5 Te tibajxi xi techan xinak tcajonil tja Dios, ex attok ox metro tpimil. Tiꞌjele tja Dios ateꞌc tal cwart te cabe metro cyuj. 6 Ke cwart lu te ox colin cyten, ex tuj junjun col attok 30 tal cwart. Aju tcajonil tja Dios mas chꞌin tpimil tuj tcabin col ax icx tuj toxin col; ex tibajtzun junjun grad in che cub ten ke viga cye tal cwart; cyjaꞌtzun mintiꞌ ocx lacuꞌn tcajonil tja Dios tuꞌn tocx ten cywiꞌ viga tuj. 7 Ke tal cwart tuj tcabin col mas maꞌ cyuj ic tzaꞌn ke cwart ateꞌ tuj tnejel col, ex ke cwart tuj toxin col mas maꞌ cyuj ic tzaꞌn ke cwart ateꞌ tuj tcabin col. Ex tuj tnejel col at grad tuꞌn kjapun tuj tcabin col, ax icx tuj tcabin col tuꞌn kjapun tuj toxin col. 8 O wile tja Dios cyucꞌix ke tal cwart ateꞌc tiꞌjele cycub ke tibaj jun simyent. Aju simyent lu at ox metro twaꞌl, 9-10 Aju cycajonil tal cwart te tiꞌjxi attok cabe metro tucꞌil mey tpimil; cyxol ke cwart ateꞌc tiꞌjele tja Dios ex ke cwart cye pal, attok jun cay te laj metro twitz. 11 At jun ttzi ja tuꞌn kocx cyuj ke cwart cycub tuj tumlal tbankꞌab kꞌij, ex at juntl ttzi ja tuꞌn kocx cyuj ke cwart cycub tuj tumlal tnayaj kꞌij. Aju muro toc ttxaꞌnile ju cay, te cabe metro tucꞌil mey tpimil.

12 Tiꞌjxi tja Dios tuj telex kꞌij, attok jun ja te 35 metro twitz, ex 45 metro tnukbil, ex aju tcajonil ja cabe metro tucꞌil mey tpimil.

13 Xi techan xinak tja Dios, ex aju echbilte tuꞌn tcyakil, 50 metro tnukbil. Atzun ju cay taj tiꞌjxi tja Dios tuj telex kꞌij, tucꞌix ju ja ex ke tcajonil, ax icx attok 50 metro tnukbil. 14 Aju twitz tja Dios, tucꞌix tcabin ttxaꞌn peꞌn tcub tuj tjawitz kꞌij at 50 metro twitz. 15 Ex xi techan tnukbil ja aju tcub tiꞌjxi tja Dios tucꞌix cay cyucꞌix ke twitz ja junjun pacꞌ, attok 50 metro tnukbil.

Aju Lugar Xjan ex aju Lugar Mas Xjanxix ex tucꞌixju tal cwart tcub ttzi tja Dios 16-17 toctok tzꞌlom cyiꞌj. Ke ventan toc cꞌuxbil xawcꞌin tten cyiꞌjele, ex ke cymarquil ventan tzꞌlomintok tcyakil cyiꞌjele, xiꞌynix keꞌ twitz txꞌotxꞌ ex japun baj cyiꞌj ventan; ax icx tibaj pwert toc tzꞌlom. Aju tcajonil tja Dios tujxi ex tiꞌjxi, 18 toctok cyilbilal querubín ex cyilbilal tkan xaꞌj twitz. T-xol jun querubín tucꞌil juntl querubín toctok jun tkan xaꞌj. Teyle junjun querubín at cabe twitz; 19 tuj jun pacꞌ ic queꞌyin cywitz ic tzaꞌn queꞌyin twitz jun xinak ex cyjaꞌ in xi tqueꞌyin tiꞌj tkan xaꞌj, atzun juntl cywitz ic queꞌyin ic tzaꞌn twitz jun balun, ex cyjaꞌ in xi tqueꞌyin tiꞌj juntl tkan xaꞌj. Ex iclex xiꞌyni tcyakil tujile tja Dios. 20 Attok cyilbilal querubín ex cyilbilal tkan xaꞌj toc twitz, xiꞌynix keꞌ twitz txꞌotxꞌ ex japun baj max cyibaj ke pwert twitzile tcyakil tcajonil tja Dios. 21 Tuj ju Lugar Xjan, akeju tmarquil ttzi ja junx taꞌ echbin te tpimil tcyajil pacꞌ.

Twitz Lugar Mas Xjanxix attok jun tiꞌxti ic queꞌyin 22 ic tzaꞌn jun altar tzeꞌ ttxꞌotxꞌil, ex aju echbin te, jun metro junjun pacꞌ ttxlaj, ex jun metro tucꞌil mey twaꞌl. Attok ke tbutxꞌ; aju tkꞌukbil ex tcajonil puro tzeꞌ tcyakil. Atzunte xinak tzaj tmaꞌn weye cyjaꞌ: Atzun mes jlu tcub twitz Kman.

23 Tzaꞌnx ju Lugar Xjan ax icx ju Lugar Mas Xjanxix, attok cylamel te cabe tten junjun pacꞌ. 24 Teyle junjun tlamel ja attok cabe piẍ junjun pacꞌ ex cycabil plaj tlamel ja in che jaket. 25 Ke tpwertil Lugar Xjan toctok cyilbilal querubín ex cyilbilal tkan xaꞌj cywitz, ic ke ic tzaꞌn keju toc twitz tcajonil tja Dios. Ex attok jun xmuꞌj tjax tibaj ttzi ja teju cwart tcub twitz tja Dios. 26 Twitz tcajonil ju cwart tcub twitz tja Dios attok ke tventanil ex toclex cꞌuxbil xawcꞌin tten cywitz, ex toctok cyilbilal tkan xaꞌj cyiꞌj. Ax icx ke tal cwart ateꞌ tiꞌjele tja Dios attok ke xmuꞌj tjax cyibaj ttzi ja.