Ezequiel 27

Bitz te bis tuꞌnju naj tnam Tiro

Tzaj yolin Kman wucꞌile ex tma cyjaꞌ: 2 Aya xjal, bitzanxa ju bitz lu te bis 3 tiꞌj tnam Tiro, aju tcub ttzi mar ex nnegosyarin cyucꞌil mastl tnam ateꞌ ttziꞌyile mar. Kꞌmanxa, chitzun Kman in tmaꞌn cyjaꞌ:

Aya tnam Tiro, o tmaya cyjaꞌ: Tbanilxix kine ex mintiꞌ npaltile, chiya;

4 aju tmojonila najchak in pon baj tuj mar, ic ttena ic tzaꞌn jun barc tbanilxix oc queꞌyina cyuꞌn keju e binchante teya.

5 Cycyakil ke tzꞌlom ateꞌc tiꞌja tzajni kꞌiꞌn ke twi witz Senir; aju tzeꞌ maꞌ twaꞌl tcub tuj tmija, atzun el tiꞌj tzeꞌ wiꞌten tzajni kꞌiꞌn twi witz Líbano;

6 ke palet in che ajben te yucul teya, atzun elni ke tiꞌj tzeꞌ cꞌol tzaj kꞌiꞌn tuj txꞌotxꞌ Basán; ke tzꞌlom e ajben tiꞌja, e tzaj kꞌiꞌn tuj mlaj txꞌotxꞌ te tnam Chipre ex loꞌtzimaj cywitz tuꞌn marfil.

7 Aju xbalun tjaw twitz cyaꞌj tuꞌn t-xi lamoꞌna tuꞌn cykꞌikꞌ, tzaj kꞌiꞌn tuj Ejipt, slapun twitz ex lino ttxꞌotxꞌil, ex ajben teya te bander; aju xbalun jax ten te t-xmuꞌja ẍkꞌilin ex ẍjulin queꞌyin, atzun tzaj kꞌiꞌn tuj mlaj txꞌotxꞌ te tnam Elisa.

8 Ke xinak yucul palet tiꞌja tzajnitok ke tuj tnam Sidón ex tuj tnam Arvad, ke xinak yucul teya, nimtok cynabl at ex ax aj Tiro ke.

9 Ke tij xjal at cynabl te tnam Gebal atzun ke in che baj loꞌtzintok ke tpaꞌxil tiꞌja tuꞌn kꞌol. Cycyakil keju yucul barc tuj mar e negosyarin tucꞌila tiꞌj tcꞌaꞌẍa.

10 Ke xinak te tnam Persia, Lidia ex Libia cyoc ke te soldad tuꞌna cyxol ke mastl t-soldadiya; jaw cyyobin cymakbil ex cypasbil cꞌuxbil tiꞌja, ex mejor oc queꞌyina cyuꞌn.

11 Ke xjal te tnam Arvad, cyucꞌix ke t-soldadiya e jax ten xkꞌukil cywiꞌ ke muro toc tiꞌja, ex cywiꞌ ke tjaya maꞌ cywaꞌl e jax ten ke xjal te Gamad xkꞌukil tnam. Oc cyyobin cymakbil tiꞌj tcyakil tnukbil muro toc tiꞌja, cyuꞌntzun ke jlu tbanilxix oc queꞌyina. 12 Tuꞌnju nimtok tkꞌinumabla at in che lokꞌontok aj Tarsis tiꞌj tcꞌaꞌẍa, ex te twi tcꞌaꞌẍa tzaj kꞌoꞌn sak pwak, cꞌuxbil, estaño ex plom. 13 Ax icx ke tnam Grecia, Tubal ex Mesec e lokꞌon tucꞌila, ex tzaj cykꞌoꞌn xjal ex ke tiꞌxti kꞌan cꞌuxbil cytxꞌotxꞌil te chojbil te tcꞌaꞌẍa. 14 Ke xjal najlke tuj tnam Bet-togarma tzaj cychjoꞌn twi tcꞌaꞌẍa tuꞌn chej baꞌn che ikan iktz, tuꞌn chej ikal xjal ex tuꞌn chej mul. 15 Ke xjal te tnam Rodas e lokꞌon tucꞌila. O negosyarina cyucꞌil nimcu tnam ateꞌ ttziꞌyile mar, ex chjet twi tcꞌaꞌẍa cyuꞌn tuꞌn marfil ex tuꞌn tzeꞌ cyuwxix, ébano tbi. 16 O negosyarin tnam Edom tucꞌila, tuꞌnju at nimcu txcaj tcꞌaꞌẍa: Te twi tcꞌaꞌẍa tzaj cyiꞌn ke tal abj tbanilxix ex wiꞌyilxix, ax icx ke xbalun ẍjulin che queꞌyin, ke xbalun slapun cywitz, ke xbalun lino, ex ke tal abj tbanilxix corales ex rubiyes cybi. 17 Ax icx e negosyarin ke aj Israel ex ke aj Judá tucꞌila, ex chjet twi tcꞌaꞌẍa cyuꞌn tuꞌn triw in jaw tuj tnam Minit, ex tuꞌn pan pastel, tuꞌn taꞌl cab, tuꞌn aseyt ex tuꞌn bálsamo. 18 Aju tnam Damasco nimxix o lokꞌon tucꞌila tiꞌj nimcu txcaj tcꞌaꞌẍa ex tiꞌj tkꞌinumabla; ex chjet twi tcꞌaꞌẍa cyuꞌn tuꞌn taꞌl twitz uva in tzaj tuj tnam Helbón ex tuꞌn lan tzajni tuj tnam Zahar. 19 max tuj tnam Uzal tzaj cyiꞌn aj Dan ex aj Javán taꞌl twitz uva, te twi tcꞌaꞌẍa, tucꞌix cꞌuxbil txꞌinomaj, tucꞌix canela ex ptzꞌon at tcꞌocꞌjal. 20 Aju tnam Dedán o lokꞌon tucꞌila ex chjet twi tcꞌaꞌẍa tuꞌn tuꞌn cysiy chej. 21 Ke aj Arabia ex cycyakil ke nejenel te tnam Cedar e lokꞌon tucꞌila, ex chjet twi tcꞌaꞌẍa cyuꞌn cyuꞌn tal ẍneꞌl ex ke ẍneꞌl ex ke tman chip. 22 Ke comersyant te Sabá ex te Raama e lokꞌon tucꞌila, ex chjet twi tcꞌaꞌẍa cyuꞌn tuꞌn elaꞌ txcaj perjum tbanilxix ex cyuꞌn ke tal abj tbanilxix ex wiꞌyilxix ex tuꞌn kꞌan pwak. 23 Tucꞌila e negosyarin ke tnam Harán, Cane ex Edén, cyucꞌix ke comersyant te Sabá, te Asiria ex te Quilmad; 24 tzaj cycꞌaꞌyin xbalun wiꞌyilxix teya, ex mant xbalun ẍkꞌilun queꞌyin, ex xbalun slapun twitz, ex ke xbalun junxilchak queꞌyin cyilbilal, in che cub kꞌoꞌn twitz txꞌotxꞌ te cykꞌukbil xjal, ex sakbak xpotxꞌin tten. 25 Ke barc te tnam Tarsis in che ul lepchix jun tiꞌj juntl, kꞌiꞌmlex cꞌaẍjel cyuꞌn te teya.

