Aju takꞌun xkꞌukil tnam
33
Tzaj yolin Kman wucꞌile ex tma cyjaꞌ: 2 Aya xjal, yolina cyucꞌil ke t-xjalila ex kꞌmanxa cye cyjaꞌ: Oc t-xi nsamaꞌne jun tnam kꞌojlel tiꞌj juntl, cjawiltzun cyscꞌoꞌn xjal teju tnam lu jun cyxol tuꞌn toc te xkꞌukil. 3 Octzun tqueꞌyinte xkꞌukil cyjaꞌ cytzaj txkan soldad aj kꞌoj tuꞌn cyul lakꞌeꞌ tiꞌj tnam, cꞌoquel tkꞌajtzaꞌn chun tuꞌn cybinte ke xjal te tnam. 4 Ka at jun xjal ma binte tkꞌajkꞌajel chun ex mintiꞌ ma txi tniman, ex ka ma che pon aj kꞌoj ex ka ma cub byoꞌn cyuꞌn, mi aꞌl jun at til tiꞌj tcamic, ax te xjal at til tiꞌj tcamic, 5 porque otok tbi tkꞌajkꞌajel chun ex mintiꞌ xi tniman; ax te xjal at til tiꞌj tcamic, porque nokwit xi tniman tkꞌajkꞌajel chun owtlo clet. 6 Katzun ma til xkꞌukil oc cypon ke soldad aj kꞌoj ex mintiꞌ ma tzꞌoc tkꞌajtzaꞌn chun tuꞌn cybinte xjal, ka ma che pon aj kꞌoj ex ma cub byoꞌn jun xjal cyuꞌn, aju xjal lu cymel tuꞌn tlaj til, pero cxel nkanine te xkꞌukil tikuꞌn otok cyim xjal.7 Aya xjal, ma tzꞌoc nkꞌoꞌne te xkꞌukil cye aj Israel. Oc tcꞌmaꞌya nyole ex cxel tmaꞌna cye. 8 Mya yajcu tzaj nmaꞌne teya tuꞌn tcub t-sentens jun xjal binchal mya baꞌn tuꞌn tcyim; ka mi ma txi tmaꞌna te tuꞌn tbaj tchꞌexpuꞌn tmod, aju xjal lu cymel tuꞌn tlaj til, pero cxel nkanine teya tikuꞌn otok cyim. 9 Katzun ma txi tmaꞌna teju xjal binchal mya baꞌn tuꞌn tbaj tchꞌexpuꞌn tmod ex ka mi ma tbincha, cymel tuꞌn tlaj til, atzun teya mlay cyima, porque mintiꞌ tila tuꞌn tlaj jlu.
Tuj tcwent xjal taꞌ alcye ctzajel tiꞌj
10 Aya xjal, kꞌmanxa cye aj Israel: Akeye in cymaꞌne cyjaꞌ: At nim kpaltil ex at nim kil. Cyjaꞌtzun chꞌix knaj. ¿Tzaꞌn tten ko ankꞌil? Che chiye. 11 Pero akine Dios in xi nmaꞌne jun nyole axix toc: Miꞌn waje tuꞌn tcyim jun xjal binchal mya baꞌn, nok oꞌcx waje tuꞌn tbaj tchꞌexpuꞌn tmod tuꞌntzun tankꞌin. Akeye aj Israel, cycolin cyaje aju cytene mya baꞌn kꞌiꞌn cyuꞌne. ¿Tikuꞌn cyaje tuꞌn cycyime?
12 Aya xjal, kꞌmanxa cye ke t-xjalila cyjaꞌ: Ka at jun xjal tzꞌaklxix ma binchan il, mlay clet tuꞌnju tbinchben baꞌn te ojtxi, ex ka at jun xjal mya baꞌn ma cyaj tcolin tbinchben mya baꞌn, mlay cyim tuꞌnju tbinchben te ojtxi. Ka at jun xjal baꞌn ma binchan il, mlay tzꞌankꞌin tuꞌnju tbinchben baꞌn te ojtxi. 13 Ka ma txi ntziyane tuꞌn t-xi nkꞌoꞌne tchwinklal jun xjal baꞌn tbinchben, ex ka ma tzꞌoc keꞌ tcꞌuꞌj tiꞌj ju baꞌn otok tbincha nej, ex ka ma tzꞌoc ten binchal mya baꞌn, mi jun tbinchben baꞌn cꞌoquel nkꞌoꞌne tajlal, nok oꞌcx tuꞌn tcyim tuꞌn tlaj tbinchben mya baꞌn. 14 Ex ka ma txi nmaꞌne tuꞌn tcyim jun xjal binchal mya baꞌn, ex ka ma cyaj tcolin tuꞌn tbinchante il, ex ka ma tbincha ju baꞌn ex ju tzꞌaklxix, 15 ka ma tzꞌaj tkꞌoꞌn aju otok tcꞌam te prent te tucꞌil, ka ma tzꞌaj tkꞌoꞌn aju otok tzꞌel telkꞌaꞌn, ka ma che japun ke ley tuꞌn, akeju in cykꞌoꞌn chwinklal, ex ka ma cyaj tcolin tuꞌn tbinchante mya baꞌn, ax toc aju xjal lu cꞌankꞌil ex mlay cyim. 16 Mlay tzaj nnaꞌne mi jun til otok tbincha nej, ex cucx cꞌankꞌil tuꞌnju ma tbincha aju baꞌn ex aju tzꞌaklxix. 17 Oclo cymaꞌ ke t-xjalila ka mya tuj tumel in bant wuꞌne; pero ax toc ax ke mya tuj tumel in bant cyuꞌn. 18 Ka ma cyaj tcolin xjal baꞌn aju tbinchben baꞌn ex ka ma tbincha mya baꞌn, cymel tuꞌn tlaj jlu. 19 Ex ka ma cyaj tcolin xjal mya baꞌn aju tbinchben mya baꞌn, ex ka ma tbincha aju baꞌn ex aju tzꞌaklxix, tuꞌn tlaj jlu cꞌankꞌil. 20 Atzun cyeye cucx t-xi cymaꞌne: Mintiꞌ in tbinchaꞌn Kman aju tzꞌaklxix, che chiye, pero akeye aj Israel, teyle junjun cyeye cbel tcastiw wuꞌne ic tzaꞌnx tbinchben.
