2 Mer ic tzaꞌn tuj witzicꞌ inx kꞌiꞌne tuꞌn Kman tuj cytxꞌotxꞌ aj Israel, ex in cub kꞌoꞌne tuꞌn twiꞌ jun witz maꞌxix twaꞌl; twiꞌtzun ju witz lu wile txkan ja mer ic tzaꞌn jun nintz tnam tuj tumlal tnayaj kꞌij. 3 Inx kꞌiꞌne tuꞌn Kman ma chixin, ex o wile jun xinak in koptzꞌaj tiꞌj ic tzaꞌn tiꞌj kꞌan cꞌuxbil, waꞌltok ttzi tpwertil tnam, kꞌiꞌntok jun cyꞌjaj tuꞌn banimaj tiꞌj lino, tucꞌix jun ajlaj in ajben te echbil. 4 Ex tzaj tmaꞌn ju xinak lu weye cyjaꞌ: Aya xjal, queꞌyintza ex bintza; kꞌoꞌnca cwent tiꞌj ju cxel nyecꞌune teya, porque atzun til ma tzul kꞌiꞌna tzalu tuꞌn t-xi nyecꞌune teya. Ex cxel tmaꞌna cye aj Israel tcyakilju oc tilaꞌya.

5 Tiꞌjtze tja Dios attok jun muro toc tiꞌjele. Aju ajlaj kꞌiꞌntok tuꞌnju xinak attok ox metro tkan. Xitzun techan ju muro, ex attok ox metro twitz ex ox metro twaꞌl. 6 Te tibajxi, xiꞌ ttzi ja aju xiꞌyni twitz tuj tjawitz kꞌij, jax cywiꞌ ke grad ex xi techan aju ttzi tmarquil pwert, ex attok ox metro twitz. 7 Akeju tal cwart ateꞌc ttxlaj junjun pacꞌ ttzi ja, teyle junjun attok ox metro tnukbil ex ox metro twitz, ex aju t-xol jun tal cwart tucꞌil juntl tal cwart attok cabe metro tucꞌ mey. Ex attok ox metro twitz aju ttzi ja te tujxi jatum tuꞌn kocx tuj juntl tal cwart, aju xiꞌyni twitz tumlal tja Dios. 8-9 Xi techan xinak ju cwart tocx tujxi tumlal twitz tja Dios, ex aju cwart attok cyaje metro twitz. Attok cabe tmarquil ja te jun metro tpimil junjun. 10 Cycubsaꞌntok ox tal cwart tuj junjun pacꞌ ttzi ja aju tcub tumlal tjawitz kꞌij, ex cycyakil junx taꞌ echbin cye, ax icx junx taꞌ echbin cye ke tkan ja cycubsaꞌn ttxlaj junjun pacꞌ.

11 Ex xi techan xinak ttzi ja, ex attok jweꞌ metro twitz, atzunju tnukbil attok kak metro tucꞌil mey. 12 Twitz junjun tal cwart attok jun tal muro tcub te mey metro twaꞌl. Teyle junjun tal ja attok ox metro twitz ex ox metro tnukbil. 13 Ex xi techan tcyakilju twitz ja, xiꞌx keꞌ tuꞌn twi muro te jun tal cwart ex pon baj tuꞌn twi muro te juntl tal cwart tuj juntl pacꞌ, ex attok cablaj metro tucꞌ mey. 14 Xi techan twitz ju tal cwart tocx tujxi; tuꞌn tcyakil attok laj metro twitz. Aju tal cwart lu tcub twitz ttxaꞌn tpeꞌn tja Dios. 15 Aju tnukbil tcyakil, xiꞌynix keꞌ tiꞌjxi sawán ex tuꞌn tocpun baj max ttzi ju tal cwart te tujxi, attok 25 metro. 16 Attok cyventaniyil ke tal cwart. Ax icx ke pared tcub cyxol tal cwart, ax icx ju cwart tocx max tujxi attok tventaniyil. Attok tventaniyil tcyakil tujile. Ex cyiꞌj ke pared toctok tilbilal tkan xaꞌj.