Ic ttena ic tzaꞌn jun barc max tuj tmijil mar, nojni tcyakil tuj tuꞌn kꞌinumabl. 26 Ke yucul palet tiꞌja, atzun keju e jeꞌx kꞌinte teya max tuj tmijil mar,

pero baj xituna tuj tmijil mar tuꞌn cykꞌikꞌ in tzaj tuj tjawitz kꞌij. 27 Aju tkꞌinumabla, aju tcꞌaꞌẍa, ke yucul teya ex ke yucul palet tiꞌja, ke calpinter tiꞌja, ke cꞌayil tcꞌaꞌẍa, ke t-soldadiya ex cycyakil ke xjal ikan tuꞌna, che cupunel max t-xeꞌpun mar tuj tkꞌijlalil oc t-xi mulkꞌaja.

28 Tuꞌn tkꞌajkꞌajel cywiꞌ ke yucul teya che tzajel luꞌlun ke xjal ateꞌ ttziꞌyile mar.

29 Cycyakil ke yucul palet cyuj mastl barc ex cycyakil ke yucul barc che eletz tuj barc tuꞌn cyul ttzi txꞌotxꞌ.

30 Cjawil tkꞌajkꞌajel cywiꞌ ex che jawil okꞌ tiꞌja tucꞌil nim cybis. Cjawix cykꞌoꞌn kuk tuj cywiꞌ ex cbajel cytolin cyib tuj tzaꞌj.

31 Tuꞌn tlaja cbel cymatzoꞌn ttzmal cywiꞌ, cꞌoquel cykꞌoꞌn cyxbalun chꞌiꞌx twitz ex che jawil okꞌ tiꞌja tucꞌil nim cybis.

32 Cxel cybitzan jun bitz te bis, ex tuꞌn cybis cxel cymaꞌn cyjaꞌ: ¿Alcye jun jacu pon ic tzaꞌn tnam Tiro, aju tnam ma naj tuj tmijil mar?

33 Oc in che pon ke tcꞌaꞌẍa cyuj ke tnam ttziꞌyile mar, in che jaw tzalaj nimcu nasyon tuꞌna. Tuꞌnju nimxix tkꞌinumabla ex nimcu txcaj tcꞌaꞌẍa e oc ke rey te twitz txꞌotxꞌ kꞌinun tuꞌna.

34 Atzun jaꞌlo ma baj naja tuꞌn mar, ma txi mulkꞌaja max t-xeꞌpun aꞌ. Ke tcꞌaꞌẍa ex cycyakil ke xjal ikan tuꞌna ma cheꞌx mulkꞌaj tucꞌila max t-xeꞌpun mar.

35 In che secꞌpaj tiꞌja cycyakil ke xjal najlke cyuj ke tnam ateꞌ ttziꞌyile mar. Atzun in che luꞌlun tuꞌn cyxobil ke cyrey, ex kꞌanchaꞌl tiꞌj cywitz ka in che xob.

36 Biꞌx ma che jaw secꞌpaj ke comersyant cye txkantl nasyon tuꞌnju ma cub xitja. Xobajilxix ma tzꞌoc queꞌyina; ex te jumajx ma naja.