Aju twi aꞌ nneꞌtz tuj tja Dios
47
Te tibajxi inx kꞌiꞌne juntl maj tuꞌn xinak ttzi tja Dios. Ex o wile in pulwin tjatz aꞌ ttzi tja Dios, in bet tex tumlal tjawitz kꞌij, porque aju twitz tja Dios cyjaꞌ xiꞌyni tumlal tjawitz kꞌij. Aju aꞌ cyjaꞌ in cuꞌx tuj tumlal tbankꞌab tja Dios, cyjaꞌ nneꞌx bet ttxlaj altar tuj tumlal tnayaj kꞌij. 2 Ex in etz kꞌiꞌne tuꞌn tuj tcabin ttxaꞌn peꞌn te tja Dios ex in elpune tiꞌjxi ttzi ja tcub tuj tumlal tbankꞌab kꞌij, ex in ajtz kꞌone welt tuꞌn tiꞌjele, tejxi npone ttzi ja tcub tiꞌjxi tnejel ttxaꞌn peꞌn, aju cyjaꞌ xiꞌyni twitz tumlal tjawitz kꞌij. Ex o wile aꞌ nneꞌtz bet ttxlaj ttzi ja tuj tumlal tnayaj kꞌij. 3 Etz xinak kꞌiꞌn jun cyꞌjaj tuꞌn ex xiꞌ tumlal tjawitz kꞌij, xi techan 500 metro ex in icꞌx tiꞌn tuj aꞌ; ex japun aꞌ tiꞌj tmopil nkane. 4 Ex xi techan juntl 500 metro ex in icꞌx tiꞌn tuj aꞌ: japun aꞌ twiꞌ nchꞌeque. Xi techan juntl 500 metro ex in icꞌx tiꞌn tuj aꞌ; ex japun aꞌ nmije. 5 Xi techan juntl 500 metro, ex otok tzꞌoc aꞌ te jun nima ex mintiꞌ bant tuꞌn wicꞌxe tuj; otok tzꞌoc te jun nima maꞌxix t-xeꞌ, oꞌcx tuꞌn xnuꞌxin jacu tzicꞌx jun xjal tuj. 6 Tzajtzun tmaꞌn xinak weye cyjaꞌ: Kꞌonca cwent tiꞌj ju ma tila.Te tibajxi in ajtz meltzꞌaje tuꞌn ttziꞌyile nima, 7 ex o wile tuj cycabil pacꞌ ttziꞌyile nima attok nimcu tzeꞌ. 8 Ax icx tzaj tmaꞌn weye cyjaꞌ: Aju aꞌ lu cyjaꞌ in xi bet tumlal tjawitz kꞌij ex in pon tuj nima Jordán, in icꞌtl ex in pon baj max tuj mar at nim atzꞌan tuj. Octzun tpon nima lu tuj mar at nim atzꞌan tuj, cꞌoquel aju mar baꞌn tcꞌanjtz. 9 Nok alcyex part jatum cpol aꞌ lu, che ankꞌil nim cyiẍ tuj ex cycyakil txcaj jil najlke tuj aꞌ. Porque tuꞌn nima lu aju mar at nim atzꞌan tuj cꞌoquel te baꞌn tcꞌanjtz, ex che tel cycyakil txcaj jil tuj. 10 Che tel ke tzyul cyiẍ ttziꞌyile mar, cxel keꞌ tuj lugar En-gadi ex cpol baj max tuj lugar En-eglaim, ex ax cbel cytzkijsaꞌn cyxuyb. Ex che tel nimcu txcaj cyiẍ tuj ic tzaꞌn tuj Nintz Mar. 11 Pero ke lugar soban ex ke laguna ateꞌ nikayin ttziꞌyile mar, miꞌn ten aꞌ baꞌn tcꞌanjtz cyuj; cucx che cyjel ten at atzꞌan cyuj, tuꞌntzun cyajben tuꞌn tjatz atzꞌan. 12 Tuj cycabil pacꞌ ttzi nima che chꞌiyil cycyakil txcaj tzeꞌ nnoꞌc cywitz. Mlay che tzkij cyxak ex mlay txi cycolin tuꞌn toc cywitz. Tcyakil xjaw cꞌoquel cywitz, porque ctel aꞌ cyxeꞌ, aju nneꞌtz tuj tja Dios. Aju cywitz cꞌajbel te cyloꞌ xjal, atzun cyxak cꞌajbel te kꞌanbil.
