Ul meltzꞌaj tajwalil Kman tuj tja Dios
43
Inx kꞌiꞌne tuꞌn xinak ttzi pwert tuj tjawitz kꞌij, 2 ex o wile tajwalil Cydios aj Israel cyjaꞌ ttzaj tuj tjawitz kꞌij. Aju tkꞌajkꞌajel twiꞌ ic tbinx ic tzaꞌn tkꞌajkꞌajel twiꞌ jun nima in jululun wen, ex biꞌx baj noj twitz txꞌotxꞌ tuꞌn t-spicꞌumal. 3 Aju tzaj yecꞌun weye ic tzaꞌn tuj witzicꞌ ax ic tzaꞌn ju tzaj yecꞌun weye tej tul Kman xitul te tnam Jerusalén, ex ic tzaꞌn ju tzaj yecꞌun weye ttxlaj ju nima Quebar. In cub ẍmejeꞌye ex pon tacl tibaj nwitze twitz txꞌotxꞌ, 4 ex aju tajwalil Kman ocx ttzi ja tcub tuj tjawitz kꞌij ex ocx max tujxi tja Dios.5 In jaw kꞌiꞌne tuꞌn T-xew Dios ex inx kꞌiꞌne tuꞌn tuj tcabin ttxaꞌn peꞌn, ex o wile tajwalil Kman otok baj noj tuj tja tuꞌn. 6 Cub ten xinak ntxlaje, ex o nbiye tzaj yolin Kman weye max tujxi tja 7 ex tzaj tmaꞌn weye cyjaꞌ: Atzunju lugar lu jatum tcub nkꞌukbile, ex ju lugar jatum in che cub ten ke nkane; atzun chin najale tzalu cyxol aj Israel te jumajx. Ke aj Israel ex ke cyrey mlay tzꞌoc cykꞌoꞌn juntl maj nbiye xjan te mintiꞌ tajben, miꞌn che cꞌulun cywitz tilbilal ex mlay jaw cybinchaꞌntl cypantyón ktzan cyrey twitz tja Dios. 8 Jaw cybinchaꞌn tja cyrey, cyaj ten tpwertil junx tucꞌil tpwertil njaye, nok oꞌcx jun pared cyaj ten t-xol. Tuꞌn jlu oc cykꞌoꞌn nbiye xjan te mintiꞌ tajben tuꞌn cybinchben icꞌun wuꞌne; cyjaꞌtzun tzaj nkꞌoje cyiꞌj ex e cyim wuꞌne. 9 Atzun jaꞌlo cyjel cycolin tuꞌn cycꞌulun cywitz ke tilbilal ex cꞌelex cylakꞌbaꞌn cyximlal cyrey otok che cyim, ex te jumajx chin najale cyxol. 10 Atzun teya xinak, kꞌmanxa cye aj Israel tiꞌj ju ma tila tiꞌj tja Dios, ex baꞌn tuꞌn toc cykꞌoꞌn cwent tiꞌj echbin te, tuꞌntzun ttzaj cychꞌixwi tiꞌj ju il o cybincha. 11 Ka ma tzaj cychꞌixwi tiꞌj tcyakilju o cybincha, kꞌmanxa cye tzaꞌn tten tja Dios ex alcye at tuj, cyiꞌj ke ttzi ja jatum in che etz xjal ex jatum in che ocx, ex tiꞌj tcyakil echbin te, ax icx kꞌmanxa cye cyiꞌj ke ley il tiꞌj tuꞌn tjapun cyuꞌn. Tzꞌibancuya tilbilal tcyakil jlu, tuꞌntzun telxix cynicꞌ tiꞌj tzaꞌn queꞌyin tja Dios ex tuꞌn tbant cyuꞌn. Ax icx tzꞌibancuya cycyakil ley tuꞌntzun tjapun cyuꞌn. 12 Atzun ley lu tiꞌj tja Dios: tcyakil txꞌotxꞌ at tiꞌjele tja Dios twi witz cꞌoquel te jun lugar xjanxix.
