5 Atxix ojtxi ax icx jaꞌlo cucx cykꞌojine cyiꞌj aj Israel, e oc tzokpaje kꞌojlel cyiꞌj tej tcub aju mancbil cycastiw tuꞌn tlaj cyil. 6 Pero akine Dios in xi nmaꞌne jun yol axix toc; che xel nkꞌoꞌne tuꞌn cycyime, at cyile tuꞌnju ma che cub xjal cyuꞌne, cyjaꞌtzun ax icx cyeye che bel byoꞌne. 7 Aya tiwitz txꞌotxꞌ Seir cꞌoquela wuꞌne te tzkij txꞌotxꞌ mintiꞌ xjal cnajal tuj, ex mi jun xjal cbetel tuj. 8 Ke nmak witz ex ke tal witz, cyucꞌix ke chkꞌajlaj cyxol witz, cyucꞌix ke tkꞌab xak ateꞌ tuj tcwenta, che nojel wuꞌne tuꞌn cyximlal cyimni che cymel tuj kꞌoj. 9 Te jumajx cꞌoquela wuꞌne te tzkij txꞌotxꞌ, ex mi jun xjal cnajal cyuj ke tnam ateꞌ tuj tcwenta. Cꞌeleltzun cynicꞌe tiꞌj, akine Dios.

10 Tuꞌnju xi tmaꞌna cyjaꞌ: Ke cabe nasyon Israel ex Judá tucꞌix cytxꞌotxꞌ che oquel te weye; akine chin oquel te cyajwil masque najl Kman tuj, chiya, 11 cyjaꞌtzun akine Dios in xi nmaꞌne jun yol axix toc: Ic tzaꞌn teya o tzaj tkꞌoja ex tloꞌch tcꞌuꞌja cyiꞌj aj Israel ex o che el ticꞌuna, icxtzun oc nbinchaꞌye tiꞌja. Oc tcub tcastiwoya wuꞌne, cꞌelel cynicꞌ aj Israel wiꞌje. 12 Cꞌeleltzun tnicꞌa tiꞌj, akine Dios otok nbiye tcyakil tyasbila tzaj tmaꞌna cyiꞌj ke witz te Israel. Tmaya cyjaꞌ: Ma che najx ke, ma che tzaj kꞌoꞌn te ncanbe, chiya. 13 Nim jaw tniman tiba nwitze ex o yasuna wiꞌje. O nbiye jlu, chi Kman.

14 Atzun jlu in xi nmaꞌne, akine Dios: Cycyakil xjal tuj tcyakil twitz txꞌotxꞌ che jawil tzalaj oc tnaja wuꞌne. 15 O jaw tzalaja tej tnaj txꞌotxꞌ aju cycꞌam aj Israel te cyetzbil, ax icxtzun cbajel tiꞌja: Cꞌoquela te tzkij txꞌotxꞌ, aya witz Seir, tucꞌix tcyakil txꞌotxꞌ cye aj Edom. Cꞌeleltzun cynicꞌ tiꞌj, akine Dios.