4 Te tibajxi inx kꞌiꞌne tuꞌn xinak tuꞌn wocxe ttzi ja tcub tuj tumlal tbankꞌab kꞌij, tuꞌn npone twitz tja Dios. Ex o wile tajwalil Kman otok baj noj tuj tja tuꞌn, in cubtzun ẍmejeꞌye tejxi tpon tacl tibaj nwitze twitz txꞌotxꞌ. 5 Tzajtzun tmaꞌn Kman weye cyjaꞌ: Aya xinak, queꞌyintza ex kꞌonca cwent tiꞌj tcyakilju cxel nmaꞌne teya cyiꞌj ke tumel ex ke ley tiꞌj njaye. Kꞌonca cwent tiꞌj alcye ke at cyoclen tuꞌn cyocx tuj ex alcye ke mintiꞌ cyoclen tuꞌn cyocx.

6 Kꞌmanxa cye aj Israel akeju miban che bin: Atzun jlu in tmaꞌn Kman: Nimxix cybinchbene mya baꞌn, akeye aj Israel. 7 Ma baj cytzꞌilsaꞌne njaye tuꞌnju ma txi cykꞌoꞌne ambil cye stranjer xjal tuꞌn cyocx tuj, akeju mya sircunsidarimaj ke ex miban che niman nyole; ma baj cytzꞌilsaꞌne tuꞌnju in cub cykꞌoꞌne nwitze ic tzaꞌn wabj aju seb ex chicꞌ nneꞌl tiꞌj chojbil, ex tuꞌn tcyakil cybinchbene mya baꞌn ma che icꞌe tibaj ju yol cyaj bant tiꞌj wuꞌne cyucꞌile. 8 Mintiꞌ ma che japun ke nleye cyuꞌne tuꞌn cybinchet ke tiꞌxti xjan o txi nmaꞌne cyeye, nok oꞌcx ma txi cykꞌoꞌne tuj cycwent stranjer xjal.

9 Cyjaꞌtzun akine Dios cxel nmaꞌne jlu: Mi jun stranjer xjal cꞌoquex tuj njaye ka mya sircunsidarimaj ex ka miban niman nyole; ex milpe jun stranjer xjal cꞌoquex tuj, aju ax najl cyxol aj Israel. 10 Ke aj Leví, akeju el cypaꞌn cyib wiꞌje junx cyucꞌil ke mastl aj Israel, ex in cyaj coline cyuꞌn tej cyxiꞌ cꞌulul cywitz tilbilal, il tiꞌj cbel cycastiw tuꞌn tlaj cyil. 11 Atzun ke che bel ten xkꞌukil cytziꞌ ke tpwertil njaye ex che akꞌnal tiꞌj mastl akꞌuntl at tuj; atzun ke baꞌn tuꞌn cycub byonte cye alumaj in che cub patit, ex keju nnuꞌl cyiꞌn xjal te chojbil; ax icx list che tel tuꞌn cyonin cyiꞌj xjal. 12 Atzun ke e ajben cyxol aj Israel tej cycꞌulun cywitz tilbilal, ex nok cyuꞌn aj Leví e binchan aj Israel il. Cyjaꞌtzun akine Dios in xi nmaꞌne jun yol axix toc, cbel cycastiw tuꞌn tlaj il o cybincha. 13 Mlay che oc te pal tuꞌn cyajben weye ex mi tuꞌn toc cymacoꞌn ke tiꞌxti xjan mi keju mas xjanxix. Il tiꞌj ctzajel cychꞌixwi tuꞌn tlaj cybinchben icꞌbilxix. 14 Oꞌcx cxel nkꞌoꞌne cyoclen tuꞌn toc cycwentin tcyakilju at tuj njaye, ex tuꞌn cybinchante ke akꞌuntl chꞌin cyoclen in che bant tuj.

15 Ke pal aj Leví akeju tiyjil Sadoc, ex akeju cucx e ajben tuj njaye tej tel cypan cyib mastl aj Israel wiꞌje, at cyoclen tuꞌn cyajben weye. Atzun ke baꞌn tuꞌn cycub ten nwitze tuꞌn ttzaj cykꞌoꞌn cysebyil ex cychcꞌel ke chojbil weye. Akine Dios in chin kꞌmante jlu. 16 Oꞌcx ke jlu baꞌn tuꞌn cyocx tuj njaye ex tuꞌn cypon lakꞌeꞌ tiꞌj n-altare tuꞌntzun cyajben weye, ex tuj cycwent cyjel ten ju akꞌuntl at tuj njaye. 17 Oc cyocx ttzi pwert tuꞌn cyocpun tuj tcabin ttxaꞌn peꞌn, il tiꞌj tuꞌn toc cykꞌoꞌn cyxbalun sak queꞌyin ex tzꞌumin twitz. Octzun cyajben tuj tcabin ttxaꞌn peꞌn ex ka tuj njaye, mlay tzꞌoc cykꞌoꞌn cyxbalun lan. 18 Ex cꞌoquel cykꞌoꞌn jun xbalun cꞌalbil cywiꞌ sak queꞌyin ex tzꞌumin twitz, ax icx cꞌoquel cykꞌoꞌn cycalsonsiy xbalun sak queꞌyin ex tzꞌumin twitz, ex miꞌn tzꞌoc cykꞌoꞌn cꞌalbil cycꞌuꞌj tuꞌntzun miꞌn ttzaj aꞌ cyiꞌj. 19 Ex naꞌnxtok cyelel tuj tnejel ttxaꞌn peꞌn jatum in che cub ten xjal, il tiꞌj cꞌelel cyiꞌn cyxbalun aju toc cyiꞌj oc cyajben tuj njaye, tuꞌntzun miꞌn cyxjanset xjal tuꞌn cyxbalun, ax cyjel cykꞌoꞌn cyuj cwart ateꞌ tuj njaye, ex cꞌoquel cykꞌoꞌn juntl cyxbalun.

