6 Cyjaꞌtzun kꞌmanxa aju yol in xi nmaꞌne teya tiꞌj cytxꞌotxꞌ aj Israel, ex kꞌmanxa cyjaꞌ: Atzun jlu in tmaꞌn Kman cye ke nmak witz, cye ke tal witz, cye ke tkꞌab xak ex cye ke chkꞌajlaj ateꞌ cyxol witz: Ma tzaj ntxꞌuꞌjile ex nkꞌoje tuꞌn tlaj ju yasbil ma tzicꞌx cyuꞌne cyuꞌn ke xjal cyuj mastl nasyon. 7 Cyjaꞌtzun akine Dios in xi nmaꞌne jun yol axix toc: Ke nasyon cyvesin cyib cyucꞌile ctzajel cychꞌixwi. 8 Atzun cyeye, akeye nmak witz tuj cytxꞌotxꞌ aj Israel, che chꞌiyil ke tzeꞌ cywiꞌye, akeju baꞌn tloꞌnjtz cywitz, ex cꞌoquel nim cywitz tuꞌn tajben te cyloꞌ ke xjal etzan wuꞌne akeju aj Israel. Porque nikayin taꞌ tkꞌijlalil tuꞌn cyajtz meltzꞌaj. 9 Akine chin oquel cwentin te cyeye, che bajel chꞌoquine ex cbelex awet awal cywiꞌye. 10 Wuꞌne cchmetel cybaj aj Israel cywiꞌye. Cchmetel nimxix xjal cyuj tnam, ex che jawil binchaꞌn juntl maj ke tnam o che cub xitj. 11 Wuꞌne cchmetel nimxix xjal cywiꞌye, ax icx ke alumaj cchmetel nimxix cybaj. Che tel nimcu xjal ic tzaꞌn tej cyten ojtxi ex che ankꞌil mas baꞌn ic tzaꞌn ojtxi. Cꞌeleltzun cynicꞌe tiꞌj, akine Dios. 12 Che tzajel wiꞌne ke aj Israel, akeju etzan wuꞌne, tuꞌn cynajan cywiꞌye, che oquel te cyajwile, ex mlay che cyaj tentl mintiꞌ cycꞌwaꞌl cyuꞌne.

13 Akine Dios in xi nmaꞌne jlu: Akeye witz in kꞌmanjtz cyiꞌje cyjaꞌ: Baꞌn che chyoꞌne xjal, ex in cyaj cykꞌoꞌne cytanmiye mintiꞌ cꞌwaꞌl tuj. 14 Atzun jaꞌlo mlay txi cychyoꞌntle ke xjal, ex mlay cyaj cykꞌoꞌntle cytanmiye mintiꞌ cꞌwaꞌl tuj. Akine Dios in chin kꞌmante jlu. 15 Mlay txi nkꞌoꞌntle ambil tuꞌn cybinteye juntl maj ke yasbil cyuꞌn ke xjal cyuj mastl nasyon; ex mlay che xmayintl mastl tnam cyiꞌje, ex mlay cyaj cykꞌoꞌntle cytanmiye mintiꞌ cꞌwaꞌl tuj. Akine Dios in chin kꞌmante jlu.

16 Tzaj yolin Kman wucꞌile ex tma cyjaꞌ: 17 Aya xjal, tej ateꞌxtok aj Israel tuj cytxꞌotxꞌ, baj cytzꞌilsaꞌn tuꞌnju cybinchben mya baꞌn. Puro tzꞌil oc cybinchben nwitze,ic tzaꞌn nnoꞌc jun xuꞌj oc tcꞌulul ẍwoꞌj tiꞌj. 18 Tzajtzun nimxix nkꞌoje cyiꞌj tuꞌnju cub cybyoꞌn nimcu xjal tuj cytanmi, ex baj cytzꞌilsaꞌn tuꞌnju e cꞌulun cywitz ke tilbilal. 19 Cub nkꞌoꞌne cycastiw tuꞌn tlaj ju cybinchben mya baꞌn, ex e baj nsputune cyxol mastl tnam ex cyxol mastl nasyon. 20 Cyuj cycyakil tnam jatum e pon, e yolin xjal mya baꞌn tiꞌj nbiye xjan tuꞌn cylaj, ex cyma xjal cyiꞌj cyjaꞌ: Atzun ke xjal lu etzan ke tuꞌn Dios, ¿tzaꞌntzun tten ma che etz tlajoꞌn tuj ttxꞌotxꞌ? 21 Tzajtzun taꞌw tuj wanmiye tej nlonteye, tuꞌn cylaj aj Israel e yolin xjal mya baꞌn tiꞌj nbiye cyuj ke nasyon jatum e pon kꞌiꞌn.

