Aju techal tiꞌj jun cꞌil
24
Tuj tlajin kꞌij te tlajin xjaw te tbelajin abkꞌi, tzaj yolin Kman wucꞌile ex tma cyjaꞌ: 2 Tzꞌiban cuꞌxa aju tajlal xjaw te kꞌij jaꞌlo, porque jaꞌlo ma tzꞌoc tzokpaj rey te Babilonia kꞌojlel tiꞌj tnam Jerusalén. 3 Ex kꞌmanxa jun techal cye xjal cycꞌiꞌ che bin, tuꞌn tajben te jun yecꞌbil te cye. Kꞌmanxa cye aju yol cxel nmaꞌne teya:Kꞌon jaxa jun cꞌil tibaj kꞌakꞌ ex kꞌon cuꞌxa aꞌ tuj;
4 Kꞌon cuꞌxa elaꞌ piẍ twitz chibj tbanilxix tuj, aju nneꞌl tiꞌj tcux ẍneꞌl ex tiꞌj ttzal tiꞌj, ax icx kꞌon cuꞌxa ke bak tbanilxix.
5 Kꞌintza jun ẍneꞌl tbanilxix ex kꞌon ocxa nim siꞌ tjakꞌ, tuꞌntzun tloklon wen ocxi cytzkꞌaj ke bak.
6 Porque in tmaꞌn Kman cyjaꞌ: Ay becꞌbil twitz tnam nim byol xjal at tuj. Ic tten ic tzaꞌn jun cꞌil ma tzaj jlet lan tuj, ex aju lan mlayx jaw twitz cꞌil. Kꞌin jatza ke twitz chibj, junjun tjatz tuꞌna, ocxi mintiꞌtl tcyaj ten tuj cꞌil.
7 Nojni tuj tnam tuꞌn cychcꞌel xjal e cub byoꞌn; ex mya twitz txꞌotxꞌ tcub chicꞌ, nokwit tcub twitz txꞌotxꞌ jacwitlo cub naj tuꞌn kuk, pero jlu tcub tibaj pic mintiꞌ txꞌotxꞌ tibaj.
8 Ax cyjel nkꞌoꞌne chicꞌ tibaj pic mintiꞌ txꞌotxꞌ tibaj, cyjaꞌtzun mlayx bant tmakset tibaj, tuꞌntzun ttzaj nimxix nkꞌoje cyiꞌj ex tuꞌn tcub cycastiw wuꞌne, chi Dios.
9 Porque in tmaꞌn Kman cyjaꞌ: Ay becꞌbil twitz tnam at nim byol xjal tuj. Ax kine chin oquel chmonte siꞌ tiꞌj.
10 Chmoꞌn oca nim siꞌ tjakꞌ cꞌil ex e tcꞌant-xix kꞌakꞌ tjakꞌ wen ex e cytzkꞌaj ke twitz chibj, ocxi taj tzkij taꞌl ex ocxi cybaj tzꞌeꞌy ke bak;
11 Bix jax tkꞌoꞌna cꞌil juntl maj tibaj kꞌakꞌ aju mintiꞌ tuj, ocxi toc ju cꞌil scolin tuꞌn kꞌakꞌ ex ocxi t-sakix mintiꞌtl tzꞌil tiꞌj; ex ocxi tcub naj aju lan otok tzaj jlet tuj.
12 Masque bant icju pero atx lan tuj, mintiꞌ ma sakix mi tuꞌn kꞌakꞌ.
13 Tzꞌilxix cybinchbene mya baꞌn, akeye aj Jerusalén, o wajbeye tuꞌn cysakixe wuꞌne tuj cytzꞌilile, pero mintiꞌ ma che sakixe. Maxi che sakixtele ocxi tcub nkꞌoꞌne nim cycastiwoye. 14 Akine Dios ma chin kꞌmante jlu ex cbantel wuꞌne icju. Ax kine chin binchalte ex mlayx tzicꞌx tiꞌj; mlay tzaj tzꞌeꞌy ncꞌuꞌje cyiꞌje ex mlay chꞌexpet nximbetze tiꞌj ju cbantel cyiꞌje wuꞌne. Cbel cycastiwoye wuꞌne tuꞌn tlaj cybinchbene mya baꞌn. Akine Dios in chin kꞌmante jlu.