20 Miꞌn tzꞌel cycꞌoꞌxin tiꞌj cywiꞌ ex miꞌn cub cychꞌisun, nok oꞌcx tuꞌn tel chꞌinak ttxaꞌn cyuꞌn. 21 Mi jun pal cxel tcꞌaꞌn taꞌl twitz uva oc tocx tuj tcabin ttxaꞌn peꞌn. 22 Mintiꞌ tuꞌn tmojeꞌ tucꞌil jun meba xuꞌj ex mi tucꞌil jun xuꞌj otok cub tpaꞌn tib tucꞌil tchmil, oꞌcx tuꞌn tmojeꞌ tucꞌil jun xuꞌj aj Israel naꞌnxtok tlonte xinak ex ka tucꞌil jun meba xuꞌj t-xuꞌjilben jun ktzan pal.

23 Il tiꞌj tuꞌn t-xi cykꞌoꞌn pal xnakꞌtzbil cye xjal etzan wuꞌne, tuꞌn tel cynicꞌ tiꞌj alcye xjan ex alcye mya xjan, ex tuꞌn tel cynicꞌ tiꞌj alcye sak ex alcye tzꞌil. 24 Oc cyjaw kꞌojl xjal, atzun ke pal che oquel te jwes tuꞌn t-xi binchet cyiꞌj ic tzaꞌn in tmaꞌn nleye. Che japunel cycyakil nleye cyuꞌn, ex ke nxnakꞌtzbile aju in yolin cyiꞌj cycyakil ninkꞌij kꞌmamaj wuꞌne, ex cxel cyniman ke kꞌij te ojlabl xjansaꞌmaj wuꞌne.

25 Miꞌn tzꞌoc cymacoꞌn pal jun cyimni tuꞌntzun miꞌn tbaj cytzꞌilsan cyib. Katzun ka a cyman ma cyim, ex ka cytxuꞌ, ex ka jun cycyꞌajal, ex ka jun cymeꞌjel, ex ka jun cyerman xinak ex ka jun cyanb naꞌnx tmojeꞌ; baꞌntzun tuꞌn toc cymacoꞌn. 26 Ka ma tzꞌoc cymacoꞌn, il tiꞌj tuꞌn tbaj cytxꞌjon cyib, ex te tibajxi che ayol wuk kꞌijtl. 27 Octzun cyocx juntl maj tuj tcabin ttxaꞌn peꞌn twitz njaye tuꞌn cyajben, cxel cykꞌoꞌn jun chojbil cyil. Akine Dios ma chin kꞌmante jlu.

28 Oꞌcxcu akine chin oquel te cyetzbil ke pal. Mintiꞌ jun etzbil cxel kꞌoꞌn cye cyxol aj Israel. Akine aju cyetzbil. 29 Baꞌn t-xi cywaꞌn twitz awal aju in tzaj cykꞌoꞌn aj Israel te oyaj weye, ex baꞌn t-xi cychyoꞌn tchibjal alumaj aju in tzaj kꞌoꞌn weye te chojbil cyil xjal ex cypaltil, ax icx tcyakilju ma tzꞌel cypaꞌn aj Israel tuꞌn ttzaj cykꞌoꞌn weye, baꞌn tuꞌn t-xi cynicꞌben. 30 Ax icx cxel cykꞌoꞌne cye pal aju tnejel twitz awal tbanilxix, ex cycyakil txcaj oyaj tbanilxix. Ex oc tbant tten tkꞌotjil pan cyuꞌne, aju tbanilxix, cxel cykꞌoꞌne cye ke pal tuꞌntzun cycub ncyꞌiwlaꞌne keju ateꞌ tuj cyjaye. 31 Miꞌn txi cychyoꞌn pal jun chyuꞌj ex ka jun alumaj tajx otok cyim, ex ka otok baj tzakin cyuꞌn txcup te tjakꞌ cꞌul.