Ke tmojonil txꞌotxꞌ
13 Akine Dios in chin kꞌmante jlu: Atzun ke tmojonil txꞌotxꞌ lu, aju oc cycꞌmaꞌ ke cablaj cꞌloj cyiyjil aj Israel te cyetzbil. Oc tcꞌmaꞌ José cabe piẍ txꞌotxꞌ te tetzbil. 14 Xi ntziyane tuꞌn t-xi nkꞌoꞌne txꞌotxꞌ lu cye ktzan cyxeꞌchele. Cysipancuye parej. Atzunju txꞌotxꞌ lu cꞌoquel te cyetzbile.
15 Ke tmojonil txꞌotxꞌ tuj tumlal tbankꞌab kꞌij, cxel keꞌ tiꞌj Nintz Mar, cꞌicꞌel tuj be in xiꞌ tuj tnam Hetlón, cꞌicꞌel tuj tnam Zedad, 16 tuj tnam Hamat, tuj tnam Berota ex tuj tnam Sibraim, akeju cycubsaꞌn tuj mojon cyxol tnam Damasco ex Hamat, ex cꞌicꞌel tuj Hazar-haticón, aju tmojonin tib tucꞌil Haurán. 17 Cyjaꞌtzun aju mojon tuj tbankꞌab kꞌij, cxel keꞌ tij Nintz mar ex cpol baj tiꞌj tnam Hasar-enan, atzunju txꞌotxꞌ Damasco ex Hamat che cyjel ten tuj tumlal tbankꞌab kꞌij.
18 Aju mojon tuj tumlal tjawitz kꞌij ctzajel keꞌ cyxol tnam Haurán ex Damasco, cbeletz ttziꞌyile nima Jordán ex ttziꞌyile mar at nim atzꞌan tuj, tuꞌn tcuꞌpun baj tiꞌj tnam Tamar, ex atzun nima Jordán cꞌajbel te tmojonil cytxꞌotxꞌ aj Israel tucꞌil cytxꞌotxꞌ aj Galaad.
19 Aju mojon tuj tumlal tnayaj kꞌij cxel keꞌ tiꞌj tnam Tamar, cꞌelex jatum taꞌ twi aꞌ tuj Meriba-cades, ex cꞌelex ttziꞌyile nima te Ejipt tuꞌn tpon baj tiꞌj Nintz Mar. 20 Aju tmojonil txꞌotxꞌ tuj telex kꞌij, atzun Nintz Mar, cxelx keꞌ tiꞌj mojon te Ejipt ex cpol baj jatum nnoꞌcx be tuꞌn tpon tuj tnam Hamat.
21 Atzun txꞌotxꞌ lu cbel sipet cyxol cablaj cꞌloj cyiyjil aj Israel. 22 Atzun etzbil lu at cyoclene tiꞌj, ax icx ke stranjer xjal najlke cyxole, cyucꞌix ke cycꞌwaꞌl ax otok che itzꞌj cyxole. Ex che oquel cykꞌoꞌne mer ic tzaꞌn ax aj Israel ke. Oc tcub sipet txꞌotxꞌ cyxol aj Israel, ax icx cye at cyoclen tiꞌj txꞌotxꞌ. 23 Nok alcyex cꞌloj cyiyjil aj Israel najlke stranjer xjal cyxol, axtzun cxel kꞌot cytxꞌotxꞌ. Akine Dios in chin kꞌmante jlu.