22 Tuꞌntzun jlu, kꞌmanxa cye aj Israel: Atzun jlu in tmaꞌn Kman: Aju cbantel wuꞌne mya nok tuꞌn cylaje, akeye aj Israel, nok oꞌcx tuꞌn tjaw nimsaꞌn nbiye xjan, aju ma tzꞌoc cykꞌoꞌne te mintiꞌ tajben cyxol ke nasyon jatum ma che pone. 23 Cꞌoquel nkꞌoꞌne nbiye xjan te maꞌxix toclen, aju ma tzꞌoc cykꞌoꞌne te mintiꞌ tajben cyxol ke nasyon. Octzun tbant jlu wuꞌne, cꞌeleltzun cynicꞌ wiꞌje, akine Dios. Akine Dios in chin kꞌmante jlu. 24 Che eletz wiꞌne cyuj cycyakil ke nasyon lu ex cyuj ke tnam; che oquel nchmoꞌne, ex che ul meltzꞌaje juntl maj wuꞌne tuj cytanmiye. 25 Cꞌoquel nchitune aꞌ sak cyiꞌje, ex che txꞌjetele wuꞌne te tcyakil mya baꞌn. Che txꞌjetele wuꞌne tuꞌnju baj cytzꞌilsan cyibe tej cycꞌulune cywitz ke tilbilal. 26 Cꞌoquel cyanmiye ex cynable te acꞌaj wuꞌne. Porque jaꞌlo ic tten cyanmiye ic tzaꞌn jun abj puro cyuw, pero cchꞌexpetel wuꞌne tuꞌn toc te kꞌuyin ex baꞌn niman. 27 Ctel Nxewe tuj cyanmiye, ex chin onile cyeye tuꞌn cyjapun ke nleye ex ke nxnakꞌtzbile cyuꞌne. 28 Che najale tuj ju txꞌotxꞌ xi nkꞌoꞌne cye cyxeꞌchele, che oquele te weye, ex atzun weye chin oquele te Cydiose. 29 Che cletele wuꞌne tuꞌn miꞌn cybinchantle mya baꞌn aju in che tzꞌilixe tuꞌn. Ctzajel nkꞌoꞌne nim triw ex mlay tzaj nsamaꞌntle juntl maj weꞌyaj cyiꞌje. 30 Ax icx ctzajel nkꞌoꞌne nim cywitz tzeꞌ ex nim twitz awal tuj cojbil, tuꞌntzun miꞌn tcub juntl maj cychꞌixwiye cywitz ke mastl nasyon tuꞌn tlaj weꞌyaj. 31 Oc ttzaj cynaꞌne aju cymodiye mya baꞌn ex ju cybinchbene mya baꞌn, ctzajeltzun cychꞌixwiye tuꞌn tlaj cyile ex cybinchbene mya baꞌn icꞌunxix wuꞌne. 32 Akine Dios in chin kꞌmante jlu: Tzꞌelx cynicꞌe tiꞌj, akeye aj Israel, mya tuꞌnju baꞌn keye cbantel jlu wuꞌne; tzajx cychꞌixwiye ex najx cynable tuꞌn tlaj cybinchbene mya baꞌn.

33 Akine Dios in chin kꞌmante jlu: Oc cybaj txꞌjete wuꞌne te tcyakilju cyile, che najale juntl maj tuj cytanmiye ex cjawil cybinchaꞌne juntl maj ke ja o che cub xitj. 34 Aju txꞌotxꞌ otok cyaj colin ex otok tzꞌoc cyqueꞌyin cycyakil xjal e icꞌ bet ttxlaj, che akꞌnal xjal juntl maj tiꞌj tuꞌn ttzaj tawal. 35 Ex oc cyma xjal cyjaꞌ: Aju txꞌotxꞌ otok cyaj colin ma tzꞌoc ic tzaꞌn tkan awal tuj Edén puro tbanil; ke tnam otok che cub xitj ex otok che cyaj colin ex otok che baj naj, jaꞌlo ma che jaw binchaꞌn ke nmak ja cyuj ex at xjal najl cyuj. 36 Atzun ke nasyon cyvesin cyib cyucꞌile ex otok che cyaj ankꞌin, cꞌelel cynicꞌ tiꞌj, akine in jaw nbinchaꞌne juntl maj aju otok cub xitj, ex in cuꞌx wawaꞌne juntl maj aju otok naj. Akine in chin kꞌmante jlu, ex cbantel wuꞌne.

37 Akine Dios in chin kꞌmante jlu: Ax icx cxel nkꞌoꞌne cye aj Israel aju ctzajel cykanin weye tuꞌn tbant wuꞌne. Cchmetel cybaj wuꞌne ic tzaꞌn cybaj txkan ẍneꞌl. 38 Ke tnam cubni xitj cchmetel nim xjal cyuj, ic cꞌoquel cyajlal xjal cyuj ic tzaꞌn cyajlal ke ẍneꞌl in cheꞌx kꞌiꞌn tuj tnam Jerusalén tuꞌn cycub byet te jun chojbil cyuj ninkꞌij maꞌ cyoclen. Atzun cꞌelel cynicꞌ tiꞌj, akine Dios.