Cbel tcastiw rey te tnam Tiro
Atzun jlu in tmaꞌn Kman: Ma jaw tniman tiba tuj tanmiya, ex ma tmaya cyjaꞌ: Akine Dios, kꞌukl kine tuj tkꞌukbil Dios ex txolin wiꞌje tuꞌn mar, chiya. Pero teya mya Diosa, nok oꞌcx jun xjala ex tuj t-ximbetza ka junx taꞌ tnabla ic tzaꞌn tnabl Dios.
3 ¿Maspetzun at tnabla twitz Daniel? ¿Ojtzkiꞌnpetzun tuꞌna tcyakilju at tuj ewaj?
4 Tuꞌnju tnabla ex tojtzkibla ma cnet nimxix tkꞌinumabla, ma baj tchmoꞌna nim kꞌan pwak ex sak pwak.
5 Tuꞌnju nimxix tnabla tiꞌj cꞌaẍjel ma chmet tkꞌinumabla, ex tuꞌnju tkꞌinumabla ma jaw tniman tiba.
6 Cyjaꞌtzun in tmaꞌn Kman cyjaꞌ: Tuꞌnju in tmaꞌna ka ic tnabla ic tzaꞌn tnabl Dios,
7 che tzajel wiꞌne ke stranjer xjal kꞌojlel tiꞌja, ke xjal lu puro txꞌuꞌj ke, cjawitz cyiꞌn cyspad tuj tjayil tuꞌn cyoc tzokpaj tiꞌja, aya tbanilxix queꞌyina ex at nimxix tnabla, ex cꞌelel kꞌiꞌn toclena cyuꞌn.
8 Cbelex xoꞌna cyuꞌn tuj cynajbil cyimni, ex cymela cyuꞌn tuj tmij mar.
9 ¿Cucxpe cxel tmaꞌna ka aya Dios oc tcub tena cywitz ke byol teya? Tuj cykꞌab keju che bel byonte teya mya Diosa, nok oꞌcx jun xjala.
10 Cymela cyuꞌn ke stranjer xjal, ic tzaꞌn in che cyim ke xjal mya nimal Dios ke. Akine Dios in chin kꞌmante jlu.
Bitz te bis tiꞌj rey te tnam Tiro
11 Tzaj yolin Kman wucꞌile ex tma cyjaꞌ: 12 Aya xjal, bitzanxa jun bitz te bis tiꞌj rey te tnam Tiro, ex kꞌmanxa cyjaꞌ:
Atzun jlu in tmaꞌn Kman: Aju ttena nej tzꞌaklxixa, nimxix tnabla ex jumajx tbanilxix queꞌyina.
13 Nej, atzun cub tena tuj Edén tuj tkan tawal Dios, toctok tcyakil txcaj tal abj tbanilxix ex wiꞌyilxix tiꞌj t-xbaluna, atzun ke jlu: Rubí, crisólito, jade, topasio, cornalina, jaspe, zafiro, granate ex esmeralda; kꞌan pwakile ke adorn toc tiꞌja, banimaj ke atxix tuj kꞌij tej tcub binchaꞌna.
14 Aya querubín maꞌ toc toclena ex toca te xkꞌukil, akine in cub kꞌonte teya twi witz xjan te Dios; atzun o tena ex o betjeya cyxol ke abj in cꞌant kꞌakꞌ cyiꞌj.
15 Atxix tuj kꞌij tej tcub binchaꞌna, tzꞌaklxixa ex mintiꞌ tpaltila, pero te tibajxi tbinchaya aju mya baꞌn.
16 Tuꞌnju nimxix tcꞌaꞌẍa, o tbinchaya nim mya baꞌn cyiꞌj xjal ex o tbinchaya il, cyjaꞌtzun ex nlajoꞌna twiꞌ ju witz te Dios, ex nlajoꞌna cyxol ke abj in cꞌant kꞌakꞌ cyiꞌj, aya querubín toca te xkꞌukil.
17 Jaw tniman tiba tuꞌnju tbanilxix queꞌyina; ex tuꞌnju nim t-spicꞌumala, oca te mintiꞌ tnabla. Cuꞌx nxoꞌna tuꞌn tcuꞌpuna twitz txꞌotxꞌ, ex oc nkꞌoꞌna tuꞌn cyxmayin ke rey tiꞌja.
18 Nimxix il o tbinchaya ex nimxix o sbuna tej tcꞌayina mya tuj tumel tiꞌj tcꞌaꞌẍa, ex tuꞌntzun jlu ma baj ttzꞌilsaꞌna ke ja jatum in cꞌuluna. Cyjaꞌtzun, tiꞌjxa o tzꞌel cꞌant jun kꞌakꞌ wuꞌne ma baj tzꞌeꞌya tuꞌn. Jaꞌlo cycyakil in che queꞌyin tiꞌja ma cub tzaꞌjixa twitz txꞌotxꞌ.
19 Cycyakil ke nasyon ojtzkiꞌn twitza cyuꞌn biꞌx in che jaw secꞌpaj oc tilwaja cyuꞌn. Xobajilxlix ma tzꞌoc queꞌyina; ex te jumajx ma naja.
Cbel cycastiw aj Sidón
20 Tzaj yolin Kman wucꞌile ex tma cyjaꞌ: 21 Aya xjal, queꞌyinxa tumlal tnam Sidón ex kꞌmanxa cye xjal aju mya baꞌn o cybincha. 22 Kꞌmanxa cyjaꞌ:
Atzun jlu in tmaꞌn Kman: Ma chin oque aj kꞌoj cyiꞌje, akeye aj Sidón; cxel nyecꞌune wipumale cyxole. Oc tcub cysentense wuꞌne ex oc t-xi nyecꞌune cyeye ka xjan kine, cꞌeleltzun cynicꞌe tiꞌj, akine Dios.
23 Cxel nsamaꞌne txꞌuꞌj yabil cyiꞌje ex cbetel cychcꞌele cyuj cay; che cymel tuꞌn spad ke xjal najl tuj tnam Sidón oc cyoc tzokpaj ke aj kꞌoj cyiꞌj tuj tcyakil pacꞌ te tnam. Cꞌeleltzun cynicꞌe tiꞌj, akine Dios.
24 Ke nasyon cyvesin cyib cyucꞌil aj Israel ex ma che el icꞌunte cye, mlay che octl te cye ic tzaꞌn jun chꞌiꞌx tzꞌuꞌp twiꞌ ex nimxix taꞌw. Cꞌeleltzun cynicꞌe tiꞌj, akine Dios.
25 Akine Dios in xi nmaꞌne jlu: Oc cytzaj nchmoꞌne ke aj Israel cyxol ke nasyon jatum cysputun cyib, cxel nyecꞌun wibe cywitz ke nasyon ka xjan kine. Che najal juntl maj aj Israel tuj cytxꞌotxꞌ, aju txꞌotxꞌ xi nkꞌoꞌne te nmajene Jacob. 26 Atzun che ankꞌil tuj txubtxaj ex segurxix, cjawil cybinchaꞌn cyja ex cbelex cyawaꞌn tkan uva. Wuꞌne cbel cysentens ke tnam cyvesin cyib cyucꞌil aj Israel, akeju ma che el icꞌunte cye. Cꞌeleltzun cynicꞌ aj Israel tiꞌj, akine Cydios.