Jun yol tzaj kꞌmaꞌn cyiꞌj ke pastor cye aj Israel
34
Tzajtzun yolin Kman wucꞌile ex tma cyjaꞌ: 2 Aya xjal, yolina te nxele cyucꞌil ke pastor cye aj Israel ex kꞌmanxa cye cyjaꞌ: Chi Kman: Becꞌbil cywitz ke pastor cye aj Israel, porque oꞌcx cye nnoꞌc cycwentin cyib. ¿Myapetzun ake ẍneꞌl ex ke chip tuꞌn cyoc cycwentin? 3 In che cꞌane tiꞌj cylech chip, in baj cybinchaꞌne cytzmal ẍneꞌl te cyxbalune, in cub cybyoꞌne ke ẍneꞌl mas ulni cynabl te cychiꞌye, pero mintiꞌ in che oc cycwentine ke. 4 Mintiꞌ in che onine cyiꞌj ke ẍneꞌl ocni cyiꞌj, mintiꞌ in che oc tene kꞌanal cyiꞌj ke yab, mintiꞌ nnoꞌc cypotzine tiꞌj cykan otok tokj, mintiꞌ in che ajtz cyiꞌne keju otok cheꞌx najchak tuj cꞌul, ex mintiꞌ in che oc tene jyol cye keju otok che cyaj tzpet, nok oꞌcx cyuw in cheꞌxe cyiꞌj ex in tzaj cytxꞌuꞌjile cyiꞌj. 5 Ma che baj sputj ke nẍneꞌle tuꞌn tlaj mi aꞌl pastor cyiꞌj ex ma cheꞌx chyoꞌn cyuꞌn txcup te tjakꞌ chcꞌul. 6 Ma baj cysputun cyib cywiꞌ cycyakil witz, ex cywiꞌ ke nmak witz, ma cheꞌx tzpet tuj tcyakil twitz txꞌotxꞌ, ex mi aꞌl jun ma tzaj tbis cyiꞌj ex mi aꞌl jun ma txiꞌ jyolte cye.7 Cyjaꞌtzun akeye pastor, cykꞌontzxix cywiꞌye tiꞌj nyole. 8 Akine Dios in xi nmaꞌne jun nyole axix toc: Cycyakil txcaj txcup te tjakꞌ cꞌul ma cheꞌx cyelkꞌaꞌn ke nẍneꞌle ex ma cheꞌx cychyoꞌn tuꞌnju mi aꞌl pastor cyiꞌj. Ke pastor mintiꞌ in cheꞌx jyol cye ke ẍneꞌl. Ax ke nnoꞌc cycwentin cyib ex mya cyiꞌj ke ẍneꞌl in che cwentin. 9 Cyjaꞌtzun akeye pastor cybintze ke yol 10 in xi nmaꞌne cyeye, akine Dios: Akeye pastor, in xi nmaꞌne cyeye: Ma chin oque te aj kꞌoj cyiꞌje, ex che xel nkanine ke nẍneꞌle cyeye; cꞌelel wiꞌne cyakꞌune te pastor tuꞌntzun mya cucx tuꞌn toc cycwentin cyibe; ex che colpetel ke nẍneꞌle wuꞌne, tuꞌntzun mya cucx tuꞌn cycub cybyoꞌne te cychiꞌye.
Aju baꞌn pastor
11 Akine Dios in chin kꞌmante jlu: Ax kine chin xeꞌle jyolte cye ke nẍneꞌle ex che oquel ncwentine. 12 Ic tzaꞌn nnoꞌc tcwentin jun pastor ke tẍneꞌl oc tbaj cysputun cyib, icxtzun weye che oquel ncwentine ke nẍneꞌle; che ajetz ncolpiꞌne cyuj ke lugar jatum ma che pon sputj tuj jun kꞌij klolj ex kꞌek muj. 13 Che eletz wiꞌne cyuj ke tnam najchak ateꞌ, che oquel nchmoꞌne ex che ul wiꞌne juntl maj tujx cytxꞌotxꞌ. Che xel wiꞌne tuꞌn cywaꞌn cywiꞌ ke witz tuj cytxꞌotxꞌ, ex cyuj ke tkꞌab xak, ex cyuj cycyakil lugar jatum najl ke xjal. 14 Che xel wiꞌne tuꞌn cywaꞌn tiꞌj tbanil cꞌul cywiꞌ ke nmak witz tuj cytxꞌotxꞌ. Atzun jacu che ojlan ex jacu che waꞌn tiꞌj tbanil cꞌul. 15 Ax kine chin oquel pastor cyiꞌj ke nẍneꞌle, ex ax kine chin xel kꞌinte cye tuꞌn cyojlan. Akine Dios in chin kꞌmante jlu. 16 Chin oquel tene jyol cye ke ẍneꞌl otok cheꞌx tzpet, che ajetz wiꞌne keju otok che elnaj tiꞌj cybe, cꞌoquel npotzine tiꞌj cykan otok tokj, chin onile cyiꞌj keju mintiꞌ cyipun, atzun keju ulni cynabl ex at nim cyipun che najel wuꞌne. Tuj tumelxix che oquel npastorine ke nẍneꞌle.
