Cbel cycastiw aj Tiro
26
Tuj tnejel kꞌij te xjaw te tjunlajin abkꞌi, tzaj yolin Kman wucꞌile ex tma cyjaꞌ: 2 Ke xjal te tnam Tiro o cyma tiꞌj tnam Jerusalén cyjaꞌ:Aju tpwertil ja te cꞌaybil cyxol ke nasyon ma baj buchj. Atzun weye ma chin cambane jaꞌlo. Ctel nimxix nkꞌinumable, atzunte tnam Jerusalén ma cub xitj, che chi.
3 Cyjaꞌtzun akine Dios in xi nmaꞌne jlu: Akeye aj Tiro, chin oquele aj kꞌoj cyiꞌje. Che tzajel wiꞌne nimcu nasyon tuꞌn cykꞌojin cyiꞌje, ic tzaꞌn in jaw xtulkꞌin mar,
4 cbel cyxitun ke muro toc tiꞌjele cytanmiye, ax icx ke ja maꞌ cywaꞌl te cycolbil cyibe. Tucꞌixpe txꞌotxꞌ cbajel ntzꞌisoꞌne, ex junx te pic cyjel ten mintiꞌ txꞌotxꞌ tibaj.
5 Tuj tmijil mar cꞌoquel te tzkijsabl cye xyub tzuybil cyiẍ. Akine Dios in chin kꞌmante jlu. Cꞌelex cyelkꞌaꞌn ke nasyon tcyakilju at tuj tnam Tiro.
6 Ke xjal najlke cyuj ke aldey te tnam Tiro che bel byoꞌn tuꞌn spad. Cꞌeleltzun cynicꞌ tiꞌj, akine Dios.
7 Akine Dios in xi nmaꞌne jlu: Ctzajel nsamaꞌne Nabucodonosor aju rey te tnam Babilonia, at tuj txꞌotxꞌ tuj tbankꞌab kꞌij, aju rey at nimxix tipun cywitz cycyakil rey, cꞌoqueltzun tzokpaj tiꞌj tnam Tiro. Tzul cyucꞌil chej cyucꞌix carwaj, cyucꞌix ke xjal kꞌojlel cyjax cyibaj chej, ex cyucꞌil nim soldad.
8 Che bel byoꞌn tuꞌn spad ke xjal najlke tuj aldey te tnam Tiro; cjawil tbinchaꞌn rey jun muro tiꞌjele tnam, cjawil tbinchaꞌn t-xweꞌtzbil tuꞌn toc tzokpaj tiꞌj ex che oquel tzokpaj ke soldad tiꞌj, banin cyten tucꞌil cymakbil.
9 Che oquel tzokpaj tiꞌj tnam tucꞌil máquina in ajben te xitbil muro, ex tuꞌn barret cbel cyxitun ke ja maꞌ cywaꞌl te cycolbil cyib.
10 Octzun tocx rey te Babilonia ttzi tpwertil tnam, cꞌoquex ic tzaꞌn in che ocx ke xjal tuj jun tnam otok cub tiꞌj, che oquextzun nim chej, ex cbajel noj tuj tnam tuꞌn kuk oc tjaw tuꞌn cykan; che tzajel luꞌlun ke muro tuꞌn cykꞌajkꞌajel ke carwaj ex tkꞌajkꞌajel cykan chej cyjax ke kꞌojlel cyibaj.
11 Cbajel cywaban ke chej cyuj cycyakil cay. Cbel tbyoꞌn rey cycyakil ke xjal tuꞌn spad, ex che icꞌel tzꞌak ke tkan ja, akeju cyuwxix cyten.
12 Cꞌelel kꞌiꞌn cykꞌinumable cyuꞌn, cxel cyelkꞌaꞌn cycꞌaꞌẍe, cbel cyxitun ke muro toc tiꞌjele tnam; ax icx ke ja tbanilxix che queꞌyin, ke viga, ke abj, ke ttxꞌakan tzeꞌ ex ke ttxꞌakan ja otok che cub xitj che xel cyxoꞌn tuj mar.
13 Cyjaꞌtzun biꞌx cwebel tkꞌajkꞌajel cybitze wuꞌne, ex mlay binjtz juntl maj tkꞌajkꞌajel twiꞌ cychinbe arpa.
14 Cꞌoquel cytanmiye wuꞌne te jun pic mintiꞌ txꞌotxꞌ tibaj, cꞌoquel te tzkijsabl cye xyub tzuybil cyiẍ, ex mlayx jaw binchaꞌn juntl maj. Akine Dios in chin kꞌmante jlu.
15 Akine Dios in xi nmaꞌne jlu tiꞌj ju tnam Tiro: Ke tnam ateꞌ ttziꞌyile mar che tzajel luꞌlun oc cybinte tkꞌajkꞌajel oc tcub xitj tnam Tiro, oc cyjaw ayayan keju otok che cꞌixbi ex oc cybyet ke xjal najlke tuj. 16 Cycyakil ke rey in che cawin cyuj ke tnam ateꞌ ttziꞌyile mar che beletz tuj cykꞌukbil, cꞌelel cyiꞌn cyẍjoꞌw, icx cyxbalun tbanilxix queꞌyin; ex tuꞌn cyxobil che bel keꞌ twitz txꞌotxꞌ ex che tzajel luꞌlun tcyakil or tuꞌn cyxobil oc cylonte aju otok baj tiꞌj tnam Tiro. 17 Cxeltzun cybitzan ju bitz lu te bis tiꞌj tnam Tiro:
Tzaꞌn tten ma cub xitja, aya tnam najlke xjal tuja, akeju in che akꞌnan tuj mar, aya tnam tbanilxix yolbil teya. Aya, cyucꞌix ke xjal najlke tuja e oque nimxix cyipune cywitz ke mastl tnam ateꞌ ttziꞌyile mar, ex ke mastl tnam tzaj cyxobil cyuꞌne.
18 Atzun jaꞌlo, tuꞌnju ma cub xitja in che luꞌlun tuꞌn cyxobil ke tnam ateꞌ ttziꞌyile mar. Jaꞌlo tuꞌnju ma cub naja, ma che jaw secꞌpaj ke tnam ateꞌ ttziꞌyile mar.
19 Atzun jlu in xi nmaꞌne, akine Dios: Biꞌx cbel xitja wuꞌne ic tzaꞌn ke tnam jatum mi jun xjal najl tuj. Ex cyjel mulkꞌaja wuꞌne tjakꞌ mar maꞌ t-xe; 20 max cpola tuj cynajbil cyimni, jatum ateꞌ ke xjal e ankꞌin tuj tkꞌijlalil ojtxi. Cbelex nxoꞌne max t-xeꞌpun txꞌotxꞌ jatum ateꞌ ke tnam o che cub xitj te jumajx, ex cnajala cyxol keju o che cyim. Mlayx che najan juntl maj ke xjal tuja, ex mlayx jaw binchaꞌna juntl maj cyxol ke xjal itzꞌx ke twitz txꞌotxꞌ. 21 Oc cylonte xjal jlu biꞌx che jawil secꞌpaj tiꞌja ex biꞌx cnajela. Che jyol ke xjal tiꞌja ex mlay cneta cyuꞌn. Akine Dios in chin kꞌmante jlu.