Aju txꞌotxꞌ paꞌmaj tuꞌn tajben te Kman
45
Oc tcub cypaꞌne txꞌotxꞌ tuꞌn t-xi cykꞌoꞌne te junjun cꞌloj cyiyjile, il tiꞌj tuꞌn tel cypaꞌne jun piẍ txꞌotxꞌ te cablaj kilómetro tucꞌ mey tnukbil ex laj kilómetro twitz, aju txꞌotxꞌ lu cꞌelel cypaꞌne tuꞌn tajben te Kman. Tcyakil txꞌotxꞌ lu cꞌoquel te xjan. 2 Tujtzun txꞌotxꞌ cꞌelel cypaꞌne jun piẍ tuꞌn tjaw binchet tja Dios tuj, aju txꞌotxꞌ cꞌelel cypaꞌne te 250 metro junjun pacꞌ, ex tiꞌjele cyjel cykꞌoꞌne jun piẍ txꞌotxꞌ te 25 metro twitz ex mintiꞌ at tuj. 3 Tuj ju txꞌotxꞌ paꞌmaj te Kman cbel echit jun piẍ txꞌotxꞌ te cablaj kilómetro tucꞌ mey tnukbil ex jweꞌ kilómetro twitz, ex atzun txꞌotxꞌ lu cꞌoquel mas xjanxix: Atzun Cjawil binchet tja Dios tuj. 4 Aju txꞌotxꞌ lu cꞌajbel cye pal, akeju in che ajben tuj tja Kman ex in che ul lakꞌeꞌ twitz tuꞌn cyajben te. Atzun lugar lu jatum tuꞌn tjaw cybinchaꞌn cyja. Cꞌoquel te jun lugar xjan jatum tuꞌn tcub ten tja Kman. 5 Ax icx at juntl txꞌotxꞌ te cablaj kilómetro tucꞌ mey tnukbil ex jweꞌ kilómetro twitz, paꞌmaj te cyetzbil aj Leví akeju in che ajben tuj tja Dios, tuꞌntzun cyten cytanmi jatum tuꞌn cynajan. 6 Ax icx cꞌelel paꞌt jun piẍ txꞌotxꞌ te cablaj kilómetro tucꞌ mey tnukbil ex cabe kilómetro tucꞌ mey twitz jatum cjawil binchet tnam, aju txꞌotxꞌ lu tcub tjakꞌ txꞌotxꞌ xjan jatum cjawil binchet tja Dios. Aju txꞌotxꞌ lu cꞌoquel te cyetzbil cycyakil aj Israel.Aju txꞌotxꞌ paꞌmaj te cawil
7 Ax icx cꞌelel paꞌt cabe piẍ txꞌotxꞌ tuꞌn tajben te cawil. Jun piẍ cxel keꞌ tiꞌj ju txꞌotxꞌ xjan tuꞌn tpon baj tiꞌj tmojonil txꞌotxꞌ tuj tjawitz kꞌij, ex juntl piẍ cxel keꞌ tiꞌj ju txꞌotxꞌ xjan tuꞌn tpon baj tiꞌj tmojonil txꞌotxꞌ tuj telex kꞌij. Aju tcub tumlal tjawitz kꞌij tucꞌix ju tcub tumlal telex kꞌij junx echbinte cynukbil ic tzaꞌn ke txꞌotxꞌ otok txi kꞌoꞌn cye junjun cꞌloj cyiyjil aj Israel. 8 Aju txꞌotxꞌ lu cꞌoquel te tetzbil cawil cyxol aj Israel tuꞌntzun miꞌn tcub cyyajlaꞌn juntl maj ke cawil ke xjal etzan wuꞌne; nok oꞌcx cxel cykꞌoꞌn cytxꞌotxꞌ teyle junjun cꞌloj cyiyjil aj Israel.
Aju ley tuꞌn tajben tuꞌn cawil
9 Akine Dios cxel nmaꞌne jlu: Nim mya baꞌn ma cybinchaye, akeye cawil cyxol aj Israel. Miꞌn che biyintle xjal ex miꞌn che cub cyyajlaꞌne. Cybinchame tcyakil tuj tumel ex tzꞌaklxix. Cycolinxe tuꞌn tel cyelkꞌaꞌne cytxꞌotxꞌ ke xjal etzan wuꞌne. Akine Dios in chin kꞌmante jlu.
10 Che ajben cycyakil marc ex malbil cabalxix cyuꞌne. 11 Aju malbil triw il tiꞌj tuꞌn tten junx taꞌ tucꞌil ju malbil taꞌl twitz uva. Aju malbil homer tbi 220 litr tuj, ex atzunju cꞌajbel te ttxuylal. Tuj jun homer in xiꞌ laj bato taꞌl twitz uva, ax icx in xiꞌ laj efa triw tuj jun homer.