17 Akine Dios in chin kꞌmante jlu: Cybintze akeye nẍneꞌle: Che oquel ke ẍneꞌl cyucꞌix ke chip tuj xjel wuꞌne tiꞌj cybinchben. 18 Mintiꞌ in keꞌ cycꞌuꞌje tiꞌj ex in che waꞌne tbanil cꞌul, in baj cywabane aju cꞌul in cyaj ten; in xi cycꞌaꞌne aju aꞌ sak, atzun mastl in baj cyẍwoꞌjine tuꞌn cykane. 19 Atzun ke nẍneꞌle ilx tiꞌj tuꞌn t-xi cywaꞌn aju cꞌul otok baj cywabane ex tuꞌn t-xi cycꞌaꞌn aju aꞌ otok baj cyẍwoꞌjine twitz. 20 Tuꞌntzun jlu akine Dios in xi nmaꞌne jlu cyeye: Cxel nbinchaꞌne cyiꞌj ke ẍneꞌl ocni cyiꞌj ex ke ẍneꞌl ulni cynabl. 21 Akeye ẍneꞌl ulni cynable, ma che ex cylakꞌbaꞌne keju mintiꞌ cyipun, ma che ex cylamoꞌne ke ex ma che oc tzokpaje cyiꞌj tuꞌn cyjaw cyẍuꞌyine, tuꞌntzun jlu ma che el ok. 22 Pero chin oquel tene colil cyiꞌj ke nẍneꞌle. Mlay wakꞌtle ambil tuꞌn cucx cyyajlanjtz. Teyle junjun ẍneꞌl cꞌoquel tuj xjel wuꞌne tiꞌj alcye ma tbincha tiꞌj juntl tucꞌil. 23 Tzul wiꞌne jun pastor, ex tjunal te cpastoril cyiꞌj; atzun nmajene David cꞌoquel nkꞌoꞌne te pastor, ex a cꞌoquel cwentin cye ẍneꞌl. 24 Akine Cyman chin oquele te Cydios, atzunte nmajene David cꞌoquel te nejenel cye. Akine Dios in chin kꞌmante jlu. 25 Cyjel bant tiꞌj jun nyole cyucꞌil tuꞌn cyten tuj txubtxaj. Che bel naj ke txcup wuꞌne tuj cytanmi tuꞌntzun cyankꞌin ke nẍneꞌle tuj txubtxaj tuj cojbil, ex tuꞌn miꞌn cyxob oc cytan tjakꞌ cꞌul.
26 Che bel ncyꞌiwlaꞌne ke, ax icx ke lugar tiꞌjele aju witz etzan wuꞌne; ctzajel nkꞌoꞌne jbal te xtalbil cyibaj tujxix tkꞌijlalil. 27 Ke tzeꞌ tuj cojbil oc cykꞌaꞌ cywitz, aju txꞌotxꞌ oc tkꞌaꞌ twitz tawal, ex ke ẍneꞌl che tel tuj txubtxaj tuj cyex cytanmi. Oc cycolpet ke xjal etzan wuꞌne tuj cykꞌab keju in che yajlan cyiꞌj, atzun cꞌelel cynicꞌ tiꞌj, akine Dios. 28 Mlay tzꞌel cyiꞌn ke mastl nasyon tcyakilju at cye, ex mlay che cub cyuꞌn ke txcup tuꞌn cyxi cychyoꞌn. Che tel tuj txubtxaj ex mi aꞌl jun cꞌoquel secꞌpunte cye. 29 Cxel nkꞌoꞌne cytxꞌotxꞌ tbanilxix yolbil te tuꞌnju nim twitz awal in tzaj tuj, ex mlay che cyaj ten tuj weꞌyaj; mlay che xmayin juntl maj ke mastl nasyon cyiꞌj. 30 Atzun cꞌelel cynicꞌ tiꞌj, atine cyucꞌil, akine Cyman ex Cydios, ex cꞌelel cynicꞌ aj Israel tiꞌj ka etzan ke wuꞌne. Akine Dios in chin kꞌmante jlu. 31 Akeye nẍneꞌle, pastorin keye wuꞌne, xjal keꞌye ex akine Cydiose. Akine Dios in chin kꞌmante jlu.