Tej tcyim t-xuꞌjil Ezequiel
15 Tzaj yolin Kman wucꞌile ex tma cyjaꞌ: 16 Jurat naj cꞌelel wiꞌne ttxlaja aju t-xuꞌjila aju nimxix in tcꞌujlaꞌna. Pero miꞌn wuyina, miꞌn okꞌa ex miꞌn tzꞌetz taꞌl twitza tiꞌj. 17 Miꞌn xjikꞌbana cyuw ex miꞌn tbinchaya ic tzaꞌn in bant cyuꞌn xjal oc tcyim jun cyucꞌil. Miꞌn tzꞌel tiꞌna cꞌalbil twiꞌya ex miꞌn beta mintiꞌ t-xajbiya toc; miꞌn tzꞌoc tmaksiꞌna twitza te techal tbisa ex miꞌn txi twaꞌna aju wabj in bant cyuꞌn xjal oc tcyim jun cyucꞌil.
18 Te prim in yoline cyucꞌil xjal, ex te kale atzun tcyim nxuꞌjile; te prim te juntl kꞌij nbinchaye aju otok tzaj tmaꞌn Kman weye. 19 Tzajtzun cymaꞌn xjal weye cyjaꞌ: Chicꞌbantza keye ti t-xilen aju in tbinchaꞌna.
20 Xitzun nmaꞌne cye: Tzaj yolin Kman wucꞌile ex tzaj tmaꞌn cyjaꞌ: 21 Kꞌmanxa cye aj Israel cyjaꞌ: Atzun jlu in tmaꞌn Kman: Cbajel nxitune njaye, aju kꞌuklxix cycꞌuꞌje tiꞌj ka cyuwxix tten, aju nimxix cyganiye tuꞌn cyqueꞌyine tiꞌj, ex aju nim in che tzalaje tiꞌj; ke cycyꞌajale ex ke cymeꞌjele ma che cyaj ten tuj Jerusalén che bel byoꞌn tuꞌn spad. 22 Ex kꞌmanxe cye cyjaꞌ: Cbantel cyuꞌne ic tzaꞌnx weye ma nbincha, mlay tzꞌoc cymaksiꞌne cywitze te techal cybise, ex mlay txi cywaꞌne aju wabj in bant cyuꞌn xjal oc tcyim jun cyucꞌil. 23 Mlay tzꞌel cyiꞌne cꞌalbil cywiꞌye ex mlay che bete mintiꞌ cyxajbiye toc. Mlay che wuyine ex mlay che jaw okꞌe. Che cyjel tene mintiꞌ cyipune tuꞌn tlaj ju cybinchbene mya baꞌn, ex che jawil okꞌe cyxolxe, chicuya cye. 24 Ate Ezequiel jun yecꞌbil te cyeye, ex tcyakilju ma tbincha oc cbantel cyuꞌne. Octzun tpon tkꞌijlalil tuꞌn ttzaj jlu, cꞌelel cynicꞌe tiꞌj, akine Dios.
25 Aya xjal, cbel nxitune njaye at cyxol, aju kꞌuklxix cycꞌuꞌj tiꞌj ka cyuwxix tten, aju in che tzalaj tiꞌj tuꞌnju tbanilxix ex nim cygan tuꞌn toc cyqueꞌyin. Ax icx che elel wiꞌne ke cycyꞌajal ex cymeꞌjel. 26 Tuj kꞌij lu, tzul jun xjal kꞌolte tkanil teya, aju otok tzokpaj. 27 Tujtzun kꞌij lu cjaketel ttziꞌya, ex cbantel tyolina tucꞌil ju xjal otok tzokpaj, ex mlay tentla te men. Cyjaꞌtzun tten cꞌoquela te jun techal cye tnam xjal, ex atzun cye cꞌelel cynicꞌ tiꞌj, akine Dios.