17 Te tibajxi inx kꞌine tuꞌn xinak tuj tnejel ttxaꞌn peꞌn toc tiꞌj ox pacꞌ tja Dios. Ex tuj ttxaꞌn peꞌn lu loꞌtzintok abj twitz txꞌotxꞌ ttxaꞌnile, ex attok 30 tal cwart tcub ttxaꞌnile. 18 Aju ttxaꞌn peꞌn lu, aju loꞌtzintok abj twitz txꞌotxꞌ ttxaꞌnile, mas cubni taꞌ, ex loꞌtzintok abj twitz txꞌotxꞌ ttxaꞌnile ttxaꞌn peꞌn cywitz ke tal cwart, ex junxtok taꞌ echbin twitz tucꞌil cynukbil ke sawán. 19 Xi techan xinak twitz tnejel ttxaꞌn peꞌn, xiꞌx keꞌ tuꞌn twitz ju tal ja te tujxi ex pon baj ttzi ja jatum tuꞌn kocx tuj tcabin ttxaꞌn peꞌn, ex attok 25 metro t-xol.

20 Ax icx attok jun ttzi ja cyjaꞌ xiꞌyni twitz tuj tumlal tbankꞌab kꞌij, tcub twitz tnejel ttxaꞌn peꞌn. Xi techan xinak tnukbil ex tuj t-ẍcyin. 21 Ax icx attok ox tal cwart tcub ttxlaj junjun pacꞌ ttzi ja lu, ex at ke pared cycub cyxol tal cwart, ex juntl cwart tocx tujxi, icpunx ke ic tzaꞌn keju ateꞌc ttzi ja tcub tuj tjawitz kꞌij, attok 25 metro tnukbil ex cablaj tucꞌ mey tuj t-ẍcyin. 22 Aju tal cwart tocx tujxi, ex ke tventaniyil ex ke tilbilal tkan xaꞌj, icpunx ke ic tzaꞌnx keju ateꞌc ttzi ja tcub tuj tjawitz kꞌij. Ax icx attok wuk grad tuꞌn kjax bet tibaj, ex aju tal cwart mas maꞌ max tujxi taꞌ. 23 Tzaꞌnx ju ttzi ja tcub tuj tjawitz kꞌij, ax icx aju ttzi ja tcub tuj tumlal tbankꞌab kꞌij twitz ju tnejel ttxaꞌn peꞌn, attok juntl ttzi ja in xiꞌ tuꞌn tocpun tuj ju tcabin ttxaꞌn peꞌn. Xi techan xinak cyxol, xi keꞌ tiꞌj jun ttzi ja tuꞌn tpon tiꞌj juntl ttzi ja ex attok 50 metro t-xol.

24 Inx kꞌiꞌne tuꞌn xinak jatum taꞌ ttzi ja tcub tuj tumlal tnayaj kꞌij, ex xi techan ke pared tcub cyxol ke tal cwart tucꞌix tal cwart mas maꞌ tocx max tujxi, ex aju echbin cye junx taꞌ ic tzaꞌn ke txkantl. 25 Aju ja jatum nnoꞌcx be tuꞌn tocpun tujxi tnejel ttxaꞌn peꞌn tucꞌix ju tal cwart mas maꞌ tocx max tujxi, attok tventaniyil tcyakil tiꞌjele, ic tzaꞌnx ke txkantl. Aju echbin te tcyakil, attok 25 metro tnukbil ex cablaj metro tucꞌ mey tuj t-ẍcyin. 26 Ax icx attok wuk grad tuꞌn kjax bet tuꞌn kocx tuj ja, ex aju tal cwart mas maꞌ tocx max tujxi. Ax icx ke pared tcub cyxol ke tal cwart toctok tilbilal tkan xaꞌj cyiꞌj, junjun tuj junjun pacꞌ ttxlaj. 27 Aju tcabin ttxaꞌn peꞌn tocx tujxi ax icx attok jun tpwertiyil cyjaꞌ xiꞌyni twitz tuj tumlal tnayaj kꞌij. Xi techan xinak nicꞌpun cyxol cabe pwert, akeju cycub tuj tumlal tnayaj kꞌij, ex attok 50 metro cyxol.

