Aju at tuꞌn tbant tuꞌn cawil cyuj ninkꞌij
46
Akine Dios in xi nmaꞌne jlu: Aju pwert tcub tumlal tjawitz kꞌij jatum tuꞌn kocx tuj tcabin ttxaꞌn peꞌn, clametel tuj enter kak kꞌij akꞌuntl, ex cjaketel tuj kꞌij te ojlabl ex tuj kꞌij oc ttzaj queꞌyin acꞌaj xjaw. 2 Cꞌoquex cawil tuj pwert te tcabin ttxaꞌn peꞌn ex cbel weꞌ ttxlaj tmarquil tlamel ja. Ex acuxtzun in cub cypatun pal ke alumaj te chojbil il, ex acux in xi cykꞌoꞌn ke oyaj te mojbabl tibil, akeju otok che pon tiꞌn cawil, atzunte cawil cbel ten cꞌulul ttzi ja, ex te tibajxi jlu cꞌeletztzun. Pero miꞌn lamet pwert, max clametel ocxi tex kꞌij. 3 Cyuj ke kꞌij te ojlabl ex tuj kꞌij oc ttzaj queꞌyin acꞌaj xjaw, che bel ten xjal cꞌulul twitz Kman ax twitz pwert lu. 4 Ke alumaj che xel tkꞌoꞌn cawil tuj kꞌij te ojlabl tuꞌn cycub patit te oyaj te Kman, atzun ke jlu: Kak tal tman ẍneꞌl ex jun tman ẍneꞌl; cycyakil ke jlu mintiꞌ chꞌin cypaltil. 5 Tiꞌj junjun tman ẍneꞌl cxel kꞌot cyaje alm triw, atzun cyiꞌj ke tal tman ẍneꞌl nok nicꞌpun taj txi tkꞌoꞌn. Ax icx tiꞌj cyaje alm triw cxel kꞌot ox litr tucꞌil mey aseyt. 6 Tuj kꞌij oc ttzaj queꞌyin acꞌaj xjaw cxel tkꞌoꞌn te oyaj, jun tor, kak tal tman ẍneꞌl ex jun tman ẍneꞌl. Cycyakil ke jlu mintiꞌ chꞌin cypaltil. 7 Tiꞌj junjun tor cxel tkꞌoꞌn cyaje alm triw, ex cyaje alm tiꞌj junjun tman ẍneꞌl, atzun cyiꞌj ke tal tman ẍneꞌl nok nicꞌpun taj txi tkꞌoꞌn. Ex tiꞌj cyaje alm triw cxel tkꞌoꞌn ox litr tucꞌ mey chibj aseyt.8 Oc tocx ju cawil, cꞌoquex tuj tal cwart mas maꞌ aju tcub ttzi ja, ex ax cꞌeletz juntl maj. 9 Oc cyocx ke xjal cꞌulul twitz Kman tuj ninkꞌij, il tiꞌj cbantel cyuꞌn cyjaꞌ: Akeju che oquex ttzi ja tcub tuj tumlal tbankꞌab kꞌij, che eletz ttzi ja tcub tuj tumlal tnayaj kꞌij, ex atzun keju che oquex ttzi ja tcub tuj tumlal tnayaj kꞌij che eletz ttzi ja tcub tuj tumlal tbankꞌab kꞌij. Mlay che ajtz meltzꞌaj ttzi ja jatum otok che ocx. Atzun che elex ttzi ja tcub jlajxi ttxaꞌn peꞌn. 10 Aju cawil at tuꞌn tocx junx cyucꞌil xjal ex junx tuꞌn cyetz. 11 Ex tuj junjun ninkꞌij cxel cykꞌoꞌn cyaje alm triw tiꞌj jun tor, ex cyaje alm tiꞌj jun tman ẍneꞌl; ex cyiꞌj ke tal tman ẍneꞌl nok nicꞌpun cyaj txi cykꞌoꞌn. Tiꞌj cyaje alm triw cxel kꞌot ox litr tucꞌil mey chibj aseyt. 12 Oc t-xi tkꞌoꞌn cawil jun oyaj te Kman, aju patun in cub, ex ka jun chojbil te mojbabl tibil, cjaketel pwert twitz, aju tcub tuj tjawitz kꞌij, ex cxel tkꞌon toyaj aju patun in cub tucꞌix ju chojbil te mojbabl tibil. Icx ctelba ic tzaꞌnx in bant tuj kꞌij te ojlabl. Octzun tetz, biꞌx clametel pwert.