12 Ax icx ke marc akeju che ajbel te malbil atzun ke jlu: Winkin gera junx taꞌ talil tucꞌil jun siclo, ex jun siclo chꞌixmi mey ons talil; 60 siclo junx taꞌ tucꞌil mina.
13 Atzun ke oyaj lu baꞌn t-xi cykꞌoꞌne: Aju triw tucꞌix sebad te 60 byuj cꞌelel cyuꞌne, ex cxel cykꞌoꞌne jun byuj te oyaj. 14 Ax icx ctelba aseyt cyuꞌne, te 100 paꞌn cꞌelel, ex cxel cykꞌoꞌne jun paꞌn te cyoyaje. 15 Atzun cyiꞌj ke ẍneꞌl cꞌeletz cyiꞌne jun cyxol cab syentchak, akeju ulni cynabl at cyxol aj Israel. Akeju twitz awal lu che ajbel te cyoyaje te Dios, ax icx ke alumaj che ajbel te chojbil patun in che cub, ex te chojbil te mojbabl tibil, akeju in cheꞌx kꞌot tuꞌn tnajset cyile. Akine Dios in chin kꞌmante jlu.
16 Cycyakil aj Israel il tiꞌj tuꞌn t-xi cykꞌoꞌn oyaj lu te cawil at cyxol, 17 atzunte cawil cxel kꞌonte cye alumaj te chojbil patun in cub, ex ke oyaj twitz awal, ax icx oyaj taꞌl twitz uva aju in xi kꞌot oc in che tzaj queꞌyin acꞌaj xjaw, ex cyuj ke kꞌij te ojlabl ex cyuj cycyakil ninkꞌij in che icꞌset cyxol aj Israel. Ax icx il tiꞌj cxel tkꞌoꞌn chojbil il, cyucꞌix ke oyaj twitz awal, ex ke chojbil patun in che cub, ex chojbil te mojbabl tibil, tuꞌntzun tnajset cyil aj Israel.
Aju ninkꞌij te Xjan Kꞌij
18 Akine Dios in chin kꞌmante jlu: Tuj tnejel kꞌij te tnejel xjaw cxel cykꞌoꞌne jun tal tor mintiꞌ tpaltil te chojbil il, tuꞌntzun t-sakset tuj tja Dios. 19 Ctzajel tiꞌn pal chꞌin tchcꞌel alumaj aju otok txi kꞌot te chojbil il, ex cꞌoquel tkꞌoꞌn cyiꞌj tmarquil tlamel tja Dios, ex cyiꞌj cycyajil tbutxꞌ altar, ex cyiꞌj tmarquil tlamel ja ateꞌ tuj tcabin ttxaꞌn peꞌn. 20 Ax jlu cbantel tuj twukin kꞌij te xjaw, tuꞌntzun tnajset cyil xjal, akeju otok che binchan il mya ximantok cyuꞌn, ex tuꞌnju mintiꞌ nneꞌl cynicꞌ tiꞌj. Cyjaꞌtzun tten csaksetel tja Dios. 21 Tuj tcyajlajin kꞌij te tnejel xjaw ckebil cyuꞌne tuꞌn ticꞌset ninkꞌij te Xjan Kꞌij, ex tuj enter wuk kꞌij che waꞌle pan mintiꞌ t-samel tuꞌn tjaw mal tcꞌuꞌj. 22 Tuj kꞌij lu cxel tkꞌoꞌn cawil jun tal tor te chojbil til, ex te chojbil cyil cycyakil aj Israel. 23 Teyle junjun kꞌij teju wuk kꞌij ninkꞌij ctzajel tkꞌoꞌn cawil wuk tor ex wuk tman ẍneꞌl mintiꞌ cypaltil, te chojbil te weye, akeju patun in che cub. Ax icx teyle junjun kꞌij cxel tkꞌoꞌn jun tman chip te chojbil il. 24 Tiꞌj junjun tor ex junjun tman ẍneꞌl cxel kꞌot cyaje alm triw ex ox litr tucꞌ mey chibj aseyt.
Aju ninkꞌij oc cyjaw binchet tal ja t-xak tzeꞌyin cywiꞌ
25 Ax icx cyuj ninkꞌij oc cyjaw binchet tal ja t-xak tzeꞌyin cywiꞌ, aju in cub icꞌset tuj olaj tajlal twukin xjaw, cxel tkꞌoꞌn cawil ke oyaj tuj enter wuk kꞌij, aylex ke chojbil il cxel tkꞌoꞌn ic tzaꞌnx otok txi tkꞌoꞌn nej, atzun ke jlu: Ke alumaj patun in che cub, ex ke oyaj twitz triw, ax icx chibj aseyt.