28 Inx kꞌiꞌne tuꞌn xinak jatum taꞌ ttzi ja tuj tumlal tnayaj kꞌij tuꞌn wocxe tuj tcabin ttxaꞌn peꞌn. Xi techan ju ttzi ja lu, ex ax echbin te ic tzaꞌnx echbin cye ke txkantl ttzi ja. 29 Ke tal cwart ex ke pared tcub cyxol ke tal cwart, tucꞌix tal cwart mas maꞌ, junx taꞌ echbin cye ic tzaꞌn ke txkantl. Aju ja jatum nnoꞌcx be tuj tuꞌn tocpun tujxi, ex aju tal cwart mas maꞌ, attok tventaniyil tcyakil tiꞌjele, ex aju echbin te tuꞌn tcyakil, attok 25 metro tnukbil ex cablaj metro tucꞌ mey tuj t-ẍcyin. 30 Ke twitz ja, cablaj var tucꞌ mey cynukbil ex cab var tucꞌ mey cywitz. 31 Aju tal cwart mas maꞌ tcub jatum nnoꞌcx be tuꞌn tocpun tuj tcabin ttxaꞌn peꞌn. Ex toctok tilbilal tkan xaꞌj cyiꞌj ke pared tcub cyxol ke tal cwart. Ex attok wajxak grad tuꞌn kjax bet tuꞌn kjapun ttzi pwert.

32 Te tibajxi inx kꞌiꞌne tuꞌn xinak tuj tcabin ttxaꞌn peꞌn jatum taꞌ ttzi ja tuj tumlal tjawitz kꞌij, ex xi techan ttzi ja jatum tuꞌn kocx tuj tcabin ttxaꞌn peꞌn, ex aju echbin te junx taꞌ ic tzaꞌn ke mastl. 33 Akeju tal cwart ex ke pared cycub cyxol ke tal cwart ex juntl tal cwart mas maꞌ, junx taꞌ echbin cye ic tzaꞌn ke mastl. Aju ja jatum nnoꞌcx be tuꞌn tocpun tujxi tcabin ttxaꞌn peꞌn tucꞌix tal cwart mas maꞌ, attok tventaniyil tcyakil tiꞌjele, ex aju echbin te tuꞌn tcyakil, 25 metro tnukbil ex cablaj metro tucꞌ mey tuj t-ẍcyin. 34 Aju tal cwart mas maꞌ tcub jatum nnoꞌcx be tuꞌn tocpun tuj tcabin ttxaꞌn peꞌn. Ex ke pared cycub cyxol ke tal cwart toctok ke tilbilal tkan xaꞌj tiꞌj junjun pacꞌ. Ex attok wajxak grad tuꞌn kjax bet tuꞌn kjapun ttzi pwert.

35 Ex inx kꞌiꞌne tuꞌn xinak jatum tcubsaꞌn ttzi ja tuj tumlal tbankꞌab kꞌij, xi techan ju ttzi ja jatum tuꞌn kocx tuj tcabin ttxaꞌn peꞌn, ex aju echbin te junx taꞌ ic tzaꞌnx ke mastl; 36 ax icx attok ke tal cwart, cyucꞌix ke pared cycub cyxol ke tal cwart, ex juntl tal cwart mas maꞌ, ex attok cyventaniyil tcyakil tiꞌjele. Aju ja jatum nnoꞌcx be tuꞌn tocpun tuj tcabin ttxaꞌn peꞌn, attok 25 metro tnukbil ex cablaj metro tucꞌ mey tuj t-ẍcyin. 37 Aju tal cwart mas maꞌ tcub tnejel jatum nnoꞌcx be tuꞌn tocpun tuj tcabin ttxaꞌn peꞌn. Ex ke pared cycub cyxol ke tal cwart toctok tilbilal tkan xaꞌj tiꞌj junjun pacꞌ. Attok wajxak grad tuꞌn kjax bet tuꞌn kjapun ttzi pwert.