Tej tcub cyiꞌj aj Jerusalén cyuꞌn aj kꞌoj
21 Tuj jweꞌ tajlal tlajin xjaw ex te tcablajin abkꞌi kul-len kꞌiꞌn tuj Babilonia, at jun xjal otok tzokpaj tuj Jerusalén ul wucꞌile ex tzaj tmaꞌn weye cyjaꞌ: O cub tiꞌj tnam cyuꞌn aj kꞌoj, chi xjal. 22 Teju konicꞌan tej naꞌnxtok tul aju xjal otok tzokpaj, o nnaꞌye tipumal Kman, ex te prim tej tul xjal, otok jaket ntziꞌye tuꞌn Kman, ex mya mentl kine.
Aju il cybincha xjal
23 Tzaj yolin Kman wucꞌile ex tma cyjaꞌ: 24 Ke xjal najl cyuj ke tnam o che naj tuj Israel in cymaꞌn cyjaꞌ: Tjunalxte Abraham pero oc te tajwil ju txꞌotxꞌ, icxtzun ke ko oquel te tajwil txꞌotxꞌ tuꞌnju mas nim kbaj, che chi. 25 Cyjaꞌtzun kꞌmanxa cye: Chi Kman in tmaꞌn cyjaꞌ: In che chyoꞌne chibj tucꞌix tchcꞌel, in che cꞌulune cywitz ke tilbilal, ex in cub cybyoꞌne ke cyucꞌile, ¿che chipetzune ka che oquele te tajwil aju txꞌotxꞌ? 26 Nnoꞌc keꞌ cycꞌuꞌje tiꞌj cyspadiye tuꞌn tcub cybyoꞌne xjal, in cybinchaꞌne aju mya baꞌn nneꞌl tuj nwitze, ex in cub cymojban cyibe tucꞌil t-xuꞌjil cyucꞌile, ¿che chipetzune ka che oquele te tajwil aju txꞌotxꞌ?
27 Ax icx kꞌmanxa cye: Chi Kman in tmaꞌn cyjaꞌ: Cxel nmaꞌne jun nyole axix toc, ke xjal najl cyuj ke tnam o che cub xitj, che bel byoꞌn, ex keju najl tuj cojbil, che xel nkꞌone cye txcup tuꞌn cybaj chyoꞌn, atzun keju najl cyuj ke toyꞌ pic ex cyuj jul, che cymel tuꞌn yabil. 28 Cꞌoquel nkꞌoꞌne cytxꞌotxꞌ aj Israel te jun lugar mintiꞌ cynajbil xjal tuj, ex biꞌx cbajel naj; wuꞌne cnajel cyipumal keju in jaw cyniman cyib. Ke witz tuj cytxꞌotxꞌ che oquel te jun lugar mintiꞌ cynajbil xjal tuj ex mi aꞌl jun cbetel cywiꞌ. 29 Oc toc ju txꞌotxꞌ te mintiꞌ cynajbil xjal tuj, ex oc tnaj tuꞌn cylaj ke il o cybincha, akeju icꞌun wuꞌne, cꞌeleltzun cynicꞌ tiꞌj, akine Dios.
30 Nnoꞌc cychmon cyib ke t-xjalila cywitz muro ex cytzi cyja tuꞌn cyyolin tiꞌja, ex in cymaꞌn cyxolx cyjaꞌ: Cytzaje, ko bin tiꞌj ju yol ma tzaj tmaꞌn Kman te t-sanjel, che chi. 31 Ke xjal etzan wuꞌne in che ul twitza ex in che cub keꞌ twitza ic tzaꞌnx in bant cyuꞌn tuꞌn cybinte tyola. Pero mintiꞌ in cybinchaꞌn aju in tmaꞌna. In che yolin yol mejorxix, pero nok tten cyuꞌn, porque atzun toc cycꞌuꞌj tiꞌj pwak. 32 Ic nnoꞌca te cye ic tzaꞌn jun xjal mejor bitzan, mejor tkꞌajkꞌajel twiꞌ, ex mejor chimban tiꞌj arpa. In cybiꞌn ju tyola pero mintiꞌ in cybinchaꞌn aju in tmaꞌna. 33 Masque icju, pero cjapunel tcyakilju o tmaya cye, ex oc tjapun cꞌelel cynicꞌ tiꞌj, o ten jun t-sanjel Dios cyxol.