Aju altar
13 Atzun ke echbil tiꞌj altar jlu. Tiꞌjele altar attok jun tbe aꞌ te mey metro t-xeꞌ ex mey metro twitz, ex ttziꞌyile tbe aꞌ tjawsaꞌn jun tal muro te 25 sentímetro twaꞌl. Aju tkꞌukbil altar atzun tten cyjaꞌ: 14 tzajnix keꞌ twitz txꞌotxꞌ ex tuꞌn tjapun tiꞌj tnejel col, attok jun metro twaꞌl. Aju tnejel col ocnix tiꞌn tib mey metro. Aju tcabin col attok cabe metro twaꞌl, ax icx ocnix tiꞌn tib mey metro. 15 Aju toxin col atzun jatum in che cub patit chojbil, ex attok cabe metro twaꞌl. Ex twiꞌ toxin col attok cyaje tcach. 16 Aju toxin col altar junxtok taꞌ echbin te twitz tucꞌil tnukbil, kak metro junjun pacꞌ ttxlaj. 17 Ax icx tcabin col junxtok taꞌ echbinte twitz tucꞌil tnukbil, wuk metro junjun pacꞌ ttxlaj. Aju tbe aꞌ toctok tiꞌjele, attok mey metro twitz, ex ttziꞌyile tbe aꞌ tjawsaꞌn jun tal muro te 25 sentímetro twitz. Ke grad tuꞌn kjapun tibaj altar a cycub ke tuj tumlal tjawitz kꞌij.
18 Ex tzaj tmaꞌn Kman weye cyjaꞌ: Oc tpon tkꞌijlalil tuꞌn tjaw binchet altar, il tiꞌj tuꞌn cyjapun ke ley lu: Cbel cypatun jun alumaj te chojbil tibaj altar, ex cꞌoquel cychitun chicꞌ tiꞌjele altar. 19 Ake pal aj Leví, akeju tiyjil Sadoc, atzun ke baꞌn tuꞌn cyul lakꞌeꞌ nwitze tuꞌn cyajben weye; cxel tkꞌoꞌna jun tal tor cye tuꞌntzun t-xi cykꞌoꞌn te chojbil il. Akine Dios ma chin kꞌmante jlu. 20 Ex cxel tiꞌna chꞌin tchcꞌel tal tor ex cꞌoquel tchituna tiꞌj cycyajil tcach altar, ex tiꞌj cycyajil tbutxꞌ tcabin txol ex tiꞌj tal muro tjawsaꞌn ttziꞌyile tbe aꞌ, cyjaꞌtzun tten cbajel sakix altar tuꞌna ex cꞌelel ju il tiꞌj. 21 Ex aju tal tor otok txi kꞌot te chojbil il, ctzajel tiꞌna ex cbel tpatuna tiꞌjxi tpeꞌn tja Dios, tuj ju lugar axix til tuꞌn cycub patit. 22 Tuj tcabin kꞌij cxel tkꞌoꞌna jun tal tman chip mintiꞌ tpaltil te chojbil il, ex cbajel cysaksaꞌn pal altar ic tzaꞌnx otok baj cysaksaꞌn tuꞌn tchcꞌel tal tor. 23 Octzun tbaj t-saksaꞌna altar, ctzajel tiꞌna jun tal tor ex jun tman ẍneꞌl, cycabil mintiꞌ chꞌin cypaltil, 24 ex che tzajel tiꞌna nwitze. Atzun cye pal cbel cychitun atzꞌan cyibaj ex che bel cypatun te oyaj te nimbil weye. 25 Teyle junjun kꞌij tuj enter wuk kꞌij cbel tbyoꞌna jun tal tman chip te chojbil il, tucꞌix jun tal tor ex jun tman ẍneꞌl, cycyakil jlu mintiꞌ chꞌin cypaltil. 26 Teyle junjun kꞌij tuj enter wuk kꞌij il tiꞌj tuꞌn tbaj cysaksaꞌn pal tcyakil altar, tuꞌntzun tajben te weye. 27 Atzun jlu cbantel cyuꞌn pal tuj enter wuk kꞌij. Tujtzun twajxakin kꞌij atzun ckebil tuꞌn t-xi cykꞌoꞌn oyaj patun in cub tibaj altar, ex tuꞌn t-xi cykꞌoꞌn chojbil te mojbabl tibil. Octzun che cꞌmetele wuꞌne tucꞌil tzalajbil. Akine Dios ma chin kꞌmante jlu.