Cbel cycastiw aj Ejipt
29
Tuj tcablajin kꞌij te tlajin xjaw ex te tlajin abkꞌi, tzaj yolin Kman wucꞌile ex tma cyjaꞌ: 2 Aya xjal, queꞌyinxa tumlal txꞌotxꞌ Ejipt jatum in cawin Faraón, ex kꞌmanxa te rey ex cye cycyakil aj Ejipt aju mya baꞌn o cybincha. 3 Kꞌmanxa cyjaꞌ:Atzun jlu in tmaꞌn Kman: Ma chin oque aj kꞌoj tiꞌja, aya Faraón rey te Ejipt, ic ttena ic tzaꞌn jun nintz txcup tcuꞌxa tuj nima etzan tuꞌna, ex in tmana cyjaꞌ: Weye aju nima Nilo, wuꞌne o bant, chitzuna.
4 Cꞌoquex nkꞌoꞌne jun ganch tuj ttziꞌya, ex ke cyiẍ ateꞌ tuj nima etzan tuꞌna oc nbinchaye tuꞌn cyoc cychmon cyib tiꞌj tpwakil tiꞌja. Cjawitz njawoꞌne tuj nima cyucꞌix cycyakil ke cyiẍ cychmon cyib tiꞌj tpwakil tiꞌja.
5 Cxel nxoꞌne max tuj tzkij txꞌotxꞌ cyucꞌix ke cyiẍ ateꞌ tuj nima etzan tuꞌna; cbel tzꞌaka tuj cojbil ex mi jun cjawil kꞌinte teya tuꞌn tcuꞌx makuꞌna. Cxel nkꞌoꞌne t-ximlala te cychiꞌ ke txcup te tjakꞌ cꞌul ex te cychiꞌ ke cꞌutz.
6 Cycyakil xjal najl tuj tnam Ejipt cꞌelel cynicꞌ tiꞌj ka akine Dios. Ke aj Israel e pon kanil onbil tucꞌila, pero oca te cye ic tzaꞌn jun ajlaj tokokon tiꞌj.
7 Tej ttzaj tzyuꞌna cyuꞌn ic tzaꞌn jun cyꞌakoꞌch, atzun teya cub tokja ex cꞌixbi cyxuꞌc tuꞌna; tej cyoc kꞌejeꞌ tiꞌja, atzun teya cub tokja ex e cub tzꞌak twitz txꞌotxꞌ tuꞌna.
8 Cyjaꞌtzun akine Dios in xi nmaꞌne jlu: Aya tnam Ejipt, che tzajel wiꞌne ke aj kꞌoj tuꞌn cyoc tzokpaj tiꞌja tuꞌn spad, ex tuꞌn cycub byoꞌn ke xjal ex ke alumaj cyuꞌn. 9 Cꞌoquela te tzkij txꞌotxꞌ jatum mintiꞌ xjal najl tuj, ex cꞌelel cynicꞌ xjal tiꞌj ka akine Dios. O tmaya cyjaꞌ: Weye ju nima Nilo, wuꞌne o bant, chitzuna. 10 Cyjaꞌtzun ma chin oque aj kꞌoj tiꞌja ex tiꞌj nima etzan tuꞌna. Cꞌoquela wuꞌne te tzkij txꞌotxꞌ xobajilxix ex mintiꞌ xjal najl tuj, cxelx keꞌ tuj Migdol cpol baj tuj tnam Asuán, ex max jatum ulni tmojonil tnam Etiopía. 11 Mi ke xjal ex mi ke alumaj che icꞌel bet tuj ju lugar lu. Tuj enter 40 abkꞌi mi jun cnajal tuj. 12 Cꞌoquel txꞌotxꞌ Ejipt wuꞌne te jun lugar mintiꞌ xjal najl tuj, ic tzaꞌn ke mastl tnam mintiꞌ xjal o che cyaj ten cyuj; biꞌx cbel xitj ex tuj enter 40 abkꞌi mi jun cjawil binchante te juntl maj, mas pyor cꞌoquel ic tzaꞌn ke mastl tnam o che cub xitj, ex ke xjal najl tuj che xel nsputune cyxol mastl nasyon.
13 Akine Dios in xi nmaꞌne jlu: Tbajlenxi 40 abkꞌi, che ajetz nchmoꞌne juntl maj aj Ejipt jatum otok che baj nsputune. 14 Ke aj Ejipt, akeju otok cheꞌx kꞌiꞌn pres, che ajetz meltzꞌaj wuꞌne ex che najal tuj txꞌotxꞌ Patros, ax tuj cytanmi, ex atzun cbantel jun cawbil cyuꞌn chꞌin toclen.
15 Aju cawbil lu cꞌoquel te mintiꞌ tipun cywitz mastl cawbil, ex mlay jaw tiꞌntl tib tuꞌn tcawin cyibaj mastl nasyon. Cꞌoquel wuꞌne te chꞌin tipun tuꞌntzun miꞌn tcawin cyibaj mastl nasyon, 16 mlay tzꞌoc keꞌtl cycꞌuꞌj aj Israel tiꞌj Ejipt, tzul tiꞌj cycꞌuꞌj aju il otok cybincha tej cyxiꞌ kanil onbil te. Cꞌeleltzun cynicꞌ aj Israel tiꞌj, akine Dios.
17 Tuj tnejel kꞌij te tnejel xjaw ex tuj abkꞌi 27, tzaj yolin Kman wucꞌile ex tma cyjaꞌ: 18 Ate Nabucodonosor aju rey te Babilonia, cyucꞌix ke t-soldad, o che kꞌojin cyuwxix tiꞌj tnam Tiro; cycyakil o tzaj jilj ttzmal cywiꞌ ex o baj tzꞌolj ttzal cyiꞌj tjakꞌ iktz; pero mi Nabucodonosor ex mi ke t-soldad mintiꞌ chꞌin cycamba tej cykꞌojin tiꞌj tnam Tiro. 19 Cyjaꞌtzun akine Dios in xi nmaꞌne jlu: Cxel nkꞌoꞌne aju txꞌotxꞌ Ejipt te Nabucodonosor tuꞌn toc te tajwil, ex cꞌelel tiꞌn tkꞌinumabl ex tcyakil aju at tuj, cchjetel twi cycꞌuꞌj ke t-soldad tuꞌn tcyakilju cxel telkꞌaꞌn. 20 Cxel nkꞌoꞌne aju txꞌotxꞌ Ejipt te Nabucodonosor te chojbil te, tuꞌnju o kꞌojin nimxix tiꞌj tnam Tiro, porque weye o che ajben. Akine Dios in chin kꞌmante jlu.
21 Oc tbant jlu, cxel nkꞌoꞌne nimxix cyipumal aj Israel, ex aya Ezequiel c-yolila cyxol mintiꞌ t-xobila. Cꞌeleltzun cynicꞌ tiꞌj, akine Dios.