38 Ax icx attok jun cwart tcubsaꞌntok twitz tal cwart mas maꞌ jatum nnoꞌcx be tuꞌn tocpun tuj tcabin ttxaꞌn peꞌn. Tujtzun cwart lu in baj txꞌjet cyiꞌj ke alumaj tuꞌn cyxi kꞌot te oyaj patun in cub. 39 Tuj ju cwart mas maꞌ attok cyaje mes, cabe junjun pac ttzi ja, cyibajtzun ke mes lu in che cub byoꞌn ke alumaj tuꞌn cyxi kꞌot te oyaj patun in cub, ex ka tuꞌn cyxi kꞌot te chojbil tuꞌn tlaj cyil xjal ex tuꞌn tlaj cypaltil. 40 Ax icx at cyaje mes cycub twitz tal cwart mas maꞌ, cabe junjun pacꞌ ttzi ja tcub tuj tumlal tbankꞌab kꞌij. 41 Cyjaꞌtzun cyaje mes at tujxi ex cyaje mes at tiꞌjxi ttzi ja: wajxak mes tuꞌn tcyakil. Cyibajtzun ke mes lu in che cub byoꞌntok ke alumaj. 42 Ke cyaje mes in che ajbentok tuꞌn cycub patun ke alumaj cyibaj, banimaj ke tiꞌj abj xpeꞌlimaj; ex aju echbin cye 75 sentímetro cynukbil ex 75 sentímetro cywitz, ex 50 sentímetro cywaꞌl, ex cyibajtzun ke jlu in che cub kꞌoꞌn ke macbil in che ajben tuꞌn cycub byet ke alumaj te oyaj patun in cub. 43 Txꞌapoꞌn ke xoc twitzile cwart te tujxi te kak sentímetro cykan. Cyibajtzun ke mes lu in cub kꞌoꞌn cychibjal ke alumaj in che ajben te oyaj.

44 Tuj ju tcabin ttxaꞌn peꞌn attok cabe tal cwart, jun, junx tcub tucꞌil ju ttzi ja at tujxi aju tcub jawni, atzun juntl, junx tcub tucꞌil ju ttzi ja at tujxi aju tcub cubni, ex atzunju cwart cyjaꞌ xiꞌyni twitz jawni.

45 Tzaj tmaꞌn xinak weye: Aju cwart cyjaꞌ xiꞌyni twitz tuj tumlal tnayaj kꞌij, atzun cwart cye ke pal in che ajben tuj tja Dios, 46 ex atzun ju cwart cyjaꞌ xiꞌyni twitz tuj tumlal tbankꞌab kꞌij, atzun cwart cye ke pal in che ajben tuꞌn cycwentin tiꞌj altar. Ake jlu tiyjil Sadoc, ex oꞌcxcu ake aj Leví jacu che pon lakꞌeꞌ twitz Kman tuꞌn cyajben te.

47 Te tibajxi xi techan xinak tcabin ttxaꞌn peꞌn, a jlu cwadrad ttentok ex attok 50 metro junjun pacꞌ ttxlaj. Aju altar tcubtok twitz tja Dios. 48 Inx kꞌiꞌne tuꞌn xinak tuj tal cwart tcub ttzi tja Dios, ex xi techan cypimil ke pared junjun pacꞌ ttziꞌ ja, teyle junjun attok cabe metro tucꞌil mey cypimil. Attok wuk metro twitz pwert, ex ke pared jatum toc tmarquil pwert attok jun metro tucꞌil mey tpimil junjun. 49 Aju tal cwart tcub twitz tja Dios attok laj metro tnukbil ex kak metro twitz, ex attok laj grad tuꞌn tjax kbetin tuꞌn kjapun ttziꞌ tal cwart lu. Ex attok cabe tkan ja tcub twitz tja Dios; jun tcub tuj jun pacꞌ, ex juntl tcub tuj juntl pacꞌ.