Ke ja ateꞌ ttxlaj tja Dios
42
Te tibajxi in pon kꞌine tuꞌn xinak tuj tnejel ttxaꞌn peꞌn tiꞌjxi tja Dios, aju tcub tuj tumlal tbankꞌab kꞌij, ex in ocx kꞌiꞌne tuꞌn cyuj ke cwart cycub tuj tumlal tbankꞌab kꞌij, twitz ttxaꞌn peꞌn peꞌnin tiꞌj ax icx twitz ja tcub tiꞌjxi tja Dios. 2 Jatum cycub ke ja lu, attok 50 metro tnukbil tuj tumlal tbankꞌab kꞌij, ex 25 metro twitz. 3 Tuj jun pacꞌ cytxlaj cyjaꞌ xiꞌyni tumlal tcabin ttxaꞌn peꞌn aju attok laj metro twitz, atzun juntl pacꞌ cytxlaj cyjaꞌ xiꞌyni tumlal tnejel ttxaꞌn peꞌn aju loꞌtzintok xak twitz txꞌotxꞌ tuj, attok ox col, ex teyle junjun col attok jatum tuꞌn kbet twitz ex cycubsaꞌntok cywitz juntl ox col. 4 Cywitz ke cwart attok jun cay te jweꞌ metro twitz ex 50 metro tnukbil max tujxi. Ke cypwertil cwart cyjaꞌ xiꞌyni cywitz tuj tumlal tbankꞌab kꞌij. 5 Ke cwart ateꞌ tuj toxin col ja mas chꞌin ke cywitz keju ateꞌ tuj tcabin col ex tuj tnejel col, porque aju jatum tuꞌn kbet cywitz ke cwart tuj toxin col, mas maꞌ twitz twitz ju tuj tcabin col ex tuj tnejel col. 6 Ke cwart lu te ox colin cyten, pero mintiꞌtok cykan ic tzaꞌn ke mastl cwart ateꞌ ttxaꞌn peꞌn, nok oꞌcx ke cwart te toxin col mas chꞌin cyuj cywitz ke cwart te tcabin col ex tnejel col.7 Tcubsaꞌntok jun muro ttxaꞌn tnejel ttxaꞌn peꞌn ex cywitz ke tal cwart, ex attok 25 metro tnukbil. 8 Aju tnukbil jatum cycubsaꞌn ke tal cwart ttxlaj tnejel ttxaꞌn peꞌn attok 25 metro. Atzun tnukbil jatum cycubsaꞌn ke tal cwart ttxlaj tja Dios attok 50 metro. 9 Tuj tnejel col cwart attok jun ttzi ja tcub tumlal tjawitz kꞌij jatum in che ocx xjal in che tzaj tuj tnejel ttxaꞌn peꞌn. 10 Twitzile muro tuj tnejel ttxaꞌn peꞌn tuj tumlal tnayaj kꞌij ax icx attok ke cwart cycubsaꞌn twitz ttxaꞌn peꞌn peꞌnin tiꞌj, ax twitz ju ja tumlal telex kꞌij te tja Dios; 11 junx taꞌ binchben cye ex junx taꞌ echbin cye ic tzaꞌnx ke cwart ateꞌ tuj tumlal tbankꞌab kꞌij, ex ke ttzi ja icx cyten ic tzaꞌnx ke ttzi ja ateꞌ tuj tumlal tbankꞌab kꞌij, ex attok jun cay nnoꞌcx cywitz. 12 Tuꞌn tpon jun xjal jatum ateꞌ ke cwart tuj tumlal tnayaj kꞌij, attok jun pwert jatum in tzaj keꞌ ju cay aju tcub twitz ju muro in ajben te makbil, aju tcub tumlal tjawitz kꞌij.
13 Tzajtzun tmaꞌn ju xinak weye cyjaꞌ: Tzaꞌnx keju cwart ateꞌ tuj tumlal tbankꞌab kꞌij icx keju ateꞌ tuj tumlal tnayaj kꞌij, akeju cycub twitz ttxaꞌn peꞌn peꞌnin tiꞌj xjansaꞌmaj ke. Akeju pal in che pon lakꞌeꞌ twitz Kman in xi cychyoꞌn ke oyaj mas xjanxix cyuj ke cwart lu. Ax icx cyuj ke cwart lu in cub cykꞌoꞌn ke oyaj mas xjanxix, ic tzaꞌn ke oyaj twitz awal, ex ju oyaj te chojbil il ex ju oyaj te chojbil cypaltil xjal, porque aju lugar lu xjan te. 14 Oc cyocx ke pal tuj tja Dios, mlay che etz tuꞌn cyeꞌlel tuj tnejel ttxaꞌn peꞌn ka naꞌnxtok tcyaj cychꞌexpuꞌn cyxbalun, aju in ajben cyuꞌn oc in che akꞌnan tuj tja Dios, porque aju xbalun lu xjan. Oc cyeꞌlel jatum ateꞌ ke xjal, il tiꞌj cꞌoquel cykꞌoꞌn juntl cyxbalun.
Aju echbin te txꞌotxꞌ jatum tcubsaꞌn tja Dios
15 Tejtzun tbaj techan xinak tja Dios ex ke mastl cwart ex ke ttxaꞌn peꞌn, in ex kꞌiꞌne tuꞌn ttzi ju pwert tcub tuj tjawitz kꞌij ex in elpune tiꞌjxi, ex oc ten xinak echil te muro toc tiꞌjele txꞌotxꞌ te tja Dios. 16 Tzaj tiꞌn aju ajlaj in ajben te echbil, ex xi techan ttxlaj tcub tumlal tjawitz kꞌij: ex attok 250 metro. 17 Icx xi techan ttxlaj tuj tumlal tbankꞌab kꞌij, ax icx attok 250 metro: 18 ex xi techan ttxlaj tcub tuj tumlal tnayaj kꞌij, ax icx attok 250 metro; 19 ex te bajsbil xi techan ttxlaj tcub tumlal telex kꞌij, ax icx attok 250 metro. 20 Xi techan txꞌotxꞌ tuj cycyajil pacꞌ ttxlaj. Aju txꞌotxꞌ jatum tcubsaꞌn tja Dios attok jun muro toc tiꞌjele te 250 metro echbin te junjun pacꞌ ttxlaj, ex atzunju nneꞌl paꞌnte txꞌotxꞌ xjan tucꞌil ju txꞌotxꞌ mya xjan.