Cbel cycastiw aj Ejipt
Atzun jlu in tmaꞌn Kman, chicuya: Cyjaw okꞌe tuꞌn tlaj tkꞌijlalil tzul,
3 chꞌix tul canun; chꞌix tul lakꞌeꞌ tkꞌijlalil castiw tuꞌn Kman, jun kꞌij kꞌek muj, atzun kꞌij tuꞌn tcub cycastiw ke nasyon.
4 Tzul kꞌoj cyiꞌj aj Ejipt, ex ctzajel cyxobil aj Etiopía oc cycub byoꞌn nimcu xjal tuj Ejipt; cxel elkꞌaꞌn cykꞌinumabl ex cbel xitun tnam Ejipt, cyucꞌix ke t-simyentil.
5 Ax icx che cymel ke soldad te tnam Etiopía tuj kꞌoj, icx te Libia ex te Lidia, ex ke soldad te tcyakil Arabia, te Cub ex cye txkantl tnam mojl cyyol tucꞌil Ejipt.
6 Atzun jlu in tmaꞌn Kman: Akeju in che onin tiꞌj Ejipt che cymel tuj kꞌoj. Cxelx keꞌ tuj Migdol ex cpol baj max tuj tnam Asuán. Aju tnimbil tib Ejipt tuꞌnju at tipumal, biꞌx cnajel. Akine Dios in chin kꞌmante jlu.
7 Cꞌoquel txꞌotxꞌ Ejipt wuꞌne te jun lugar mintiꞌ xjal cnajal tuj, mas pyor ic tzaꞌn ke mastl tnam mintiꞌ xjal cyuj, ex biꞌx che bajel xitj tnam ateꞌ tuj tcwent, mas pyor che oquel ic tzaꞌn ke mastl tnam o che baj xitj. 8 Octzun toc nkꞌoꞌne tkꞌakꞌal tnam Ejipt, ex oc cynaj cycyakil keju in che onin tiꞌj, cꞌeleltzun cynicꞌ tiꞌj, akine Dios.
9 Oc tpon tkꞌijlalil tuꞌn tcub tcastiw tnam Ejipt, che xel nsamaꞌne ke sanjel tuj barc, tuꞌn t-xi cykꞌoꞌn jun tkanil te xobtzabl cye ke xjal najlke tuj tnam Etiopía, akeju mintiꞌtok in baj cycꞌuꞌj, ex ctzajel t-xobil cyiꞌj. Chꞌix tul canun ju kꞌij.
10 Akine Dios in xi nmaꞌne jlu: Cxel nsamaꞌne Nabucodonosor aju rey te Babilonia, tuꞌn tnaj tcyakil tkꞌinumabl Ejipt tuꞌn. 11 Cxeꞌl Nabucodonosor cyucꞌix ke t-soldad, akeju mas txꞌuꞌj ke ic tzaꞌn ke mastl nasyon, che xeꞌl xitil te tnam Ejipt, che oquel tzokpaj tiꞌj tucꞌil cyspad, ex cyjel noj tuj tnam cyuꞌn tuꞌn cyimni. 12 Ctzkijel aju nima Nilo wuꞌne, ex cxel nkꞌoꞌne ju txꞌotxꞌ tuj cykꞌab ke xjal mya baꞌn; cyuꞌn ke stranjer xjal lu cbajel naj ju txꞌotxꞌ Ejipt ex tcyakilju at tuj. Akine Dios in chin kꞌmante jlu.
13 Akine Dios in xi nmaꞌne jlu: Che bajel nkꞌuchine ke tilbilal, icx ke tilbilal nnoꞌc cydiosin xjal tuj Menfis. Miꞌn tentl jun cawil tuj Ejipt, ex ctel nimxix xobajil tuj txꞌotxꞌ Ejipt wuꞌne.
14 Cbajel nxitune aju txꞌotxꞌ Patros, cꞌoquel nkꞌoꞌne tkꞌakꞌal tnam Zoán, ex cbel t-sentens tnam Tebas wuꞌne.
15 Ctzajel nimxix nkꞌoje tiꞌj tnam Sin aju in kꞌonte tipumal tnam Ejipt, ex nim cyajlal xjal che najel wuꞌne tuj tnam Tebas. 16 Cꞌoquel nkꞌoꞌne tkꞌakꞌal tnam Ejipt, ex cjawil cyxkutzꞌin cyib ke aj Sin tuꞌn taꞌw; cbel tilj junjun piẍ muro tiꞌj tnam Tebas, ex cucx che yajletel ke aj Menfis. 17 Ke cuꞌxun te tnam On ex te tnam Bubastis che cymel tuj kꞌoj, ex atzun ke xuꞌj che xel kꞌiꞌn pres tuj juntl tnam. 18 Oc tnaj tipumal Ejipt wuꞌne, aju in jaw tnimantok tib tuꞌn, biꞌx cꞌoquel klolj twitz kꞌij tuj tnam Tafnes, cbel ten kꞌek muj tuj Ejipt, ex ke xjal najlke tuj che xel kꞌiꞌn pres tuj juntl tnam najchak. 19 Cbel cysentens aj Ejipt wuꞌne, ex cꞌeleltzun cynicꞌ tiꞌj, akine Dios.
20 Tuj twukin kꞌij te tnejel xjaw te tjunlajin abkꞌi, tzaj yolin Kman wucꞌile ex tma cyjaꞌ: 21 Aya xjal, o tokj tkꞌab Faraón wuꞌne, aju rey te Ejipt, ex mi jun nnoꞌc kꞌanante, ex naꞌnx toc potzin tiꞌj tuꞌn tten tipun juntl maj ex tuꞌn tbant ttzyunte spad juntl maj. 22 Cyjaꞌtzun akine Dios in xi nmaꞌne jlu: Ma chin oque aj kꞌoj tiꞌj Faraón aju rey te Ejipt. Che bel tokj cycabil tkꞌab wuꞌne, aju baꞌnx taꞌ ex aju o tokj, cꞌeleltzun tzꞌak spad tuj tkꞌab wuꞌne. 23 Che xel nsputune aj Ejipt cyxol mastl nasyon, ex cyxol mastl tnam. 24 Cxel nkꞌoꞌne cyipun ke tkꞌab rey te Babilonia, ex cꞌoquex nkꞌoꞌne nspadiye tuj tkꞌab. Atzunte Faraón che bel ntokine ke tkꞌab, ex cjawil wuꞌyin twitz aj kꞌoj tiꞌj oc tnaꞌnte otok cꞌixbi tuꞌn. 25 Cxel nkꞌoꞌne cyipun ke tkꞌab rey te Babilonia, atzun ke tkꞌab Faraón che elel bakchaj wuꞌne. Oc t-xi nkꞌoꞌne nspadiye tuj tkꞌab rey te Babilonia ex oc t-xi tjatoꞌn cyiꞌj aj Ejipt, cꞌeleltzun cynicꞌ aj Ejipt tiꞌj, akine Dios. 26 Che xel nsputune aj Ejipt cyxol mastl tnam ex cyxol mastl nasyon, ex cꞌeleltzun cynicꞌ tiꞌj, akine Dios.