3 Atzun jlu in tmaꞌn Kman: Cxel nxoꞌne nxuybe tibaja, atzun nim cyajlal tnam ex cyuꞌntzun ctzyetela wuꞌne. 4 Oc cjawitz wiꞌne tuꞌn tjawila twitz txꞌotxꞌ ex cyjel paleꞌya wuꞌne twitz txꞌotxꞌ. Che tzajel wiꞌne cycyakil txcaj jil in che lipan twitz cyaꞌj tuꞌn cycub weꞌ tibaja, ex cxel chyoꞌn tchibjala cyuꞌn cycyakil txcup te tjakꞌ cꞌul. 5 Cbel nkꞌoꞌne tchibjala kꞌayni cywiꞌ ke witz ex cywitz ke chkꞌajlaj cyxol witz. 6 Cbajel acꞌix twitz txꞌotxꞌ tuꞌn tchcꞌela wuꞌne ex cpol acꞌix max cywiꞌ ke witz, ex che nojel ke tkꞌab xak tuꞌn. 7 Oc tnaja wuꞌne, cmaksetel twitz cyaꞌj ex cꞌoquel yupj cywitz ke cheꞌw; cꞌoquel nkꞌoꞌne muj twitz kꞌij ex mlay tzaj tkꞌoꞌn xjaw t-spicꞌumal. 8 Tuꞌn tlaja che belex nyupune cycyakil ke spicꞌun in che koptzꞌaj twitz cyaꞌj, ex cnojel tuj ttanmiya wuꞌne tuꞌn klolj. Akine Dios in chin kꞌmante jlu.

9 Ctzajel cybis nimcu tnam oc cyxi wiꞌne ke t-xjalila cyuj ke nasyon mintiꞌ ojtzkiꞌn tuꞌna. 10 Ctzajel cyxobil nimcu tnam tiꞌja; biꞌx cnajel cynabl ke cyrey oc cylonte oc t-xi njatoꞌne nspadiye tiꞌja. Oc tcub xitja che tzajel luꞌlun tuꞌn cyxobil, tiꞌj cychwinklal.

11 Chi Kman cyjaꞌ: Aju t-spad rey te Babilonia cpol canun tiꞌja ex cnajela tuꞌn. 12 Ke t-xjalila nimxix cybaj che najel wuꞌne tuꞌn cyspad ke kꞌojlel nim cyipun ex txꞌuꞌj ke. Miꞌn jaw cynimantl cyib aj Ejipt, ex che bel byoꞌn cycyakil ke t-xjalila nimxix cybaj. 13 Che najel cycyakil alumaj wuꞌne, akeju in che waꞌn ttzi nima, ex mlay baj ẍwoꞌjix twitz aꞌ tuꞌn cykan xjal ex mi tuꞌn cykan alumaj. 14 Csakixtel twitz aꞌ wuꞌne ex che betel ke nima wuꞌne ic tzaꞌn aseyt mintiꞌ in jululun. Akine Dios in chin kꞌmante jlu. 15 Oc tbaj xitj tnam Ejipt wuꞌne oc tex kꞌiꞌn tcyakilju at tuj ex oc cycub byoꞌn cycyakil xjal najl tuj, cꞌeleltzun cynicꞌ tiꞌj, akine Dios.

16 Atzunju bitz lu te bis cxel cybitzan ke xuꞌj te txkantl nasyon oc cyjaw okꞌ tiꞌj tnam Ejipt ex cyiꞌj ke xjal nimxix cybaj najlke tuj. Akine Dios in chin kꞌmante jlu.

17 Tuj t-olajin kꞌij te xjaw te tcablajin abkꞌi, tzaj yolin Kman wucꞌile ex tma cyjaꞌ: 18 Aya xjal, bitzanxa jun bitz te bis cyiꞌj ke xjal nimxix cybaj ateꞌ tuj Ejipt.

20 Che bel byoꞌn aj Ejipt junx cyucꞌil keju o che cyim tuj kꞌoj. Banin tten spad cyiꞌj. Cyiꞌnxe ke cyucꞌix ke cyxjalil nim cybaj. 21 Ke nejenel nimxix cyipun, akeju otok che cuꞌpun tuj cynajbil cyimni cyucꞌix keju mojl cyyol cyucꞌil, ctzajel cymaꞌn cyjaꞌ: Ma che cuꞌtz ex ma che cub coẍeꞌ cyxol keju mya nimal Dios ke, akeju e cyim tuꞌn spad tuj kꞌoj, che chi.

