Tkanil tuꞌn Kman tiꞌj Gog
38
Tzaj yolin Kman wucꞌile ex tma cyjaꞌ: 2 Aya xjal, queꞌyinxa tumlal ju txꞌotxꞌ Magog ex kꞌmanxa aju yol cxel nmaꞌne teya tiꞌj Gog, aju nejenel maꞌxix toclen cye tnam Mesec ex Tubal. 3 Kꞌmanxa cyjaꞌ: Atzun jlu in tmaꞌn Kman: Aya Gog nejenel maꞌxix toclen cye tnam Mesec ex Tubal, ma chin oque aj kꞌoj tiꞌja. 4 Cꞌajel meltzꞌaja wuꞌne, cꞌoquex nkꞌoꞌne ganch tuj ttziꞌya, cꞌeletz wiꞌne cyucꞌix ke t-soldadiya cyjax cyibaj chej ex kꞌiꞌmlex cyubl; ke soldad lu nimxix cybaj wen, kꞌiꞌmlex cyspad cyucꞌix cymakbil te junxilchak txcajin. 5 Ke xjal aj Persia, cyucꞌix ke aj Etiopía ex ke aj Libia, che xeꞌl cyucꞌil cycyakil ke jlu, kꞌiꞌmlex cymakbil ex cypasbil cꞌuxbil. 6 Ax icx cycyakil soldad te tnam Gomer ex te tnam Bet-togarma che xeꞌl cyucꞌil, akeju mas najchak ateꞌ tuj txꞌotxꞌ tuj tbankꞌab kꞌij, cyucꞌix ke tnam nimxix cybaj wen, akeju mojl cyyol cyucꞌil. 7 Bincham ttena ex binchama tten tcyakilju cꞌajbel tuj kꞌoj, aya cyucꞌix cycyakil ke soldad ateꞌ tucꞌila; ex toca te nejenel cye. 8 Octzun tel nim abkꞌi oc tcꞌmaya jun tkanil tuꞌn tkꞌojina tiꞌj jun nasyon o tzꞌoc kꞌoj tiꞌj ojtxi, atzun jaꞌlo ma weꞌ kꞌoj tiꞌj; ke xjal teju tnam lu e baj sputj cyxol nimcu nasyon ex otok che naj te jumajx, pero o tzꞌoc cychmon cyib juntl maj cywiꞌ ke witz tuj cytxꞌotxꞌ aj Israel. O che ajtz meltzꞌaj tuj nimcu nasyon ex in che ankꞌin cycyakil tuj txubtxaj. 9 Cꞌoquel tzokpaja kꞌojlel tiꞌj ic tzaꞌn jun cykꞌikꞌ jbal, ex cbajel noj tuj cyuꞌn cycyakil t-soldadiya cyucꞌix nimcu tnam tucꞌila, ic cꞌoquel twitz txꞌotxꞌ cyuꞌn ic tzaꞌn kꞌek muj.10 Akine Dios in xi nmaꞌne jlu: Tuj tkꞌijlalil lu tzul tuj t-ximbetza tuꞌn tbaj tnacꞌuna tiꞌj tuꞌn tbinchanteya mya baꞌn. 11 Ex cxel tmaꞌna cyjaꞌ: Chin xeꞌle kꞌojlel tiꞌj jun nasyon mintiꞌ tcolbil tib, tuj jun tnam jatum najl ke xjal tuj txubtxaj, cycyakil ke tnam lu mintiꞌ muro toc cyiꞌj, mintiꞌ cylamel, ex mintiꞌ tranc cyiꞌj. 12 Cꞌeletz welkꞌaꞌne tcyakilju at tuj, chin oquel tzokpaje cyiꞌj ke tnam o che jaw binchaꞌn juntl maj, ex cyiꞌj ke xjal o che ajtz meltzꞌaj cyxol nimcu nasyon ex o tzꞌoc cychmon cyib juntl maj, akeju at cywacẍ ex mastl cyetzbil ex najlke tuj tmij enter twitz txꞌotxꞌ. 13 Ke xjal te tnam Sabá ex te tnam Dedán, cyucꞌix ke comersyant te tnam Tarsis cyucꞌix ke nejenel ateꞌ cyxol, ctzajel cykanin teya cyjaꞌ: ¿Mape tzaja elkꞌal? ¿Mape che tzaj tchmoꞌna ke t-soldadiya tuꞌn tex tiꞌna sak pwak, kꞌan pwak, ke wacẍ ex txkantl cyetzbil xjal, ex tuꞌn t-xi tiꞌna jun matij kꞌinumabl?
