Aju tmojonil cytxꞌotxꞌ tuj tumlal tbankꞌab kꞌij ctzajel keꞌ tiꞌj Nintz Mar, cꞌicꞌel tuj be in xiꞌ tuj tnam Hetlón, cꞌicꞌel twitz tnam Hamat ex twitz tnam Hazar-enan, cꞌicꞌel tjakꞌ txꞌotxꞌ te Damasco ex Hamat, atzun cye aj Dan cytxꞌotxꞌ, cxel keꞌ tuj mojon tuj tumlal tjawitz kꞌij ex cpol baj tuj mojon tuj telex kꞌij. 2 Aju cytxꞌotxꞌ aj Aser tmojonin tib tucꞌil cye aj Dan, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 3 Aju cytxꞌotxꞌ aj Neftalí tmojonin tib tucꞌil cye aj Aser, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 4 Aju cytxꞌotxꞌ aj Manasés tmojonin tib tucꞌil cye aj Neftalí, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 5 Aju cytxꞌotxꞌ aj Efraín tmojonin tib tucꞌil cye aj Manasés, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 6 Aju cytxꞌotxꞌ aj Rubén tmojonin tib tucꞌil cye aj Efraín, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 7 Aju cytxꞌotxꞌ aj Judá tmojonin tib tucꞌil cye aj Rubén, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 8 Aju txꞌotxꞌ paꞌmaj te Kman tmojonin tib tucꞌil cye aj Judá, ctzajel keꞌ tiꞌj mojon tuj tjawitz kꞌij ex cpol baj tiꞌj Nintz Mar, cablaj kilómetro tucꞌil mey twitz, ex aju tnukbil ax ic tzaꞌn echbin cye txꞌotxꞌ paꞌmaj cye cablaj cꞌloj cyiyjil aj Israel; tuj tmij txꞌotxꞌ lu cbel ten tja Dios.

9 Aju txꞌotxꞌ paꞌmaj te Kman at cablaj kilómetro tucꞌil mey tnukbil ex jweꞌ kilómetro twitz. 10 Tujtzun txꞌotxꞌ lu cꞌelel paꞌt jun piẍ tuꞌn tajben cye pal; aju tnukbil tuj tumlal tbankꞌab kꞌij ex tuj tumlal tnayaj kꞌij cablaj kilómetro tucꞌil mey, aju twitz tuj tjawitz kꞌij ex tuj telex kꞌij jweꞌ kilómetro. Tujtzun tmij txꞌotxꞌ lu cbel ten tja Dios. 11 Aju txꞌotxꞌ lu cꞌajbel cye pal paꞌmaj ke tuꞌn cyajben weye, akeju tiyjil Sadoc, atzun ke e ajben weye ex japunxix cyuꞌn ex mintiꞌ el cypaꞌn cyib wiꞌje ic tzaꞌn cybincha mastl aj Leví tej tel cypaꞌn cyib aj Israel wiꞌje. 12 Cyjaꞌtzun tuj ju txꞌotxꞌ paꞌmaj te Kman cꞌelel paꞌt jun piẍ txꞌotxꞌ tuꞌn tajben cye pal, tmojonin tib tucꞌil cytxꞌotxꞌ aj Leví, ex aju txꞌotxꞌ lu cꞌoquel te xjan. 13 Ax ttxlaj cytxꞌotxꞌ pal cxel kꞌot cytxꞌotxꞌ aj Leví, te cablaj kilómetro tucꞌil mey tnukbil, ex jweꞌ kilómetro twitz. Aju txꞌotxꞌ paꞌmaj te Kman tuꞌn tcyakil, at cablaj kilómetro tucꞌil mey tnukbil ex jweꞌ kilómetro twitz. 14 Atzunju txꞌotxꞌ lu mas tbanilxix tuj enter cytxꞌotxꞌ aj Israel. Mlay txi cꞌayit, mi tuꞌn tbaj chꞌexpet ex mi tuꞌn t-xi kꞌot te juntl xjal, porque aju txꞌotxꞌ lu xjansamaj te Kman.

15 Aju chꞌintl txꞌotxꞌ cyaj sobryin at cablaj kilómetro tucꞌil mey tnukbil ex cabe kilómetro tucꞌil mey twitz, a jlu mya xjansamaj. Tujtzun txꞌotxꞌ lu jacu bant tuꞌn cynajan ke xjal tuj, ex ctzajel chꞌiy cꞌul tuj te cywa alumaj. Ex tuj tmij cbel ten tnam. 16 Aju echbin teju tnam lu, 2,250 metro junjun pacꞌ, te jawni, te cubni, te elni, ex te ocni. 17 Tiꞌjele tnam ctzajel chꞌiy cꞌul te cywa alumaj, te 125 metro junjun pacꞌ. 18 Ttxlaj ju tnam te ocni at jun piẍ txꞌotxꞌ te jweꞌ kilómetro tnukbil, ax icx ttxlaj te elni at juntl piẍ ax icx te jweꞌ kilómetro tnukbil, ex cycabil piẍ txꞌotxꞌ lu cymojonin cyib tucꞌil ju txꞌotxꞌ paꞌmaj te Kman. Tujtzun txꞌotxꞌ lu cbelex awat awal, ex aju twitz cꞌoquel, cꞌajbel te cywa ke xjal in che akꞌnan tuj tnam. 19 Akeju in che akꞌnan tuj tnam, nok alcyex cꞌloj tiyjil Israel, atzun ke che akꞌnal tuj txꞌotxꞌ lu. 20 Tcyakilju txꞌotxꞌ paꞌmaj, aju xjansamaj te Kman, tucꞌix txꞌotxꞌ te tnam, junx echbin te tnukbil tucꞌil twitz, cablaj kilómetro tucꞌil mey junjun pacꞌ ttxlaj.

