Ic tten Faraón ic tzaꞌn jun tzeꞌ wiꞌten
31
Tuj tnejel kꞌij te toxin xjaw ex te tjunlajin abkꞌi, tzaj yolin Kman wucꞌile ex tma cyjaꞌ: 2 Aya xjal, kꞌmanxa te Faraón aju rey te Ejipt ex cye cycyakil ke t-xjalil:¿Alcye juntl maꞌ toclen ic tzaꞌn teya?
3 Ic ttentok nasyon Asiria ic tzaꞌn jun wiꞌten twi witz Líbano, in cub t-xmuꞌjin ke mastl tzeꞌ cyuꞌn ke tkꞌab tbanilxix che queꞌyin, matijxix twaꞌl max in japun tunen twitz cyaꞌj.
4 Aju jbal ex aju aꞌ in jatz jlet twitz txꞌotxꞌ e onin tiꞌj tuꞌn tchꞌiy; e jatz ke twi nima ttxlaj jatum tcubtok; ex ke nima lu baj cyaꞌlin cycyakil ke tzeꞌ tuj chcꞌul.
5 Tuꞌnju attok nim aꞌ t-xeꞌ, chꞌiyxix mas cywitz ke txkantl tzeꞌ tuj chcꞌul; el jlet nimxix tkꞌab ex e chꞌiyxix wen.
6 Cycyakil txcaj jil baꞌn che lipan twitz cyaꞌj cybincha cykꞌuꞌ cyxol ke tkꞌab; ex cycyakil txcaj txcup te tjakꞌ cꞌul e alin t-xe tkan. E najan nimcu nasyon tjakꞌ t-xlecumal.
7 A jlu jun tzeꞌ tbanilxixtok, maꞌ twaꞌl ex nmak ke tkꞌab, tuꞌnju xiꞌyni ke tlocꞌ tuj aꞌ.
8 Mintiꞌ jun wiꞌten tuj tkan tawal Dios pon ic tzaꞌn te; mintiꞌ jun tzaj attok tkꞌab ic tzaꞌn te, mintiꞌ jun tzeꞌ castaño attok nim t-xak ic tzaꞌn te, ex mintiꞌ jun tzeꞌ tuj tkan tawal Dios o pon queꞌybilte tbanilxix ic tzaꞌn te.
9 Wuꞌne tbanilxix o tzꞌoc queꞌyin ex nimxix tkꞌab; ke mastl tzeꞌ tuj Edén o che bisun tuꞌnju mintiꞌ e pon ic tzaꞌn te.
10 Cyjaꞌtzun, atzun jlu in tmaꞌn Kman: Matijxix ma tzꞌoc twaꞌl tzeꞌ ex ma japun tunen max twitz cyaꞌj; nimxix ma chꞌiy ex nimxix ma jaw tniman tib. 11 Tuꞌntzun jlu ma tzꞌel wicꞌune; cxel nkꞌoꞌne tuj tkꞌab jun nejenel stranjer xjal, ex cꞌoquel binchaꞌn tiꞌj ic tzaꞌnx tbinchben mya baꞌn. 12 Cjawil txꞌemin cyuꞌn ke stranjer xjal mas txꞌuꞌjxix ke ex cyjel cycolin; che elel tokj ke tkꞌab ex che bel tzꞌak cywiꞌ ke witz ex cyuj ke chkꞌajlaj, ex cyuj ke tkan xak, ex cycyakil ke xjal e najan tjakꞌ t-xlecumal che elel ok ex cyjel cycolin. 13 Cycyakil txcaj jil baꞌn che lipan twitz cyaꞌj che tzajel najal cyxol ke tkꞌab tzeꞌ otok cub tzꞌak, ex cycyakil txcaj jil te tjakꞌ cꞌul che oquex ten cyxol ke tkꞌab. 14 Ex mintiꞌtl juntl tzeꞌ cchꞌiyil twaꞌl matijxix wen masque tcub nikayin ttxlaj aꞌ: masque bet nimxix aꞌ t-xeꞌ mlayx japun canun tunen max twitz cyaꞌj, ex miꞌnxixpe chꞌiy twaꞌl. Cycyakil tcub cysentens tuꞌn cycyim, tuꞌn cyxiꞌ tuj cynajbil cyimni tjakꞌ txꞌotxꞌ ex tuꞌn cycuꞌpun cyucꞌil keju ateꞌ tuj mukbil.
15 Akine Dios in xi nmaꞌne jlu: Oc tcuꞌpun tuj cynajbil cyimni, tuꞌn bis ctzkijel wuꞌne aju mar maꞌxix t-xeꞌ; che webel ke nima wuꞌne ex icx ke aꞌ tuj tkꞌab xak; nok tuꞌn tlaj, ctzajel tbis ju witz Líbano wuꞌne ex che tzkijel cycyakil ke tzeꞌ tuj chcꞌul. 16 Oc tcuꞌpun wuꞌne tuj cynajbil cyimni tuꞌn tpon cyucꞌil keju o che cyim, biꞌx che tzajel luꞌlun ke nasyon tuꞌn tkꞌajkꞌajel oc tcuꞌpun tzꞌak. Max tuj cynajbil cyimni ckebel cycꞌuꞌj cycyakil ke tzeꞌ ateꞌtok tuj Edén, cyucꞌix ke tzeꞌ ateꞌtok twi witz Líbano, akeju tbanilxix che queꞌyin ex in bet aꞌ cyxeꞌ. 17 Ax icx cye che xeꞌl tuj cynajbil cyimni ic tzaꞌn te, ex cꞌoquel cyjunin cyib cyucꞌil keju o che cyim tuj kꞌoj, akeju e najan tjakꞌ t-xlecumal cyxol ke nasyon. 18 Mintiꞌ jun tzeꞌ tuj Edén o pon queꞌybilte tbanilxix ex matij twaꞌl ic tzaꞌn te; masque icju, pero cxeꞌl tuj cynajbil cyimni cyucꞌix ke mastl tzeꞌ ateꞌtok tuj Edén, tuꞌn tnajan cyxol ke xjal mya nimal Dios ke, ex cyxol ke xjal e cyim tuj kꞌoj.
Aju tzeꞌ, atzun in yolin tiꞌj Faraón ex cyiꞌj cycyakil ke t-xjalil. Akine Dios ma chin kꞌmante jlu.