4 Tmatzun Kman weye: Txi yolina cye ke bak lu te nxele, ex kꞌmanxa cye: Akeye tzkij bak, cybintze aju tyol Kman: 5 Chi Kman cyeye cyjaꞌ: Cꞌoquex nkꞌoꞌne juntl maj cyxewe cyuje tuꞌntzun cyjaw ankꞌine juntl maj. 6 Cꞌoquel nkꞌoꞌne juntl maj cybotxꞌile, ex cꞌoquel nkꞌoꞌne cychibjale; cꞌoquel nkꞌoꞌne cytzꞌumale ex ctel juntl maj cyxewe wuꞌne tuꞌntzun cyjaw ankꞌine. Atzun cꞌelel cynicꞌe tiꞌj, akine Dios, chi Kman, chicuya cye.

7 O chin yoline cye ic tzaꞌnx tzaj tmaꞌn Kman weye. Tej matok in chin yoline cyucꞌil, o nbiye jun tkꞌajkꞌajel; in che swocꞌin ke bak wen tej toc cychmon cyib jun tucꞌil juntl. 8 Ex o wile otok tzꞌoc cybotxꞌil ex cychibjal tucꞌix cytzꞌumal, pero mintiꞌtok cyxew.

9 Tmatzun Kman weye cyjaꞌ: Yolina te nxele teju xewbaj, ex kꞌmanxa te: Chitzun Kman cyjaꞌ: Aya xewbaj, tzaja max cyuj ke cyaje pacꞌ ttxaꞌn txꞌotxꞌ, ex xupinxa cyiꞌj ke cyimni lu tuꞌn cyjaw ankꞌin, chi Kman weye. 10 In yoline te t-xel Kman ic tzaꞌnx tzaj tmaꞌn weye, ex ocx ju xewbaj cyuj ke cyimni ex e jaw ankꞌin. E jaw weꞌ nimxix cyajlal wen.

11 Tmatzun Kman weye: Ic cyten aj Israel ic tzaꞌn ke bak lu. In cymaꞌn cyjaꞌ: Ke kbakil ma che tzkij ex mintiꞌ jatum baꞌn tuꞌn toc keꞌ kcꞌuꞌj, ma ko naj, che chi. 12 Tuꞌntzun jlu, yolina cyucꞌil te nxele ex kꞌmanxa cye cyjaꞌ: Atzun jlu in tmaꞌn Kman: Akeye xjal etzan wuꞌne ic cytene ic tzaꞌn ke cyimni otok che cuꞌx makuꞌn, pero che jaketel ke cymukbile wuꞌne, che eletz wiꞌne cyuj, ex che pol wiꞌne juntl maj tuj cytxꞌotxꞌ aj Israel. 13 Akeye xjal etzan wuꞌne, oc cyjaket ke cymukbile wuꞌne, ex oc cyetz wiꞌne cyuj, cꞌelel cynicꞌe tiꞌj, akine Dios. 14 Cꞌoquex nkꞌoꞌne Nxewe cyuje, ex che jawil ankꞌine; che pol wiꞌne tuj cytxꞌotxꞌe. Cꞌeleltzun cynicꞌe tiꞌj ka akine o txi nmaꞌne jlu, ex wuꞌne o bant. Akine in chin kꞌmante jlu.

15 Tzajtzun yolin Kman wucꞌile ex tma cyjaꞌ: 16 Kꞌintza jun piẍ tzeꞌ ex tzꞌiban oca ke yol lu tiꞌj: Aju tnam Judá cyucꞌix ke mastl aj Israel ateꞌ tucꞌil. Kꞌintza juntl piẍ tzeꞌ ex tzꞌiban oca ke yol lu tiꞌj: Efraín aju tiyjil José, cyucꞌix ke mastl aj Israel ateꞌ tucꞌil. 17 Te tibajxi, mojban oca tuj tkꞌaba cywiꞌ ke cabe tzeꞌ, tuꞌntzun cyoc te junx. 18 Octzun cymante ke t-xjalila teya: Chicꞌbantza keye ti t-xilen jlu, ka che chi, 19 kꞌmanxa cye cyjaꞌ: Atzun jlu in tmaꞌn Kman: Ctzajel ntzyuꞌne ju tzeꞌ toc tbi José tiꞌj ex toc cybi mastl cꞌloj cyiyjil aj Israel tiꞌj, aju tzyuꞌn tuꞌn Efraín, tuꞌn toc nmojbaꞌne twiꞌ tucꞌil ju tzeꞌ toc tbi Judá tiꞌj, ex che oquel te junx tuj nkꞌabe. 20 Ax tzyun cuba tuj tkꞌaba keju cabe tzeꞌ otok tzꞌoc ttzꞌibana cywitz, tuꞌn toc cyqueꞌyin xjal, 21 ex kꞌmanxa cye cyjaꞌ: Atzun jlu in tmaꞌn Kman: Che tzajel wiꞌne ke aj Israel cyuj ke nasyon jatum ma che pon baj, che ajetz nchmoꞌne tuj tcyakil part ex che ul wiꞌne juntl maj tuj cytxꞌotxꞌ. 22 Che oquel te junx nasyon wuꞌne tuj ju cytxꞌotxꞌ aju tiwitz txꞌotxꞌ cye aj Israel. Junx cyrey ctel. Mlay che octl juntl maj te cabe nasyon ex mya partchak cawbil cyxol. 23 Mlay che cꞌulun juntl maj cywitz ke tilbilal tuꞌn cybinchante aju mya baꞌn, ex mlay cybincha tcyakil txcaj il. Che cletel wuꞌne te tcyakil mya baꞌn o cybincha tej tel cypaꞌn cyib tiꞌj nleye. Che txꞌjetel wuꞌne tuj ju cyil. Che oquel te weye ex chin oquele te Cydios. 24 Aju nmajene David cꞌoquel te cyrey ex oꞌcx te cpastoril cye. Cxel cybiꞌn nyole ex che japunel ke nleye ex ke nxnakꞌtzbile cyuꞌn. 25 Che najal tuj ju txꞌotxꞌ xi nkꞌoꞌne te nmajene Jacob, jatum e ten ke cyxeꞌchel. Axtzun che najal cyucꞌix ke cycꞌwaꞌl ex cycyakil ke cyiyjil che ul itzꞌj te tibajxi. Aju nmajene David cucx ctel te nejenel cye. 26 Cyjel bant tiꞌj jun nyole cyucꞌil tuꞌn cyankꞌin tuj txubtxaj. Aju nyole cyjel bant tiꞌj cyucꞌil cucx cyjel ten te jumajx. Cchmetel cyajlal wuꞌne ex cucx ctel cyxol aju njaye xjan. 27 Chin najale cyucꞌil, akine chin oquel te Cydios ex atzun cye che oquel te weye. 28 Octzun tten njaye xjan cyxol te jumajx, cꞌelel cynicꞌ mastl nasyon tiꞌj ka akine in jaw scꞌonte cye aj Israel tuꞌn cyoc te jun wetzbile xjan.