21-22 Atzun te cawil ttxꞌotxꞌ, atzun aju tcyaj t-xol cytxꞌotxꞌ aj Judá tucꞌil cytxꞌotxꞌ aj Benjamín: akeju cabe piẍ tcyaj tuj cycabil pacꞌ ju txꞌotxꞌ paꞌmaj te Kman ex ju txꞌotxꞌ te tnam. Aju echbil te ttxꞌotxꞌ ju cawil, cablaj kilómetro tucꞌil mey twitz, cxelx keꞌ tiꞌj ju txꞌotxꞌ paꞌmaj te Kman ex ju txꞌotxꞌ te tnam, cpol baj tuj ju mojon tcub tuj tjawitz kꞌij; juntl piẍ cxelx keꞌ tiꞌj ju txꞌotxꞌ paꞌmaj te Kman ex ju txꞌotxꞌ te tnam, cpol baj tiꞌj Nintz Mar. Ex tujtzun tmij txꞌotxꞌ lu cyjel ten ju txꞌotxꞌ paꞌmaj te Kman tucꞌix tja Dios, tucꞌix cytxꞌotxꞌ aj Leví ex tucꞌix ju txꞌotxꞌ te tnam.

23 Aju cytxꞌotxꞌ txkantl cꞌloj cyiyjil aj Israel ic tten cyjaꞌ: Aju cytxꞌotxꞌ aj Benjamín ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 24 Aju cytxꞌotxꞌ aj Simeón tmojonin tib tucꞌil cye aj Benjamín, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 25 Aju cytxꞌotxꞌ aj Isacar tmojonin tib tucꞌil cye aj Simeón, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 26 Aju cytxꞌotxꞌ aj Zabulón tmojonin tib tucꞌil cye aj Isacar, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 27 Aju cytxꞌotxꞌ aj Gad tmojonin tib tucꞌil cye aj Zabulón, ctzajel keꞌ tiꞌj mojon tuj tjawitz kꞌij, cpol baj tiꞌj Nintz Mar. 28 Aju mojon tuj tumlal tnayaj kꞌij cxel keꞌ tiꞌj tnam Tamar, cꞌelex jatum taꞌ twi aꞌ tuj Meriba-cades, ex cꞌelex ttziꞌyile nima te Ejipt, tuꞌn tpon baj tiꞌj Nintz Mar.

29 Atzun txꞌotxꞌ lu oc cycꞌmaꞌ cablaj cꞌloj cyiyjil aj Israel te cyetzbil, ex cyjaꞌtzun ctelba cyuꞌne oc tcub cysipane. Akine Dios in chin kꞌmante jlu.

30-34 Aju tnam cꞌoquel jun muro tiꞌj te 2,250 metro echbin te teyle junjun ttxlaj tuj cycyajil pacꞌ. Tuj junjun pacꞌ ttxlaj muro cyjel ox tpwertil, ex teyle junjun pwert cꞌoquel tbi jun cꞌloj cyiyjil aj Israel tiꞌj. Atzun txꞌolbaben cye jlu: Ke pwert cycub tuj tumlal tbankꞌab kꞌij, cꞌoquel tbi Rubén tiꞌj jun, atzun juntl cꞌoquel tbi Judá tiꞌj, ex atzun juntl cꞌoquel tbi Leví tiꞌj; ke pwert cycub tuj tumlal tjawitz kꞌij, cꞌoquel tbi José tiꞌj jun, atzun juntl cꞌoquel tbi Benjamín tiꞌj, ex atzun juntl cꞌoquel tbi Dan tiꞌj; ke pwert cycub tuj tumlal tnayaj kꞌij, cꞌoquel tbi Simeón tiꞌj jun, atzun juntl cꞌoquel tbi Isacar tiꞌj, ex atzun juntl cꞌoquel tbi Zabulón tiꞌj; ke pwert cycub tuj tumlal telex kꞌij, cꞌoquel tbi Gad tiꞌj jun, atzun juntl cꞌoquel tbi Aser tiꞌj, ex atzun juntl cꞌoquel tbi Neftalí tiꞌj. 35 Aju echbin te muro tiꞌjele tnam, 9,000 metro tuꞌn tcyakilx, ex aju tbi tnam cꞌoquel, atzun jlu: Ate Kman at tzalu.