Cbel tiꞌj Gog
39
Aya xjal, kꞌmanxa tiꞌj Gog aju yol cxel nmaꞌne teya, ex kꞌmanxa cyjaꞌ: Atzun jlu in tmaꞌn Kman: Ma chin oque aj kꞌoj tiꞌja aya Gog, nejenel maꞌxix toclen te tnam Mesec ex tnam Tubal. 2 Cchꞌexpetel tbeya wuꞌne; cheba ctzajel wiꞌne najchak tuj txꞌotxꞌ tuj tbankꞌab kꞌij ex tzul wiꞌne tuꞌn tula tuj tiwitz txꞌotxꞌ cye aj Israel. 3 Ex cbel ntokine xobl plech kꞌiꞌn tuꞌn tnayaja ex che elel tzꞌak wuꞌne ke plech kꞌiꞌn tuꞌn tbankꞌaba. 4 Atzun teya cyucꞌix ke t-soldadiya ex cyucꞌix nimcu xjal te elaꞌ tnam ucꞌin tuꞌna, che cymele cywiꞌ ke witz tuj cytxꞌotxꞌ aj Israel. Atzun che xel nkꞌoꞌne te cychiꞌ cycyakil txcaj cꞌutz ex te cychiꞌ ke txcup te tjakꞌ cꞌul. 5 Cyjel paleꞌ cyximlale tuj cojbil. Akine Dios in chin kꞌmante jlu. 6 Cxel nsamaꞌne kꞌakꞌ tibaj tnam Magog ex cyibaj ke xjal najl cyuj ke tnam ateꞌ ttziꞌyile mar ex txubtxaj ateꞌ. Cꞌeleltzun cynicꞌ tiꞌj, akine Dios. 7 Wuꞌne cꞌelel cynicꞌ aj Israel tiꞌj nbiye xjan, akeju etzan wuꞌne, ex mlay txi nkꞌoꞌne ambil tuꞌn tyolinjtz mya baꞌn tiꞌj nbiye xjan. Cꞌeleltzun cynicꞌ mastl nasyon tiꞌj, akine Cydios aj Israel xjanxix kine. 8 Aju tkꞌijlalil ma chin yoline tiꞌj, cjapunel ex mlay tzicꞌx tiꞌj. Akine Dios in chin kꞌmante jlu.9 Che eletz aj Israel tuj cytanmi ex cbel cypatun cyubl ke aj kꞌoj, icx ke cymakbil te junxilchak txcajin, ke xobl cyplech, ke cyplech, ke mans in che ajben tuj kꞌoj ex ke cylans; tcyakil jlu cꞌajbel te cysiꞌ tuj enter wuk abkꞌi. 10 Miꞌn cheꞌx jyol siꞌ tuj cojbil, mi tuꞌn cyxiꞌ txꞌemil siꞌ tuj chcꞌul, porque cycyakil ke ubl lu cꞌajbel te cysiꞌ. Cyjaꞌtzun cꞌelel cyiꞌn tcyakilju at cye keju otok che elkꞌan cyiꞌj nej. Akine Dios in chin kꞌmante jlu.
Oc tcuꞌx makuꞌn Gog
11 Tuj tkꞌijlalil tzul cxel nkꞌoꞌne jun piẍ txꞌotxꞌ jatum tuꞌn tcuꞌx makuꞌn Gog, ax tuj cytxꞌotxꞌ aj Israel, aju toc tbi Chkꞌajlaj cye Betin Xjal, aju tcubsaꞌn twitz mar tuj tumlal tjawitz kꞌij. Tuꞌn jlu cmaketel cybe ke betin xjal, ex atzun cbelex makuꞌn Gog cyucꞌix cycyakil ke t-soldad, ex cꞌoquel kꞌoꞌn tbi lugar lu Chkꞌajlaj cye nimcu t-soldad Gog. 12 Wuk xjaw che mukal aj Israel tiꞌj cyximlal tuꞌntzun tcyaj sakix twitz txꞌotxꞌ. 13 Cycyakil xjal che mukal tiꞌj cyximlal ex cꞌajbel jlu te jun nimbil cye. Tuj kꞌij lu cjawil nimsaꞌn nbiye. Akine Dios in chin kꞌmante jlu. 14 Tbajlenxitzun wuk xjaw, che jawil scꞌoꞌn jun cꞌloj xinak tuꞌn cyxiꞌ jyol cyximlal ke cyimni otok che cyaj ten tuj tcyakil cytxꞌotxꞌ aj Israel, ex cbelex cymakuꞌn tuꞌntzun tcyaj sakix twitz txꞌotxꞌ. 15 Oc cyxi bet ke xjal lu tuj cytxꞌotxꞌ aj Israel, ka at jun ma tzꞌoc noj tiꞌj jun tbakil cyimni, cbel tkꞌoꞌn jun techal ttxlaj, tuꞌntzun tcuꞌx makuꞌn cyuꞌn ke mukal tuj Chkꞌajlaj cye nimcu t-soldad Gog. 16 Ax icx at jun tnam nikayin taꞌ, Hamona tbi. Cyjaꞌtzun cyjel sakix twitz txꞌotxꞌ cyuꞌn.