Aju oyaj in xi kꞌot cycyakil kꞌij
13 Tcyakil prim te junjun kꞌij cxel kꞌot jun tal tman ẍneꞌl te jun abkꞌi ex mintiꞌ tpaltil, tuꞌntzun tcub patit te chojbil twitz Kman. 14 Ax icx tcyakil prim cxel kꞌot cyaje libr arin te jun oyaj te Kman, ex jun litr chibj aseyt tuꞌn tbaj xyokꞌit tucꞌil arin. Aju costumr lu ilxix tiꞌj cucx tuꞌn tbinchet te jumajx. 15 Tcyakil prim il tiꞌj tuꞌn t-xi kꞌot tal tman ẍneꞌl te jun oyaj patun in cub tucꞌix arin ex chibj aseyt.
Aju ley tiꞌj ttxꞌotxꞌ cawil
16 Akine Dios in xi nmaꞌne jlu: Ka ma txi tkꞌoꞌn cawil chꞌin ttxꞌotxꞌ te jun tcyꞌajal, aju txꞌotxꞌ lu biꞌx cꞌoquel te tetzbil tcyꞌajal. 17 Pero ka ma txi tkꞌoꞌn cawil chꞌin ttxꞌotxꞌ te jun tmajen, oꞌcx cꞌajbel tuꞌn majen ocxi tul canun aju abkꞌi te tzokpibl, cꞌoqueltzun juntl maj te tetzbil cawil ex cyjel ten te cyetzbil ke tcyꞌajal. 18 Mintiꞌ toclen cawil tuꞌn tel tiꞌn ttxꞌotxꞌ jun xjal. Oc t-xi tkꞌoꞌn cyetzbil ke tcyꞌajal, cxel tkꞌoꞌn tiꞌj tex ttxꞌotxꞌ; tuꞌntzun miꞌn tel kꞌit cytxꞌotxꞌ ke xjal etzan wuꞌne, chi Dios.
Ke ja te tja Dios jatum in tzkꞌaj chibj
19 Te tibajxi inx kꞌiꞌne tuꞌn xinak ttzi ja tcub ttxlaj pwert, ex in ocx kꞌiꞌne tuꞌn jatum ateꞌ ke cwart cyjaꞌ xiꞌyni cywitz tuj tumlal tbankꞌab kꞌij, akeju paꞌmaj tuꞌn cyajben oꞌcx cye pal. Tiꞌjxi cycwart ke pal tzaj tyecꞌun jun lugar tcub tuj tumlal telex kꞌij, 20 ex tzaj tmaꞌn weye cyjaꞌ: Tujtzun lugar lu cbajel cytzkꞌajsaꞌn pal cychibjal ke alumaj otok cheꞌx kꞌoꞌn te chojbil il ex te chojbil cypaltil xjal, ex ax che tzkꞌajel ke oyaj twitz awal, tuꞌn miꞌn tetz cyiꞌn ke chojbil lu tuj tnejel ttxaꞌn peꞌn ex tuꞌn miꞌn toc cymacoꞌn xjal ke tiꞌxti xjan.
21 Ex in etz kꞌiꞌne tuꞌn tuj tcabin ttxaꞌn peꞌn, tuꞌn weꞌlile tuj tnejel ttxaꞌn peꞌn; ex inx ucꞌine tuꞌn tuj cycyajil tbutxꞌ. O wile tuj junjun tbutxꞌ attok jun ttxaꞌn peꞌn chꞌin. 22 Junx taꞌ echbin cye ke ttxaꞌn peꞌn chꞌin, akeju cycub cyuj cycyajil tbutxꞌ tnejel ttxaꞌn peꞌn, winkin metro tnukbil ex olaj metro twitz. 23 Ex cyiꞌjele jlu attok jun muro abj, ex t-xeꞌyile muro, lu tcubsaꞌntok junjun tcubil kꞌakꞌ. 24 Tzaj tmaꞌn xinak weye cyjaꞌ: Atzun ke ja lu cye keju in che ajben tuj tja Dios, jatum tuꞌn cytzkꞌaj ke alumaj in xi cykꞌoꞌn xjal te chojbil.