22 Atzun taꞌ nasyon Asiria cyucꞌix ke t-soldad nim cybaj ex txolin tiꞌj tmukbil tuꞌn cymakbil. Cycyakil ke jlu tuj kꞌoj e cyim. 23 Makuꞌn ke max t-xeꞌpun cynajbil cyimni. Tej itzꞌxtok ke soldad lu tzaj nim cyxobil xjal cyuꞌn, pero e cyim tuj kꞌoj ex atzun jaꞌlo txolin tiꞌj tmukbil Asiria cyuꞌn.

24 Atzun taꞌ nasyon Elam cyucꞌix cycyakil ke t-soldad txolin tiꞌj tmukbil cyuꞌn. Cycyakil ke jlu tuj kꞌoj e cyim, mya nimal Dios ke ex ma cheꞌx tuj cynajbil cyimni. Tej itzꞌxtok ke tzaj cyxobil xjal cyuꞌn, atzun jaꞌlo mintiꞌ nimbil cye cyxol keju o che cuꞌpun tuj cynajbil cyimni. 25 Palch tnam Elam cyxol cycyakil ke t-soldad cyimni ke, cycyakil ke jlu tuj kꞌoj e cyim ex mya nimal Dios ke, jaꞌlo txolin cyten tiꞌj tmukbil Elam. Tej itzꞌxtok ke tzaj nim cyxobil xjal cyuꞌn, atzun jaꞌlo mintiꞌ nimbil cye cyxol keju o che cuꞌpun tuj cynajbil cyimni. Ma che cuꞌpun cyxol ke xjal byoꞌn e cub.

26 Atzun taꞌ nasyon Mesec tucꞌix Tubal, cyucꞌix cycyakil ke cysoldad txolin tten cymukbil tiꞌj cymukbil, cycyakil ke jlu mya nimal Dios ke ex tuj kꞌoj e cyim; tej itzꞌxtok ke tzaj nim cyxobil xjal cyuꞌn. 27 Mya junx makuꞌn ke cyucꞌil ke cyimni maꞌ cyoclen e ten twitz txꞌotxꞌ ojtxi, akeju kꞌiꞌnx cymacbil in ajben tuj kꞌoj tej cycuꞌx tuj cynajbil cyimni, tocx cyspad tjakꞌ cywiꞌ ex cub cycastiw tuꞌn tlaj cyil, tuꞌnju nim cyxobil xjal tzaj cyuꞌn tej itzꞌxtok ke.

28 Icx teya Faraón cbajel buchja cyxol ke xjal mya nimal Dios ke, ex cbelex paleꞌya cyucꞌil keju o che cyim tuj kꞌoj.

29 Atzun taꞌ Edom cyucꞌix ke t-rey ex cycyakil ke tcawbil. Masque ten nimxix cyipumal, pero atzun ateꞌ cyxol ke xjal o che cyim tuj kꞌoj, makuꞌn ke cyxol ke xjal mya nimal Dios ke, cyxol keju o che cuꞌpun tuj cynajbil cyimni.

30 Atzun ateꞌ cycyakil ke nejenel cye ke tnam ateꞌ tuj txꞌotxꞌ tuj tbankꞌab kꞌij cyucꞌix cycyakil aj Sidón. E oc nimxix cyipumal ex tzaj nim cyxobil xjal cyuꞌn tej itzꞌxtok ke, atzun jaꞌlo o che cuꞌpun cyxol ke cyimni o che cyim tuj kꞌoj, ex ma tzꞌel cychꞌixwi. Mya nimal Dios ke, makuꞌn ke ex mintiꞌ nimbil cye cyxol keju o che cuꞌpun tuj cynajbil cyimni.

31 Octzun tqueꞌyinte Faraón ke jlu, ckebel tcꞌuꞌj tiꞌj cycyimlen cycyakil ke t-xjalil, porque icx te ex cyucꞌix cycyakil ke t-soldad e cyim tuj kꞌoj. Akine Dios in chin kꞌmante jlu. 32 Tej itzꞌxtok Faraón xi nokꞌoꞌꞌne ambil te tuꞌn ttzaj nim cyxobil xjal tuꞌn; cyjaꞌtzun makuꞌn cyxol ke xjal mya nimal Dios ke, cyxol keju e cyim tuj kꞌoj, ax icx ke t-soldad nimxix cybaj. Akine Dios in chin kꞌmante jlu.