14 Cyjaꞌtzun, kꞌmanxa te Gog aju yol cxel nmaꞌne teya, ex kꞌmanxa cyjaꞌ: Atzun jlu in tmaꞌn Kman: Oc cyankꞌin aj Israel tuj txubtxaj, akeju etzan wuꞌne, octzun tbiya, cbel be tuꞌna, 15 ctzajela tuj ttanmiya najchak tuj txꞌotxꞌ tuj tbankꞌab kꞌij, cyucꞌix nimcu xjal te elaꞌ tnam che tzajel tucꞌila, nimxix cyipun ex cyucꞌix ke soldad cyjax cyibaj chej. 16 Cꞌoquel tzokpaja cyiꞌj aj Israel akeju etzan wuꞌne. Ex cbajel noj twitz cytxꞌotxꞌ tuꞌna ic tzaꞌn tuꞌn jun kꞌek muj. Aya Gog, tuj mancbil tkꞌijlalil ctzajel wiꞌne tuꞌn tkꞌojina cyiꞌj xjal tuj txꞌotxꞌ etzan wuꞌne, tuꞌn tel cynicꞌ mastl nasyon wiꞌje oc t-xi nyecꞌun wibe cye, ka xjan kine.
17 Akine Dios in xi nmaꞌne jlu: Tiꞌja o chin yoline ojtxi tej cyyolin ke nsanjele e ten cyxol aj Israel, o cyma atxix ojtxi ka tuꞌn ttzaj wiꞌne ex tuꞌn toc tzokpaja tiꞌj tnam etzan wuꞌne, akeju aj Israel.
Cbel tcastiw Gog
18 Akine Dios in chin kꞌmante jlu: Tuj tkꞌijlalil oc toc tzokpaj Gog tiꞌj tnam Israel, ctzajel nimxix nkꞌoje ex ntxꞌuꞌjile. 19 Tuꞌnju otok tzaj nimxix nkꞌoje cxel ntziyane jun yol axix toc, tuj tkꞌijlalil lu ctzajel jun cyaknajnab cyuwxix tuj txꞌotxꞌ cye aj Israel. 20 Che tzajel luꞌlun nwitze ke cyiẍ tuj mar, ke jil in che lipan twitz cyaꞌj, ke txcup te tjakꞌ cꞌul ex ke jil in xi cyjakuꞌn cycꞌuꞌj twitz txꞌotxꞌ, ax icx cycyakil xjal ateꞌ twitz txꞌotxꞌ. Che bel tilj ke witz, che tzajel tzꞌak ke pic, ex cycyakil ke muro toc cyiꞌjele tnam che bel tilj twitz txꞌotxꞌ. 21 Akine Dios in xi nmaꞌne jlu: Che tzajel ntxcoꞌne ke xjal tuꞌn cykꞌojin tiꞌj Gog cywiꞌyile ke witz etzan wuꞌne, ex che oquel tzokpaj ke t-soldad kꞌojlel tuꞌn spad cywitzx cyib. 22 Chin kꞌojile cyiꞌj tuꞌn txꞌuꞌj yabil ex che bel byoꞌn, ctzajel nkꞌoꞌne cykꞌikꞌ jbal tucꞌix sakbakun ex asufre tibaj ex cyibaj t-soldad ex cyibaj nimcu xjal ucꞌin tuꞌn. 23 Cyjaꞌtzun tten cxel nyecꞌune cye nimcu nasyon aju woclene maꞌxix ex ka xjanxix kine. Cxel nyecꞌun wibe cye, ex cꞌeleltzun cynicꞌ tiꞌj, akine Dios.