Cbel cycastiw aj Amón
25
Tzaj yolin Kman wucꞌile ex tma cyjaꞌ: 2 Aya xjal, queꞌyinxa tumlal cytanmi aj Amón ex kꞌmanxa cye aju mya baꞌn oc cybincha. 3 Kꞌmanxa cye tuꞌn cybinte aju yol in xi nmaꞌne cye cyjaꞌ: E jaw schꞌine tuꞌn tzalajbil tej cylonteye otok cub xitj njaye, ex otok baj xitj cytanmi aj Israel ex keju najlke tuj Judá otok cheꞌx kꞌiꞌn pres tuj juntl tnam najchak. 4 Cyjaꞌtzun che xel nkꞌoꞌne tuꞌn cycyaj tene tjakꞌ cycawbil ke tnam te tumlal tjawitz kꞌij, cꞌelel cyetzan cytxꞌotxꞌe, ex cbel cykꞌoꞌn cyja xbalun cyxole jatum tuꞌn cycub ten. Atzun ke che xel nicꞌbente twitz cyawale ex cxel cycꞌaꞌn cycꞌaye lech. 5 Aju tnam Rabá cꞌoquel wuꞌne te cywabl chej camey, atzunte tnam Amón cꞌoquel wuꞌne te cywabl ẍneꞌl. Cꞌeleltzun cynicꞌe tiꞌj, akine Dios.6 Akine Dios cxel nmaꞌne jlu: Akeye aj Amón o jaw txakꞌan cykꞌabe, o che jaw tꞌicpaje tuꞌn tzalajbil, ex o tzꞌel cyicꞌune cytanmi aj Israel. 7 Cyjaꞌtzun cbel cycastiwoye wuꞌne ex che xel nkꞌoꞌne cye ke nasyon tuꞌn tel cyiꞌn tcyakilju at cyeye. Che najele wuꞌne cyxol mastl tnam, che bel naje wuꞌne cyxol ke nasyon, biꞌx che najele cycyakile. Cꞌeleltzun cynicꞌe tiꞌj, akine Dios.
Cbel cycastiw aj Moab
8 Akine Dios in xi nmaꞌne jlu: Ke aj Moab ex ke aj Seir in cymaꞌn: Aju tnam Judá junx taꞌ ic tzaꞌn ke txkantl nasyon. 9 Cyjaꞌtzun che tzajel wiꞌne ke aj kꞌoj tuꞌn cyoc tzokpaj cyiꞌj ke tnam ateꞌ ttxaꞌnile txꞌotxꞌ Moab, ex che bel nxitune cycyakil tnam ateꞌ tuj txꞌotxꞌ Moab, cyucꞌixpe ke tnam Bet-jesimot, Baal-meón ex Quiriataim, akeju mas tbanilxix ke. 10 Cxel nkꞌoꞌne cytxꞌotxꞌ aj Moab tucꞌix cytxꞌotxꞌ aj Amón cye ke xjal najlke tuj tjawitz kꞌij, cyjaꞌtzun cyxol ke nasyon mi jun xjal tzul naꞌnte ju tnam Amón. 11 Cbel cysentens aj Moab wuꞌne ex cꞌeleltzun cynicꞌ tiꞌj, akine Dios.
Cbel cycastiw aj Edom
12 Akine Dios in xi nmaꞌne jlu: Ke aj Edom o xelin cyuꞌn cyiꞌj ke aj Judá, ex tuꞌn jlu at cyil. 13 Tuꞌntzun jlu akine Dios in xi nmaꞌne jlu: Cbel cycastiw aj Edom wuꞌne, che najel ke xjal ex ke alumaj, ex biꞌx cbajel xitj tcyakil wuꞌne. Che cymel ke xjal tuꞌn spad, ctzajelx keꞌ tuj tnam Temán cpol baj tuj tnam Dedán. 14 Cxelil wuꞌne cyiꞌj aj Edom cyuꞌn aj Israel; cbel cykꞌoꞌn nim cycastiw aj Edom tuꞌnju at nim ntxꞌuꞌjile cyiꞌj. Cyjaꞌtzun cꞌelel cynicꞌ tiꞌj oc t-xelin wuꞌne. Akine Dios in chin kꞌmante jlu.
Cbel cycastiw aj Filistey
15 Akine Dios in xi nmaꞌne jlu: Ke aj Filistey ma xelin cyuꞌn, tucꞌil cyanmi nojni tuꞌn icꞌbil; atxix ojtxi aj kꞌoj ke cyiꞌj aj Israel, ex oc tilil cyuꞌn tuꞌn cynaj. 16 Tuꞌntzun jlu akine Dios in xi nmaꞌne jlu: Cbel cycastiw aj Filistey wuꞌne; che bajel naj ke aj Ceretey wuꞌne, ax icx che najel wuꞌne keju najlke ttzi mar. 17 Cxelil wuꞌne cyiꞌj tuj jun tumel xobajilxix; cbel cycastiw wuꞌne tucꞌil ntxꞌuꞌjile. Oc tbant jlu, cꞌeleltzun cynicꞌ tiꞌj, akine Dios.