuꞌn ex tuꞌn cyetz tiꞌn nimcu macbil tuj tja Dios. Xitzun tiꞌn Nabucodonosor nimcu xjal pres ex e pon tiꞌn tuj Babilonia, atzun ke macbil xjan e ocx tkꞌoꞌn jatum cꞌuꞌn tcyakil kꞌinumabl tuj tja tdios. 3 Ax icx xi tmaꞌn te Aspenaz, aju nejenel cyxol keju at cyoclen ttxlaj rey, tuꞌn cyetz t-scꞌoꞌn junjun cuꞌxun cyxol aj Israel, tiyjil rey, ex cyxol mastl xjal maꞌ cyoclen. 4 Akeju cuꞌxun lu il tiꞌj mintiꞌ chꞌin cytzacaj, mejor che queꞌyin, at cynabl, xnakꞌtzamaj ke, elni cynicꞌ tiꞌj tcyakil ex at cynabl tuꞌn cyajben tuj tja rey; ex tuꞌn t-xi kꞌot xnakꞌtzbil cye tuꞌn tel cynicꞌ tiꞌj cyyol aj Caldey ex tiꞌj tcyakil uꞌj at cyucꞌil. 5 Ax icx xi tmaꞌn Nabucodonosor tuꞌn t-xi kꞌoꞌn cywa cuꞌxun, tucꞌix cycꞌa vin, ic tzaꞌnx te rey twa in baj tcyakil kꞌij, ex tuꞌn t-xi kꞌoꞌn xnakꞌtzbil cye tuj ox abkꞌi, ex octzun tjapun ox abkꞌi cyuꞌn, ax tuꞌn cycyaj ten ttxlaj rey te ajbel te.O ten Daniel cyucꞌix ke tucꞌil tuj tja rey
6 Cyxol ke cuꞌxun lu, attok cyaje cuꞌxun aj Judá ke, ex atzun cybi jlu: Daniel, Ananías, Misael ex Azarías. 7 Atzunte nejenel cyxol keju at cyoclen ttxlaj rey baj tchꞌexpuꞌn cybi: Ate Daniel, Beltsasar tbi oc tkꞌoꞌn; atzunte Ananías, Sadrac tbi oc tkꞌoꞌn; atzunte Misael, Mesac tbi oc tkꞌoꞌn; ex atzunte Azarías, Abed-nego tbi oc tkꞌoꞌn. 8 Atzunte Daniel cub t-ximan tuꞌn miꞌn tbaj ttzꞌilsan tib tuꞌn tchi rey ex mi tuꞌn tcꞌa vin, tuꞌntzun miꞌn ticꞌ tibaj tley Dios, ex xi tkanin te nejenel cyxol keju at cyoclen ttxlaj rey tuꞌn miꞌn toc lajwersin tuꞌn tbaj ttzꞌilsan tib tuꞌnju tnicꞌbebl rey. 9 Nok tuꞌn t-xtalbil Dios baꞌn ela tnabl Daniel tuj twitz ju nejenel cyxol keju at cyoclen ttxlaj rey, 10 pero xi tmaꞌn te Daniel:
—In chin xobe twitz rey aju npatrone, porque ma tzaj tmaꞌn weye alcye cywaye ex alcye cycꞌaye tuꞌn t-xiꞌ. Katzun ma che ilwaje tuꞌn myalnix che queꞌyine cywitz mastl cuꞌxun junx cyabkꞌiyle cyucꞌil, noklo tuꞌn cylaje jacu chin cub byoꞌne tuꞌn, chi nejenel.
11 Xitzun tmaꞌn Daniel te mayordom, aju otok tzꞌoc kꞌoꞌn tuꞌn nejenel cyxol keju at cyoclen ttxlaj rey tuꞌn cyoc cwentin Daniel, Ananías, Misael ex Azarías tuꞌn:
12 —In chin cubsane twitza tuꞌn tprobarina laj kꞌij kiꞌje, akoꞌye ajbel teya; nok oꞌcx kꞌoncuya tcyakil txcaj twitz awal te kchiꞌye ex nok aꞌ kcꞌaye kꞌontza. 13 Tbajlenxitzun laj kꞌij, queꞌyin oca kwitze cyucꞌil ke mastl cuꞌxun in che waꞌn tiꞌj twa rey, tuꞌntzun tel tnicꞌa tiꞌj alcye ke mas mejor che queꞌyin, ex binchamtzuna kiꞌje nok alcye baꞌn tuj twitza, chi Daniel.
14 Baꞌn ela jlu tuj twitz mayordom ex e oc tkꞌoꞌn ke cuꞌxun tuj malbil tuj laj kꞌij. 15 Tbajlenxitzun laj kꞌij, akeju cuꞌxun lu mas tbanilxix che queꞌyin ex mas at cyipun cywitz cycyakil cuꞌxun in che chyoꞌn tiꞌj chibj ic tzaꞌn te rey in xiꞌ tuꞌn. 16 Cyjaꞌtzun, mintiꞌtl xi tkꞌoꞌn mayordom tnicꞌbebl rey te cywa ke cuꞌxun lu, nok oꞌcx xi tkꞌoꞌn cye, tcyakil txcaj twitz awal baꞌn tchyoꞌnjtz.
17 Xi tkꞌoꞌn Dios cysecꞌal ex cynabl cyaje cuꞌxun lu tuꞌn tel cynicꞌ tiꞌj tcyakil txcaj libro ex tiꞌj tcyakil ojtzkibl. Ax icx el tnicꞌ Daniel tiꞌj ti t-xilen tcyakilju in tzaj yecꞌun cye xjal ic tzaꞌn tuj witzicꞌ ex tiꞌj tcyakil txcaj witzicꞌ. 18 Tejtzun tjapun baj ox abkꞌi, aju otok tzaj tmaꞌn rey tuꞌn cypon yecꞌbaj ke cuꞌxun, ate nejenel cyxol keju at cyoclen ttxlaj rey e jeꞌx tiꞌn ke cuꞌxun lu twitz rey. 19 Octzun ten rey yolil cyucꞌil, ex cyxol cycyakil ke cuꞌxun mintiꞌ pon juntl ic tzaꞌn te Daniel, Ananías, Misael ex Azarías; cyjaꞌtzun, ax e cyaj ten ke cyaje cuꞌxun lu ajbel te rey. 20 Tej toc ten rey xjelil cye tiꞌj junjun yol taj nim nabl ex nim ximbetz tuꞌn tel nicꞌbaj cyiꞌj, atzun el tnicꞌ cyiꞌj ka at mas cynabl cywitz cycyakil ke chman ex keju baꞌn che kꞌijin ateꞌ tuj tcyakil lugar jatum in cawin rey. 21 Axtzun cyaj ten Daniel tejxi ttzyet tcawin Ciro.