17 Tzaj tmaꞌn Kman weye cyjaꞌ: Kꞌmanxa cye cycyakil ke jil in che lipan twitz cyaꞌj ex cye cycyakil ke txcup te tjakꞌ cꞌul: Cytzaje tuj tcyakil part, cychmon oc cyibe cywiꞌ ke witz tuj cytxꞌotxꞌ aj Israel, tiꞌj jun nintz waꞌn cbantel wuꞌne te cyeye tuj lugar lu. Atzun che chyoꞌle chibj ex che cꞌale chicꞌ; 18 cxel cychyoꞌne cychibjal ke xjal cyuw cycꞌuꞌj tuj kꞌoj, ex cxel cycꞌaꞌne cychcꞌel keju in che cawin twitz txꞌotxꞌ, che chyoꞌle tiꞌj mer ic tzaꞌn in che chyoꞌne tiꞌj cychibjal ẍneꞌl, tiꞌj cychibjal tal tman ẍneꞌl, tiꞌj cychibjal chip ex ka tiꞌj cychibjal tal tor, cycyakil ke jlu ulni cynabl ex ateꞌ tuj txꞌotxꞌ Basán. 19 Tiꞌjtzun ju nintz waꞌn lu, aju cbantel wuꞌne te cyeye, che chyoꞌle tiꞌj t-sebyil ocxi tnoj cycꞌuꞌje wen ex che cꞌale chicꞌ ocxi tchyoꞌn cywiꞌye tuꞌn. 20 Cbantel tten jun nintz waꞌn wuꞌne te cyeye tucꞌil cychiꞌye cychibjal chej ex cychibjal ke xjal cyjax cyibaj, cychibjal ke xjal cyuw cycꞌuꞌj tuj kꞌoj ex cychibjal cycyakil soldad, tuꞌntzun cychyoꞌne tiꞌj ocxi tnoj cycꞌuꞌje, chicuya cye. Akine Dios in chin kꞌmante jlu.
Che pol aj Israel juntl maj tuj cytanmi
21 Cyjaꞌtzun tten cxel nyecꞌune wajwalile cye mastl nasyon. Oc cyilaꞌ cycyakil nasyon oc tcub cysentens ex oc tcub cycastiw wuꞌne. 22 Tujtzun ju kꞌij lu cxel keꞌ tuꞌn tel cynicꞌ aj Israel wiꞌje, ka akine Cyman aju Cydios. 23 Ex cꞌelel cynicꞌ mastl nasyon tiꞌj, o cheꞌx aj kꞌiꞌn aj Israel pres tuj juntl lugar najchak tuꞌn tlaj il o cybincha tuꞌnju el cypaꞌn cyib wiꞌje; ex atzun weye aj nkꞌoꞌne ttzal wiꞌje cywitz ex e jeꞌx nkꞌoꞌne tuj cykꞌab aj kꞌoj cyiꞌj tuꞌn cycub byoꞌn cycyakil tuꞌn spad. 24 Cub nkꞌoꞌne cycastiw ic tzaꞌnx cybinchben mya baꞌn ex tuꞌn tlaj e icꞌ tibaj nleye, ex aj nkꞌoꞌne ttzal wiꞌje cywitz.
25 Cyjaꞌtzun akine Dios cxel nmaꞌne jlu: Jaꞌlo ctzajel kꞌakꞌan ncꞌuꞌje cyiꞌj cycyakil aj Israel, akeju tiyjil Jacob. Che ajetz meltzꞌaj wuꞌne jatum o che pon kꞌiꞌn, ex cꞌoquel nkꞌoꞌne tilil tuꞌn tjaw nimsaꞌn nbiye xjan. 26 Oc cynajan tuj txubtxaj tuj cytxꞌotxꞌ ex mi jun cꞌoquel secꞌpunte cye, cꞌicꞌel tnaꞌl cyuꞌn aju cychꞌixwi tzaj tej tel cypaꞌn cyib wiꞌje. 27 Oc cyajtz wiꞌne cyxol mastl nasyon ex oc cyajtz nchmoꞌne cyuj cytanmi ke aj kꞌoj cyiꞌj, cxel nyecꞌun wibe xjanxix kine, ex oc cyilaꞌ nimcu nasyon. 28 Wuꞌne e jeꞌx nsamaꞌne tuꞌn cyxi kꞌiꞌn pres cyuj mastl nasyon, ex che oquel nchmoꞌne juntl maj tuj cytxꞌotxꞌ. Mi jun aj Israel cyjel nkꞌoꞌne cyuj mastl nasyon. Cꞌeleltzun cynicꞌ tiꞌj, akine Cyman aju Cydios. 29 Mlay tzꞌaj nkꞌoꞌntle ttzal wiꞌje cywitz aj Israel, porque ctzajel nkꞌoꞌne Nxewe cye. Akine Dios ma chin kꞌmante jlu.